Consonte o artigo 24.1º da Lei 11/1995, do 28 de decembro, de presupostos xerais da Comunidade Autónoma de Galicia para 1996, o Consello da Xunta de Galicia, polo Decreto 115/1996, do 14 de marzo, autorizou a realización das operacións financeiras previstas na indicada lei mediante a emisión de débeda pública ou a concertación de créditos, facultando, así mesmo, o conselleiro de Economía e Facenda para que estableza as condicións nas ditas operacións e dicte as disposicións necesarias para tal efecto.

Por todo isto,

DISPOÑO:

Artigo 1.

Obtida a autorización, establecida no artigo 14 apartado 3 da Lei orgánica 8/1980, do 22 de setembro, de finaciamento das comunidades autónomas, mediante acordo do Consello de Ministros de data 12 de abril 1996, disponse a emisión de débeda pública interior por un importe de 14.000 millóns de pesetas.

Artigo 2.

Esta emisión realízase baixo a forma de bonos da Xunta de Galicia representada mediante anotacións en conta, ó amparo do artigo 55 da Lei 24/1988, do 28 de xullo, do mercado de valores.

A emisión de débeda pública que autoriza a presente orde, terá as características que se detallan a continuación:

-Importe: 14.000 millóns de pesetas.

-Data da emisión: 29 de abril de 1996.

-Data de desembolso: 29 de abril de 1996.

-Prezo da emisión: á par libre de gastos para o suscriptor.

-Nominal dos bonos: 100.000 pesetas.

-Subscrición: será realizada directamente polas entidades aseguradoras, actuando no nome propio ou por conta de terceiras persoas.

-Período de subscrición: do día 22 ó 29 de abril de 1996.

-Cupón: os cupóns anuais vencerán o 29 de abril de cada ano. A Xunta de Galicia pagará no seu vencemento os cupóns polo seu importe líquido. Se o posuidor é un investidor non residente que non opere en España mediante establecemento permanente, procederase á devolución de oficio das retencións practicadas, segundo procedemento establecido na resolución da Dirección Xeral de Política Financeira e Tesouro desta consellería, de data 22-10-1993 (DOG 8-11-1993).

-Cotizacións: solicitarase a inscrición desta débeda pública á Central de Anotacións de Débeda Pública do Banco de España na forma prevista nos artigos 55 e seguintes da Lei 24/1988, do 28 de xullo, de mercado de valores, e haberá que aterse ó establecido no Real decreto 505/1987, do 3 de abril e 1009/1991, do 21 de xuño, O.O.M.M. do 19 de maio de 1987 e 31 de decembro de 1991 e os demais preceptos legais que as desenvolven.

-Fiscalidade: de conformidade co previsto no artigo 14.5º da Lei orgánica 8/1980, do 22 de setembro, de financiamento das comunidades autónomas, esta emisión goza dos mesmos beneficios e condicións cá débeda pública do Estado.

-Reserva minorista: reservarase un 10% do importe total da emisión para investimentos non superiores a 5 millóns de pesetas.

-Amortización: dunha soa vez á par, ós cinco (5) anos desde a data da emisión.

-Tipo de xuro: 8,60%.

Disposición derradeira

Esta orde entrará en vigor o mesmo día da súa publicación no Diario Oficial de Galicia.

Santiago de Compostela, 22 de abril de 1996.

José Antonio Orza Fernández

Conselleiro de Economía e Facenda

3042