A Escola Galega de Administración Pública organiza unhas xornadas galaico-portuguesas sobre o recrutamento do persoal ó servicio das administracións públicas, conforme ás seguintes bases:
1. Obxecto.
Os días 8 e 9 de outubro de 1996 desenvolveranse, no salón de actos da Escola Galega de Administración pública, unhas xornadas galaico-portuguesas sobre o recrutamento do persoal ó servicio das administracións públicas.
2. Obxectivos.
As xornadas teñen por finalidade reflexionar sobre a situación na que se atopan os procedementos de selección e recrutamento de persoal nas distintas administracións de España e Portugal, facer un estudio comparado de ámbalas dúas experiencias e tentar atopar novas fórmulas que permitan supli-las carencias que os sistemas actuais padecen.
3. Contido.
Entre outros, desenvolveranse os seguintes temas:
-Os recursos humanos e a modernización da Administración pública portuguesa.
-O réxime xurídico do recrutamento e selección do persoal na Administración pública portuguesa.
-As novas tendencias nos procedementos de selección do persoal público.
-O autogoberno local en España: o recrutamento do seu persoal.
-O persoal ó servicio das comunidades autónomas. Especial referencia a Galicia.
-A selección e formación do persoal da Administración pública.
-Achegamento á función pública doutros países do contorno: Francia-Gran Bretaña-Alemaña-Italia-Estados Unidos.
4. Destinatarios.
Persoal ó servicio de calquera das administracións públicas galegas e interesados en xeral.
5. Desenvolvemento e duración.
As xornadas abriranse o martes, día 8 de outubro, ás 10 horas, e rematarán, o mércores, día 9 do citado mes, ás 13.30 horas.
6. Inscrición.
-Prazo: remata o xoves, día 3 de outubro de 1996.
-Lugar de presentación: no Rexistro xeral da EGAP (Polígono das Fontiñas, rúa de Madrid, 2-4, 15703 Santiago de Compostela). Tfno.: 57 08 00. Telefax nº: 57 15 40.
-Forma: as solicitudes de inscrición faranse por escrito, no modelo oficial que figura ó final destas bases. Serán rexeitadas todas aquelas peticións que non reúnan o dito requisito.
As peticións de admisión poderanse enviar por correo ordinario ou por telefax ó número consignado.
-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.
A partir do 4 de outubro, os peticionarios poderán obter confirmación da súa posible admisión, chamando por teléfono de 11.30 a 14.45 horas, ó seguinte número: (981) 57 08 00 (ext. 229), ou ben consultando a lista de admitidos, que se expoñerá no taboleiro de anuncios da EGAP 48 horas
despois de remata-lo prazo de presentación de solicitudes.
7. Certificación de asistencia.
Entregaráselles ó remate destas xornadas a aqueles asistentes que concorresen asiduamente a elas documento no que se exprese a natureza da actividade e a data da súa realización.
Santiago de Compostela, 26 de agosto de 1996.
Domingo Bello Janeiro
Director da Escola Galega de Administración Pública
6634