Dentro dos programas de actividades que a Academia Galega de Seguridade ten previsto realizar no ano 1996, e conforme ás funcións atribuídas pola Lei 4/1992, do 9 de abril, de creación da Academia Galega de Seguridade, anúnciase a celebración de dous cursos sobre protección de personalidades e escoltas, que deberán desenvolverse conforme as seguintes bases:
-Obxectivos.
Os cursos teñen por obxectivos:
a) Coñecer e perfecciona-las técnicas aplicables na protección de personalidades.
b) Coñecer qué unidades operativas interveñen nos dispositivos de protección a personalidades.
c) Coñece-los medios técnicos utilizables na protección de personalidades.
d) Coñece-los métodos de actuación de organizacións terroristas.
e) Conseguir coñecementos sobre os explosivos utilizados por organizacións terroristas e as medidas que cómpre adoptar.
-Destinatarios.
Os cursos van dirixidos ós membros dos corpos das policías locais de Galicia.
-Inscrición.
A inscrición dos participantes será totalmente gratuíta.
-Prazas.
O número de prazas que se ofertarán por curso será de 30.
-Solicitudes.
1. O persoal que desexe participar nestes cursos deberá presentar, cuberta a máquina ou con letra moi clara, a instancia que figura no anexo, acompañada dunha fotocopia do DNI, e do carné profesional.
2. O prazo para a presentación de instancias ramatará ás 14 horas, nas seguintes datas:
Primeiro curso: o día 27 de maio.
Segundo curso: o día 3 de xuño.
3. As instancias deberán vir asinadas polo xefe do cadro de persoal, ou polo concelleiro de tráfico e seladas, requisito que será indispensable para ser admitido nos cursos; o incumprimento deste requisito suporá á non admisión no devandito curso.
4. As instancias deberán enviarse á sede da Academia Galega de Seguridade, rúa de Madrid, 2-4, polígono das Fontiñas, 15703 Santiago de Compostela, ou ben poden entregarse en calquera dos lugares
previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.
-Contido e duración.
Os cursos terán lugar en sesións de tarde, de luns a venres, e neles trataránse, entre outros, os seguintes temas:
a) Aspectos xerais da protección de personalidades.
b) Protección de personalidades: dinámica e estática.
c) Grupos de apoio.
d) Caravanas.
e) Plans de seguridade: dispositivos.
f) Transmisións, etc.
-Datas.
Os cursos realizaranse nas seguintes datas:
Primeiro curso: do 3 ó 7 de xuño de 1996.
Segundo curso: do 17 ó 21 de xuño de 1996.
O horario será de 16 a 20 horas.
-Relación de admitidos.
A relación de admitidos publicarase os días 29 de maio e 5 de xuño, respectivamente, no taboleiro de anuncios da Academia Galega de Seguridade, ou ben poden confirma-la súa asistencia chamando ó teléfono (981) 56 34 00.
-Lugar.
Na Academia Galega de Seguridade, sita na rúa de Madrid 2-4, no polígono das Fontiñas en Santiago de Compostela.
-Certificado de asistencia.
Ó remate de cada curso entregaráselles un certificado de asistencia a aquelas persoas que acrediten a súa participación continuada a el, non podendo supera-las faltas de asistencia un 15% do total da duración de horas lectivas do curso; unha inasistencia superior ó 15%, aínda que sexa xustificada, implicará a non expedición do certificado.
-Modificacións.
A Academia Galega de Seguridade poderá modifica-lo desenvolvemento dos cursos para adaptalos ás necesidades da Administración e ás continxencias que poidan xurdir.
Santiago de Compostela, 18 de abril de 1996.
Juan José Fariñas-Ferro Rodríguez
Director xeral da Academia Galega de Seguridade
9603319