Dentro dos programas de actividades que a Academia Galega de Seguridade ten previsto realizar no ano 1996, e conforme as funcións atribuídas pola Lei 4/1992, do 9 de abril, de creación da Academia Galega de Seguridade, anúnciase a celebración dunhas xornadas, en colaboración co Servicio Galego de Promoción da Igualdade do Home e da Muller da Xunta de Galicia, sobre violencia contra a muller, que deberán desenvolverse conforme as seguintes bases:

Obxectivos.

As xornadas teñen por obxectivos ofrecer ós corpos e forzas de seguridade unha visión o máis ampla posible da problemática dos malos tratos a mulleres, tanto físicos coma psicolóxicos, e informar sobre cales son os medios ó alcance para paliar este problema.

Destinatarios.

As xornadas van dirixidas ós membros dos corpos e forzas de seguridade.

Inscrición.

A inscrición dos participantes será totalmente gratuíta.

Prazas.

O número de prazas que se ofertaran será de 250.

Solicitudes.

1. O persoal que desexe participar nestas xornadas deberá presentar, cuberta á máquina ou con letra moi clara, a instancia que figura no anexo, acompañada dunha fotocopia do DNI e do carné profesional.

2. O prazo para a presentación de instancias rematará o día 12 de setembro de 1996, ás 14 horas.

3. As instancias deberán vir asinadas polo xefe do cadro de persoal, ou polo concelleiro de tráfico e seladas; será isto requisito indispensable para ser admitido nas xornadas; o incumprimento deste requisito implicará a non admisión nas mencionadas xornadas.

4. As instancias deberán enviarse á sede da Academia Galega de Seguridade: Rúa de Madrid, 2-4, polígono das Fontiñas, 15703 Santiago de Compostela, ou ben poden entregarse en calquera dos lugares previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.

Duración e datas.

As xornadas desenvolveranse durante os días 8 e 9 de outubro de 1996, en xornadas de mañá e tarde.

O horario será o seguinte:

Día 8: de 9.30 a 13.30 horas e de 16.15 a 20 horas.

Día 9: de 10 a 14 horas.

Relación de admitidos.

A relación de admitidos publicarase o día 26 de setembro de 1996 no taboleiro de anuncios da Academia Galega de Seguridade, ou ben poden confirma-la súa asistencia chamando ó teléfono (981) 56 34 00.

Lugar.

As xornadas celebraranse no salón de actos da Escola Galega de Administración Pública, sita na Rúa Madrid, 2-4, no polígono das Fontiñas (Santiago de Compostela).

Certificado de asistencia.

Ó remate das xornadas entregaráselles un certificado de asistencia a aquelas persoas que acrediten a súa participación continuada a elas.

Modificación.

A Academia Galega de Seguridade poderá modifica-lo desenvolvemento das xornadas para adapta-las ás necesidades da Administración e ás continxencias que poidan xurdir.

Santiago de Compostela, 19 de xuño de 1996.

Juan José Fariñas-Ferro Rodríguez

Director xeral da Academia Galega de Seguridade

5037