A formación de especialistas no campo da investigación mariña e os cultivos é unha necesidade que se manifesta neste momento de forma máis aguda no campo de cadros de persoal intermedio, polo que
é a este punto onde se deben dirixir de forma preferente as actuacións de formación de persoal. Polo exposto, esta consellería,
DISPÓN:
Artigo 1º
Con cargo á aplicación orzamentaria 012.004.432.C.480.0 dos presupostos xerais da Comunidade Autónoma de Galicia para 1996, convócanse sete (7) bolsas de especialización de técnicos especialistas en formación profesional de 2º grao e do ciclo formativo de grao superior en acuicultura que se realizarán nos centros dependentes da Consellería de Pesca, Marisqueo e Acuicultura.
A concesión destas axudas rexerase polas bases do anexo a esta orde.
Artigo 2º
O importe global máximo que alcanzará a axuda é de sete millóns trescentas oito mil pesetas (7.308.000 ptas.), das que serán deducidas as correspondentes retencións fiscais.
Disposicións derradeiras
Primeira.-Facúltase a directora xeral de Formación Pesqueira e Investigación para dicta-las normas necesarias para o desenvolvemento e execución desta orde.
Segunda.-Esta orde entrará en vigor o día seguinte ó da súa publicación no Diario Oficial de Galicia.
Santiago de Compostela, 18 de marzo de 1996.
Juan Caamaño Cebreiro
Conselleiro de Pesca, Marisqueo e Acuicultura
ANEXO I
BASES
Primeira.-Obxecto e dotación.
O obxecto da presente convocatoria é a concesión de sete (7) bolsas ou axudas económicas dun ano de duración, prorrogable por outro, para completa-la formación de técnicos especialistas de formación profesional de 2º grao, daquelas ramas que na súa área tecnolóxico-práctica tivesen prácticas de laboratorio relacionadas con temas mariños, de acuicultura, laboratorio ou análise e daqueles que obtiveran o título de técnico superior en producción acuícola.
A contía das bolsas será dun millón corenta e catro mil pesetas (1.044.000 ptas.), aboables en doce mensualidades de oitenta e sete mil pesetas (87.000 ptas.) cada unha, nas que se aplicará a correspondente retención fiscal.
Segunda.-Carácter da bolsa.
Dado o seu carácter formativo e de especialización, a concesión destas bolsas non implica relación laboral ou administrativa entre o beneficiario e a Consellería de Pesca, Marisqueo e Acuicultura, aínda que si a necesaria e natural coordinación co horario, normas e disciplina do departamento ou centro de investigación onde realiza a súa formación; nin dará
lugar á súa inclusión na Seguridade Social, se ben quedará incluído nunha póliza colectiva de seguro de accidentes durante o período desta concesión.
O bolseiro deberá dedicarse de maneira plena a cumpri-las tarefas que lle sexan encomendadas. É incompatible o desfrute da bolsa coa percepción doutras remuneracións, bolsas ou axudas.
Terceira.-Condicións xerais.
Para optar a esta bolsa é necesario:
-Ser galego maior de idade, a teor do disposto no artigo 3 do Estatuto de autonomía de Galicia.
-Posuí-la titulación requirida na data da solicitude.
Cuarta.-Centros de realización.
As bolsas serán de realización nos centros seguintes:
-Centro de Experimentación en Acuicultura, Couso-Ribeira (A Coruña): 3 bolsas.
-Centro de Cultivos Mariños, Peirao de Porcillán, s/n, Ribadeo (Lugo): 2 bolsas.
-Centro de Investigacións Mariñas, Pedras de Corón, s/n, Vilanova de Arousa (Pontevedra): 2 bolsas.
Os bolseiros están obrigados a incorporarse ós centros de realización na data que se lles indique no documento de aceptación da bolsa.
Quinta.-Documentación e trámites.
1. A solicitude destas bolsas farase mediante escrito dirixido ó conselleiro de Pesca, Marisqueo e Acuicultura, segundo modelo normalizado do anexo II, xunto cos seguintes documentos:
a) Fotocopia cotexada do documento nacional de identidade.
b) Currículum vitae do solicitante, cos documentos acreditativos dos méritos alegados.
c) Certificación académica completa e fotocopia cotexada do título correspondente, ou, no seu defecto, xustificación do pagamento dos dereitos de expedición.
d) Outros datos que se poidan xustificar documentalmente e que o solicitante considere de interese en relación coa bolsa.
2. A presentación das solicitudes farase no rexistro xeral da Consellería de Pesca, Marisqueo e Acuicultura (edificios administrativos de San Caetano, Santiago de Compostela), ou ben por calquera das formas previstas no artigo 38.4º da Lei de réxime xurídico das administracións públicas e do procedemento administrativo común.
