Visto o texto do convenio colectivo da empresa Unidad de Vehículos Industriales S.A. (UNVI S.A.) (código nº 3200722) de Ourense, con entrada nesta delegación provincial da Consellería de Xustiza, Interior e Relacións Laborais, subscrito en representación da parte económica pola empresa e da parte social polo comité da empresa, en xuntanza celebrada o 11 de xaneiro de 1996, e de conformidade co disposto no artigo 90.2º e 3º, da Lei 8/1980, do 10 de marzo, do Estatuto dos traballadores, texto refundido aprobado por Real decreto 1/1995, do 24 de marzo, Real decreto 1040/1981, do 22 de maio, sobre rexistro e depósito de convenios colectivos de traballo e Real decreto 2412/1982, do 24 de xullo, sobre traspaso de funcións e servicios da Administración do Estado á Comunidade Autónoma de Galicia, en materia de traballo.
Esta delegación provincial
ACORDA:
Primeiro.-Ordena-la inscrición do convenio no libro de rexistro rexistro desta delegación provincial, con notificación ás representacións económica e social da comisión negociadora.
Segundo.-Ordena-lo seu depósito no Servicio de Relacións Laborais, Unidade de Mediación, Arbitraxe e Conciliación desta delegación.
Terceiro.-Dispoñe-la súa publicación no Diario Oficial de Galicia.
Ourense, 28 de febreiro de 1996.
Manuel López Casas
Delegado provincial de Ourense
Convenio Colectivo
Unidad de Vehículos Industriales, S.A.
(UNVI, S.A.)
1996
Artigo 1º.-Ambito territorial.
O presente convenio será de aplicación para a empresa Unidad de Vehículos Industriales, S.A. (UNVI, S.A.) e tódolos seus traballadores.
Artigo 2º.-Ambito persoal.
Queda comprendido neste convenio todo o persoal asalariado da Compañía UNVI, S.A., agás os que exerzan funcións de alta dirección ou alto consello e as persoas ligadas por contratos mercantís ou civís.
Artigo 3º.-Duración, prórroga e denuncia.
A duración do presente convenio será dun ano a partir do 1 de xaneiro de 1996 e prorrogarase de ano en ano se non se denuncia con tres meses de antelación ó remate da súa vixencia. A referida denuncia deberá facerse coa comunicación á que
fai referencia o artigo 89 do Estatuto dos traballadores. O texto do presente convenio será de obrigatorio cumprimento mentres non sexa substituído por outro que no seu día se negocie.
Artigo 4º.-Garantía (ad personam).
As cantidades superiores pactadas a título persoal ou calquera outra mellora que teña establecida na empresa serán respectadas na súa totalidade.
Artigo 5º.-Compensación e absorción.
As melloras do presente convenio poderán ser compensadas ou absorbidas con calquera outra mellora voluntaria ou por disposición legal en cómputo anual, agás que expresamente se pacte o contrario.
Artigo 6º.-Xornada de traballo.
A xornada de traballo será de 1.792 horas para o ano de vixencia, distribuídas a través de oito horas diarias de luns a venres. Os quince minutos de bocadillo contaranse como xornada efectiva de traballo.
Artigo 7º.-Vacacións.
As vacacións anuais consistirán no desfrute de 30 días naturais que se desfrutarán preferentemente no mes de agosto.
A nómina correspondente ó período de desfrute de vacacións será de igual á dunha mensualidade normal de traballo.
O traballador en situación de IT ó comezo do período vacacional poderá recupera-los días de vacacións nos que se encontrase en situación de baixa por IT, ata un máximo de 15 días.
A empresa queda facultada para investigar e inspecciona-la realidade da situación de baixa por IT.
O período de vacacións interromperase no suposto de que o traballador contraia matrimonio no período vacacional.
Artigo 8º.-Salarios.
Para 1996 os salarios aumentarán un 2% sobre as táboas vixentes o 31 de decembro de 1995, e farase efectivo na nómina de abril, con efectos económicos desde o 1 de xaneiro de 1996.
Artigo 9º.-Antigüidade.
Establécese un complemento de antigüidade por quinquenios, en contía do 6% do salario base.
Artigo 10º.-Plus de transporte.
Aboarase un plus de transporte por día efectivamente traballado na contía de 159 ptas.
Artigo 11º.-Gratificacións extraordinarias.
Establécense dúas pagas extraordinarias pagadoiras antes do 15 de xullo e outra antes do 22 de decembro, consistentes no aboamento do salario base máis a retribución voluntaria complementaria, iguais ás correspondentes a unha mensualidade normal de traballo.
Artigo 12º.-Gastos de desprazamento.
Os gastos de desprazamento serán aboados pola empresa, logo da súa xustificación.
Artigo 13º.-Licencias e excedencias.
O réxime de licencias acomodarase ó disposto nos seguintes apartados:
-Por matrimonio: 15 días naturais.
-Por nacemento de fillo: 4 días naturais.
-Por matrimonio de fillos: 2 días naturais.
-Por morte ou enfermidade grave do cónxuxe, pais, irmáns, pais políticos, avós, netos e fillos, o tempo indispensable cun mínimo de 2 días naturais.
-Por morte de tíos políticos: 1 día natural.
-Por morte de irmáns políticos, avós políticos e tíos: 2 días naturais.
-Por morte dun sobriño: 1 día natural.
-Por exames o tempo necesario con xustificación.
-Por parto da muller traballadora, haberá que aterse á lexislación vixente.
En caso de que o feito causante ocorrese fóra da provincia, corresponderá un día natural máis ós previstos.
