Dentro das actividades que vai realiza-la EGAP en 1996, e conforme as funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse en colaboración co Instituto Universitario Ortega y Gasset unhas xornadas sobre gobernos locais en Europa que deberán desenvolverse segundo as seguintes bases:
1. Obxectivos.
Debater sobre o papel dos gobernos locais en España e nos países do noso contorno. Dar a coñece-los novos enfoques e experiencias que se veñen producindo neste ámbito.
2. Destinatarios.
Responsables políticos, directivos e técnicos das administracións provincial e municipal, así como estudiosos e especialistas en materias de xestión pública.
3. Desenvolvemento.
-Duración: 2 días.-Lugar: Santiago de Compostela, salón de actos da EGAP.-Datas: 20 e 21 de xuño.-Horarios: mañá e tarde.-Prazas: limitadas á capacidade do local.
4. Prazo.
O prazo de inscrición nas xornadas finaliza cinco días antes do seu comezo.
5. Tramitación de solicitudes.
As solicitudes irán dirixidas ó director da Escola Galega de Administración Pública, polígono das Fontiñas, r/ Madrid, 2-4, 15703 Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP, ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.
6. Selección.
As prazas adxudicaranse por rigorosa orde de entrada no rexistro sempre que se teñan acreditados tódolos requisitos para a inscrición no momento de presentación da solicitude.
Os peticionarios poderán obter confirmación da súa posible admisión, chamando por teléfono en días laborables, de 11.30 a 14.45 horas ó seguinte número: (981) 57 08 00 (Ext. 244), ou ben consultando a lista de admitidos que se exporá no taboleiro de anuncios da EGAP 48 horas despois de remata-lo prazo de presentación de solicitudes.
7. Inscricións fóra de prazo.
Só se admitirán se quedasen prazas baleiras e sempre que se cumpran os requisitos xerais antes indicados.
8. Modificacións.
A EGAP reserva para si a facultade de interpretar e resolve-las incidencias que puidesen xurdir no desenvolvemento das xornadas, así como a de cancelalas se o escaso número de solicitudes non xustificase a súa realización.
9. Certificado de asistencia.
Outorgaráselles certificado de asistencia ós alumnos que participen con regularidade nas xornadas programadas.
10. Contido.
As xornadas estructuraranse do seguinte xeito:
Intervencións individuais de expertos nacionais e estranxeiros en temas de goberno local.
Discusión dos asistentes ás xornadas verbo dos traballos presentados polos relatores.
Cuestións básicas que se abordarán:
-Impacto do proceso de unificación europea sobre o nivel local de goberno.
-A situación e perspectivas das relacións entre niveis territoriais de goberno en Europa.
-A situación dos gobernos locais nos países do Leste.
Análise das tendencias máis recentes nos sistemas de goberno local nos distintos estados membros da Unión Europea.
Santiago de Compostela, 9 de maio de 1996.
Domingo Bello Janeiro
Director da Escola Galega de Administración Pública
4222