O Decreto 200/1993, do 29 de xullo, de ordenación da atención primaria na Comunidade Autónoma de Galicia, prevé nas súas disposicións transitorias unha serie de mecanismos para a integración do persoal no novo sistema de atención primaria da Comunidade Autónoma.
Na aplicación das ditas medidas xurdiron problemas de índole técnico-xurídico que aconsellan a modificación parcial dalgunha das previsións inicialmente establecidas.
Polo demais, aprovéitase esta modificación para preve-lo establecemento dun réxime específico para determina-lo ámbito funcional e territorial das prazas de matronas de atención primaria do Servicio Galego de Saúde, así como para fixar con precisión a integración no novo sistema e a participación posterior nos procedementos de provisión de postos de traballo.
Na súa virtude, e logo da negociación coas organizacións sindicais presentes na Mesa Sectorial de Negociación do persoal sanitario ó servicio da Comunidade Autónoma, por proposta da Consellería de Sanidade e Servicios Sociais e logo do informe das consellerías da Presidencia e Administración Pública e Econo.mía e Facenda, trala deliberación do Consello da Xunta de Galicia na súa reunión do día vintecinco de abril de mil novecentos noventa e seis,
DISPOÑO:
Artigo 1º.
Queda derrogada a disposición transitoria primeira do Decreto 200/1993, do 29 de xullo.
Artigo 2º.
1. O apartado 1 da disposición transitoria segunda, que pasa a se-la disposición transitoria primeira, queda redactado da seguinte forma:
«Con anterioridade á convocatoria dos procesos de provisión e selección para a cobertura de postos de traballo vacantes, a tódolos propietarios de prazas das categorías que a continuación se relacionan ofreceráselle-la posibilidade de integrarse no novo sistema de atención primaria:
-Corpo facultativo superior da Xunta de Galicia, escala de atención primaria e especializada, subescala de atención primaria, clase de médicos titulares.
-Médicos estatutarios de zona.
-Médicos xerais dos servicios normais e especiais de urxencias.
-Pediatras estatutarios de zona.
-Odóntologos de cota.
-Corpo facultativo de grao medio da Xunta de Galicia, escala de atención primaria e especializada, subescala de atención primaria, clase de practicantes titulares.
-ATS de zona.
-ATS dos servicios normais e especiais de urxencias.
-ATS de institucións abertas.
-Fisioterapeutas de institucións abertas».
2. Igualmente, o apartado 2 da disposición transitoria segunda pasa a se-lo apartado 2 da disposición transitoria primeira. O apartado 4, parágrafo 1º da devandita disposición queda redactado do xeito seguinte:
«Os profesionais que opten por non integrarse no novo sistema conservarán os seus dereitos individuais e económicos adquiridos, así como as obrigas inherentes á praza que ocupan, dependendo funcionalmente do xefe de servicio correspondente. En todo caso poderán participar nos concursos anuais a que se refire a disposición adicional, logo da aceptación da oferta de integración. De non opter praza no referido concurso, manterán o réxime xurídico e retributivo anterior ata a constitución da correspondente unidade de atención primaria».
Así mesmo, os apartados 3 e 4 da disposición transitoria segunda pasan a se-los apartados 3 e 4 da disposición transitoria primeira.
Artigo 4º
As disposicións transitorias terceira e cuarta pasan a ser, respectivamente, as disposicións transitorias segunda e terceira.
Artigo 5º
Engádese un parágrafo ó final da disposición transitoria segunda, conforme a numeración establecida no artigo anterior, que queda redactado da forma seguinte:
«O establecido na presente disposición transitoria enténdese sen prexuízo do previsto na disposición transitoria segunda da Lei 17/1989, do 23 de outubro, de creación de escalas de persoal sanitario ó servicio da Comunidade Autónoma. Para tal efecto e con independencia do grao de desenvolvemento en que se encontre o novo sistema de atención primaria deseñado polo presente decreto, levaranse a cabo as previsións da dita lei, para a garanti-la posibilidade de acceder á condición de funcionario, estrictamente, ó persoal comprendido no ámbito de aplicación da súa disposición transitoria segunda».
Artigo 6º
Engádese unha nova disposición transitoria cuarta, que queda redactada na forma seguinte:
«1. O Consello da Xunta de Galicia regulará o réxime xurídico das prazas de enfermería obstétrico-xinecolóxicas (matronas) no ámbito da atención primaria da saúde, determinando os ámbitos funcional e territorial propios da súa prestación de servicios e incluíndo na dita regulación ós postos de traballo actualmente pertencentes ó corpo facultativo de grao medio da Xunta de Galicia, escala de atención primaria e especializada, subescala de atención primaria, clase de matronas titulares.
2. Con posterioridade á citada reestructuración e ofertándose os postos de traballo resultantes dela, realizarase o concurso previsto na disposición transitoria quinta da Lei 17/1989, do 23 de outubro».
Disposición derradeira
O presente decreto entrará en vigor o día seguinte ó da súa publicación no Diario Oficial de Galicia.
Santiago de Compostela, vintecinco de abril de mil novecentos noventa e seis.
Manuel Fraga Iribarne
Presidente
José Manuel Romay Beccaría
Conselleiro de Sanidade e Servicios Sociais
3476
