O Concello de Vigo, en sesión celebrada o vinteseis de outubro de mil novecentos noventa e cinco modifica parcialmente os acordos de datas 30 de xuño de 1989, 30 de setembro de 1991, 20 de xuño de 1994 e 31 de marzo de 1995, e acorda ceder ó Servicio Galego de Saúde unha parcela de 902,50 m, sita no polígono 19 do Peri do Calvario, Concello de Vigo, para a construcción dun centro de saúde.
Conforme o artigo 17.1º da Lei 3/1985, do 12 de abril do patrimonio da Comunidade Autónoma, requírese decreto do Consello da Xunta de Galicia, para a adquisición de bens a título gratuíto. Por outra banda, o artigo 23.1º da mesma lei establece que non se poderán adquirir bens ou dereitos a título lucrativo cando o valor dos gravames cargas ou afeccións impostos sobre estes supere o seu valor intrínseco, se ben non se consideran cargas, gravame ou afección os investimentos que teña que realiza-la Comunidade Autónoma para dá-lo destino de uso xeral ou servicio público da súa competencia que fixe o cedente.
En cumprimento do disposto na Lei 3/1985, do 12 de abril, do patrimonio da Comunidade Autónoma, de conformidade coa proposta do conselleiro de Sanidade e Servicios Sociais e presidente do Servicio Galego de Saúde e coas condicións estipuladas nos acordos dos plenos do concello ó comezo sinalados, logo de deliberación do Consello da Xunta de Galicia na súa reunión do día dous de decembro de mil novecentos noventa e cinco,
DISPOÑO:
Artigo 1º
1. Acéptase a cesión a título gratuíto dun inmoble, propiedade do Concello de Vigo, feita a favor do Servicio Galego de Saúde para a construcción dun centro de saúde.
2. O inmoble cedido ten unha superficie de 902,50 m e está sito no Polígono 19 do Peri do Calvario, Concello de Vigo, sendo os seus lindes os seguintes:
-O norte: zona verde.
-O sur: terreo cedido ó Insalud-ambulatorio.
-O leste: rúa Faisán.
-O oeste: vía de acceso á parte de atrás do ambulatorio e ós sotos dos edificios estremeiros á vía.
3. A parcela obxecto de cesión está inscrita no Rexistro da Propiedade, favor do Concello de Vigo,
Núm. 2, a favor do Concello de Vigo, por título de cesións por actuacións do Peri do Calvario no libro 696, folio 222, predio nº 44.235, inscrición terceira
Artigo 2º
O inmoble cédese libre de cargas e destinarase á construcción dun centro de saúde.
Artigo 3º
O Servicio Galego de Saúde a través do seu órgano competente procederá á formalización da aceptación no correspondente documento público, inscribíndose no Rexistro da Propiedade o seu nome e integrándose no seu patrimonio propio.
Disposición derradeira
O Servicio Galego de Saúde, a través do seu órgano competente levará a cabo os trámites necesarios para a efectividade de canto se dispón neste decreto.
Santiago de Compostela, dous de decembro de mil novecentos noventa e cinco.
Manuel Fraga Iribarne
Presidente
José Manuel Romay Beccaría
Conselleiro de Sanidade e Servicios Sociais e presidente do Servicio Galego de Saúde
95-07996