3. O prazo de presentación de solicitudes será de 15 días hábiles, contados desde o día seguinte ó da publicación da presente orde no Diario Oficial de Galicia.
4. A Dirección Xeral de Formación Pesqueira e Investigación comprobará que tódalas solicitudes
e publicará unha resolución nos taboleiros de anuncios da Consellería de Pesca, Marisqueo e Acuicultura e das súas delegacións coa lista de admitidos e excluídos, indicando, se é o caso, as causas de exclusión. Contra a dita resolución poderán os interesados formular reclamación para emendar erros e faltas de documentos, ante a Dirección Xeral de Formación Pesqueira e Investigación, no prazo de 10 días a partir da publicación da resolución, achegando, se é o caso, a documentación necesaria. Transcorrido este prazo sen que se corrixan as causas de exclusión, procederase ó arquivo do expediente sen máis trámites.
Sexta.-Outorgamento da bolsa.
1. As bolsas serán adxudicadas polo conselleiro de Pesca, Marisqueo e Acuicultura, por proposta da comisión de selección.
2. A comisión de selección estará presidida e será nomeada pola directora xeral de Formación Pesqueira e Investigación, e a súa composición farase pública no taboleiro de anuncios da Consellería de Pesca, Marisqueo e Acuicultura.
3. Na fase de selección teranse en conta os seguintes criterios de valoración:
a) Expediente académico: valorarase a nota media correspondente ós cursos de formación profesional de 2º grao: puntuación máxima 6 puntos.
b) Proximidade temporal á obtención do título profesional: puntuación máxima 1 punto.
c) Outros méritos: (coñecementos de inglés, práctica en empresas, traballos relacionados con laboratorios, cursos, etc.): puntuación máxima 3 puntos.
Só se valorarán os méritos acreditados documentalmente.
Tendo en conta o espíritu de formación destas bolsas, non se adxudicarán estas a aqueles candidatos que, aínda tendo boa puntuación (segundo baremo), a comisión considere que xa están formados, ben por ter desfrutada unha bolsa de características similares, ou ter experiencia profesional.
4. Efectuada a selección pola comisión de selección, a Dirección Xeral de Formación Pesqueira e Investigación fará pública a relación provisional de beneficiarios seleccionados mediante anuncio publicado nos taboleiros de anuncios da Consellería de Pesca, Marisqueo e Acuicultura e das súas delegacións.
Contra esta resolución poderase formular reclamación no prazo de 10 días. Transcorrido o dito prazo, a comisión procederá a estudia-las reclamacións presentadas e elevará a proposta definitiva ó conselleiro para que resolva.
5. A resolución da convocatoria farase por orde da Consellería de Pesca, Marisqueo e Acuicultura que se publicará no Diario Oficial de Galicia, e porá fin á vía administrativa, segundo o disposto no artigo 109.c. da Lei 30/1992.
6. Se, transcorridos 10 días desde a publicación da resolución de adxudicación no Diario Oficial de Galicia, os bolseiros non formalizasen a adscrición, perderán a bolsa e procederase a cubri-las vacantes cos suplentes nomeados.
7. As solicitudes entenderanse desestimadas se nun prazo de tres meses a partir do remate do prazo de presentación de solicitudes non se dictou resolución.
Sétima.-Pagamento e efectividade.
1. Incorporado ó lugar de realización da bolsa, e logo de notificación desta polo responsable do proxecto ó que se incorpore o bolseiro, procederase ó pagamento da cantidade mensual fixada na base unha, con efecto a mes vencido.
A ausencia inxustificada, o baixo interese e rendemento, o non cumprimento das normas de réxime interno, así como a non realización dos traballos propostos, será causa de perda da bolsa.
2. a) A Dirección Xeral de Formación Pesqueira e Investigación poderá en calquera momento da realización da bolsa solicitarlle ó bolseiro un informe sobre as súas actividades.
b) Antes do pagamento da última mensualidade, o bolseiro fará entrega dun informe por escrito sobre os traballos desenvolvidos no período de formación, ó que se xuntará informe do director do proxecto. O incumprimento deste requisito dará lugar á perda desta mensualidade.
Oitava.-Renuncia á bolsa concedida.
No caso de renuncia á bolsa concedida, o bolseiro presentará a correspondente solicitude fundamentada, e poderase cubri-la vacante producida polo período de desfrute restante co candidato suplente nomeado seguindo a orde de puntuación obtida.
Novena.-Condicións da prórroga.
Transcorrido un ano e logo do informe favorable da Dirección Xeral de Formación Pesqueira e Investigación, e sempre que exista partida orzamentaria, a Consellería de Pesca, Marisqueo e Acuicultura, por solicitude do bolseiro, poderá acorda-la prórroga por un ano da bolsa que tiña concedida, nas mesmas condicións nas que se concedeu a orixinaria.
9600986