O traballador que teña ó seu cargo algún diminuído físico ou psíquico terá dereito a unha reducción de xornada de polo menos 1/3, coa correspondente reducción salarial.
O traballador terá dereito, con xustificación, ós necesarios períodos de ausencia ó traballo, cando se someta a técnicas de fertilización legalmente autorizadas ou de esterilización.
Para tódolos efectos deste artigo, entenderase por enfermidade grave, sempre que exista necesidade de hospitalización, intervención cirúrxica, necesidade de acompañante e sempre que así sexa cualificado polo facultativo correspondente.
Artigo 14º.-Incapacidade temporal (IT).
O traballador en situación de IT percibirá nos 45 primeiros días da dita situación o 100% do salario cotizable dun mes, agás en caso de accidente laboral en que se percibirá o 100% a partir do primeiro día. O dito complemento aboarase tamén na súa parte proporcional nas pagas extraordinarias.
A mellora de prestacións incluída no parágrafo anterior só operará cando o absentismo non supere o 4%, sen que teñan en conta o cómputo da dita porcentaxe os procesos de longa enfermidade e accidente laboral. Nos casos en que non entre en xogo a mellora de prestacións, seguirase o sinalado pola lexislación vixente.
Artigo 15º.-Póliza de seguros.
A empresa deberá concertar con primas íntegras ó seu cargo unha póliza de seguros que cubra as seguintes indemnizacións:
-Falecemento por causa natural, mesmo enfermidade profesional: 750.000 ptas.
-Invalidez permanente total ou absoluta por causas naturais ou por enfermidade profesional: 750.000.
-Falecemento por accidente laboral ou común: 3.000.000 de ptas.
-Invalidez permanente total, absoluta ou gran invalidez por accidente laboral ou común: 3.000.000 de ptas.
Artigo 16º.-Seguridade e hexiene.
A empresa obrígase ó cumprimento inexcusable das normas sobre seguridade e hixiene acomodando a súa actuación ó prevido na Lei 31/1995, do 8 de novembro, de prevención de riscos laborais.
Artigo 17º.-Comisión mixta paritaria.
Constitúese unha comisión mixta paritaria de interpretación e cumprimento do convenio, integrada polos membros do comité de empresa e os membros da dirección da empresa que interviñesen na negociación do convenio, e que terá como función a interpretación e vixilancia do cumprimento do pactado.
Artigo 18º.-Roupa de traballo.
A empresa entregará desde o primeiro día de traballo a roupa de protección e hixiene necesaria segundo a lexislación vixente.
O persoal obreiro percibirá dúas fundas ou pezas semellantes ó entrar no traballo por primeira vez e unha máis cada seis meses.
Nos postos en que se necesite calzado especial por motivos de seguridade, a empresa facilitarao, fixando a comisión mixta o número de pares que sexan necesarios no ano.
Os productores que realicen traballos especiais, que serán definidos pola comisión mixta paritaria, recibirán unha funda máis cada catro meses. O persoal administrativo terá o mesmo dereito a pezas de roupa asimilables ás súas funcións, sempre que así o soliciten persoalmente.
Disposición derradeira
En todo o non previsto no presente convenio haberá que aterse ó disposto na ordenanza laboral para as industrias siderometalúrxicas, no Real decreto lexislativo 1/1995, do 24 de marzo, polo que se aproba o texto refundido do Estatuto dos traballadores, a Lei orgánica de liberdade sindical e as demais disposicións de legal aplicación.
Anexo. Táboa salarial
Táboa salarial 1996
Categorías Sub-Cat. A Sub-Cat. B
Persoal obreiro
Peón 3.347 3.236 Especialista 3.374 3.264 Oficial de 3ª 3.422 3.312 Oficial de 2ª 3.484 3.374
Categorías Sub-Cat. A Sub-Cat. B
Oficial de 1ª 3.574 3.464 Traballador menor de 18 anos 3.347 3.236
Persoal subalterno
Almaceneiro 3.312 3.236 Probador 3.450 3.374 Listeiro 3.387 3.312 Recepcionista 3.312 3.236 Vixilante 3.312 3.236 Ordenanza 3.312 3.236 Porteiro 3.312 3.236 Conserxe 3.312 3.236 Chofer turimo 3.450 3.374 Chofer camión 3.538 3.464 Telefonista 3.387 3.312
Persoal técnico
Mestre taller 4.187 4.112 Xefe de taller 4.308 4.234 Encargado 4.187 4.112 Titulado medio 4.308 4.234 Titulado superior 4.499 4.424 Delin. proxectista 4.040 3.966 Delineante 1ª 3.538 3.464 Calcador-Reprod. 3.387 3.312 Delineante 2ª 3.450 3.374 Controlador 3.450 3.374 Tec. Organiz. 1ª 3.536 3.464 Tec. Organiz. 2ª 3.450 3.374 Aux. Organiz. 1ª 3.387 3.312 Aux. Organiz. 2ª 3.339 3.264
Persoal administrativo
Aux. administración 3.387 3.312 Oficial Admvo. 1ª 3.538 3.464 Oficial Admvo. 2ª 3.450 3.374 Viaxante ou vendedor 3.387 3.312 Xefe Admvo. 1ª 3.589 3.515 Xefe Admvo. 2ª 3.538 3.464 Caixeiro 3.387 3.312 Xefe almacén 3.538 3.464 Xefe contabilidad 3.589 3.515 A.T.S. 4.308 4.234 Traductor idiomas 3.450 3.374 Programador 3.450 3.374 Analista 3.450 3.374
3094
