O Real decreto 2434/1982, do 24 de xullo, sobre traspaso de funcións e servicios do Estado á Comunidade Autónoma de Galicia en materia de cultura, especifica no seu anexo I.B.3.h que aquela asume as competencias de promoción e organización de actividades de animación sociocultural no ámbito artístico, artesanal, turístico e de aire libre, dirixidas ós sectores da xuventude, infancia, terceira idade e sectores marxinados.
Neste marco competencial, o ámbito cultural e artístico no que respecta á xuventude é compartido conxuntamente polas Consellerías de Familia, Muller e Xuventude, que a través da Dirección Xeral de Xuventude desenvolve o programa fomento da actividade xuvenil, figurando entre os seus obxectivos básicos promociona-la actividade cultural e artística entre a nosa xuventude, e a Consellería de Cultura, a través da súa Dirección Xeral de Cultura, que ten, entre outras funcións, a de colaborar no desenvolvemento do teatro, a danza, artes líricas e da imaxe, así como a promoción das artes plásticas e populares, de acordo co Decreto 2/1994, do 13 de xaneiro, e o Decreto 49/1994, do 4 de febreiro, polos que, respectivamente, se establece a estructura orgánica de cada unha das ditas consellerías.
Polo exposto, a Consellería de Familia, Muller e Xuventude, consciente da importancia que ten facilitar vías polas que poida manifestarse a actividade e inquedanza artística individual e colectiva da xuventude galega, e contando coa colaboración da Consellería de Cultura, dada a natureza das actividades que se van realizar, convoca unha serie de certames, concursos e mostras que abranguen un amplo abano de manifestacións de carácter artístico e artesanal e que constitúen o programa Certames e Mostras Xuventude-96.
Por todo isto,
DISPOÑO:
Artigo 1º
A Consellería de Familia, Muller e Xuventude convoca a V Mostra Galega de Novos Creadores de Moda Xuventude-96, segundo as bases que se establecen no anexo I desta orde, onde se regulan os aspectos relativos á participación, condicións xerais que van rexer na respectiva convocatoria, inscricións, desenvolvemento, premios e xurado.
Artigo 2º
O certame obxecto da presente convocatoria desenvolverase a través das delegacións provinciais da Consellería de Familia, Muller e Xuventude coa colaboración das delegacións provinciais da Consellería de Cultura.
Artigo 3º
As actividades que implique o desenvolvemento deste certame serán custeadas con cargo á aplicación orzamentaria 14.03.355B.640.1 dos orzamentos xerais da Comunidade Autónoma de Galicia para o ano 1996.
Disposicións derradeiras
Primeira.-Facúltase o director xeral de Xuventude para dictar, no ámbito das súas competencias, as resolucións precisas para o desenvolvemento desta orde.
Segunda.-A presente orde entrará en vigor o día seguinte ó da súa publicación no Diario Oficial de Galicia.
Santiago de Compostela, 21 de febreiro de 1996.
Manuela López Besteiro
Conselleira de Familia, Muller e Xuventude
ANEXO I
V MOSTRA GALEGA DE NOVOS CREADORES DE MODA XUVENTUDE-96
I. Participantes.
Xoves deseñadores de moda galegos ou residentes en Galicia con idades comprendidas entre 16 e 30 anos, cumpridos durante o ano 1996, en grupo ou individualmente.
II. Concidicións xerais.
1. As coleccións versarán sobre primavera-verán 97.
2. As coleccións deben ser orixinais e non ter participado noutros certames ou mostras.
3. Os participantes presentarán os seus deseños en láminas de 42 x 32 cm como mínimo, con deseño de fronte e de costas.
4. Poderanse presentar un máximo de tres coleccións, que constarán cada unha de 10 a 15 modelos.
5. Cada colección levará no reverso unicamente o título desta co pseudónimo do autor.
6. Xunto coas obras deberá entregarse un sobre pechado co seudónimo no seu exterior, e no interior o boletín de inscrición que se indica no anexo III debidamente cuberto, fotocopia do DNI por ámbalas dúas caras e currículum do autor.
7. En ningún caso nos deseños pertencentes á/s colección/s presentadas deberán figurar datos que identifiquen ós deseñadores, para garanti-lo anonimato en todo momento; isto non imposibilita a descrición dos materiais e complementos da colección.
III. Inscricións.
As solicitudes deberán formularse no impreso normalizado que se indica no anexo II.
Os participantes deberán presenta-las obras xunto coa solicitude e o sobre pechado no Servicio de Xuventude da Delegación da Consellería de Familia, Muller e Xuventude correspondente á provincia na que os interesados residan habitualmente, que pode ser en:
r/ Ronda de Fingoi, s/n- 27002 Lugo.
Avda. da Habana, 81- baixo- 32004 Ourense.
r/ Durán Loriga, 9-1º- 15003 A Coruña.
r/ Benito Corbal, 47- 2º- 36001 Pontevedra.
antes do día 1 de outubro de 1996.
IV. Desenvolvemento.
O xurado seleccionará 10 participantes cunha colección de cada un deles. A selección será feita ante notario.
Os seleccionados confeccionarán catro dos modelos para o pase que se realizará na cidade de Vigo no Centro Cultural Caixa Vigo o día 22 de novembro de 1996.
V. Premios.
Establécense os seguintes premios e axudas:
Dous premios de 250.000 pesetas, ou bolsa alternativa polo mesmo importe, que poderá compatibilizarse con calquera outra axuda das que poida outorga-la Xunta de Galicia, relativa ó compo obxecto do certame.
Axudas: 100.000 pesetas por cada un dos 10 seleccionados como apoio á confección dos modelos.
Así mesmo faráselle entrega a cada un dos participantes na fase autonómica dun diploma que acredite a súa participación nesta Mostra Galega de Novos Creadores de Moda.
VI. Xurado.
O xurado será nomeado polo director xeral de Xuventude e polo director xeral de Cultura, e estará formado por persoas cualificadas no mundo da moda, recaendo a secretaría nun funcionario da Delegación Provincial de Familia, Muller e Xuventude de Pontevedra.
Contra a decisión do xurado non caberá recurso.
VII. Dereitos.
As obras, e, se é o caso, os informes dos seleccionados, quedarán en poder da Dirección Xeral de Xuventude, durante o período da actividade.
Queda implícita a autorización do autor ou autores das obras seleccionadas para a reproducción e publicación da imaxe ou contido desta por parte da Consellería de Familia, Muller e Xuventude por calquera dos medios que esta estime oportuno.
Queda implícita na inscrición e participación nesta convocatoria a aceptación do contido das bases. Calquera dúbida sobre a interpretación destas, ou calquera modificación destas, será resolta pola Dirección Xeral de Xuventude.
1758