Dentro dos programas de actividades que a Academia Galega de Seguridade ten previsto realizar no ano 1996, e conforme as funcións atribuídas pola Lei 4/1992, do 9 de abril, de creación da Academia Galega de Seguridade, anúnciase a celebración dun curso de capacitación para mandos de policía local, segundo o previsto no artigo 23 da Lei 3/1992, do 23 de marzo, de coordinación das policías locais, que deberá desenvolverse conforme as seguintes bases:
Obxectivos.
O curso ten por obxectivos dotar-los mandos da policía local nas distintas categorías dos coñecementos necesarios para o mellor desempeño da súa laboura profesional.
Destinatarios.
O curso vai dirixido ós mandos da policía local das categorías de cabo, sarxento e suboficial, que accederon a estas, tanto por oposición libre como por promoción interna, dos distintos concellos de Galicia.
Inscrición.
A inscrición dos participantes será totalmente gratuíta, e deberase comunicar esta, antes do 22 de febreiro de 1996, para efectua-la correspondente reserva de praza.
Prazas.
Sen límite.
Solicitudes.
1.-Os concellos que se atopen nesta situación deberán remitir un escrito á Academia Galega de Seguridade, no que soliciten a participación no curso, e no que figure a lista de persoas que superaron as correspondentes probas de oposición ou a fase de concurso ás categorías de cabo, sarxento e suboficial da policía local e os datos das persoas incluídas na lista referidos ás probas de oposición ou fase de concurso; para efectua-la correspondente reserva de praza para a realización do devandito curso.
2.-O prazo para a remisión de escritos rematará o día 22 de febreiro de 1996.
3.-Os escritos deberán enviarse á sede da Academia Galega de Seguridade: rúa de Madrid, 2-4 polígono das Fontiñas, 15703, Santiago de Compostela.
Contido e duración.
O curso celebrarase na sede da Academia Galega de Seguridade en sesións de mañá e tarde, de luns a venres, e nel trataranse, entre outras, as seguintes materias:
-Área xurídica
Dereito constitucional.
Dereito procesual-penal.
Dereito administrativo policial.
Dereito penal.
Dereito estatutario.
-Área humanística
Ética e función policial.
Psicoloxía do mando.
Técnicas asistenciais de urxencia.
Socioloxía.
Incendios.
-Área técnica policial.
Normativa sobre seguridade vial.
Policía científica.
Criminoloxía.
-Área xerencial.
Técnicas de dirección.
-Área operativa policial.
Tiro policial.
O curso terá unha duración de dous meses de formación teórica na sede da Academia Galega de Seguridade.
Datas.
O curso principiará o vindeiro día 4 de marzo de 1996.
O horario será de 9.30 a 20 horas.
Desenvolvemento do curso.
Os alumnos da Academia Galega de Seguridade durante o seu período de permanencia nesta rexeranse polo regulamento de réxime interior desta, publicado no DOG do 28-7-1995, nº 144.
Certificado.
Para obte-lo correspondente diploma será requisito indispensable superar tódalas materias que figuren no programa.
Modificacións.
A Academia Galega de Seguridade poderá modifica-lo desenvolvemento do curso para adaptalo ás necesidades da Administración e ás continxencias que poidan xurdir.
Santiago de Compostela, 16 de xaneiro de 1996.
Juan José Fariñas-Ferro Rodríguez
Director xeral da Academia Galega de Seguridade
693
