Visto o expediente do convenio colectivo comercio de exportación de peixe fresco do porto da Coruña, que tivo entrada nesta delegación provincial o día 20-9-1995, subscrito en representación da parte económica pola Asociación de Maioristas Exportadores de Peixe, e da parte social por Unión Xeral de Traballadores e Confederación Intersindical Galega o día 5-8-1995, e de conformidade co disposto no artigo 90.2º e 3º, da Lei 8/1980, do 10 de marzo, do Estatuto dos traballadores, Real decreto 1040/1981, do 22 de maio, sobre rexistro e depósito de convenios colectivos de traballo Real decreto 2412/1982, do 24 de xullo, sobre traspaso de funcións e servicios da Administración do Estado á Comunidade Autónoma de Galicia, en materia de traballo, esta delegación provincial,

ACORDA:

Primeiro.-Ordena-la inscrición no libro de rexistro dos convenios colectivos de traballo desta delegación provincial, e notificación á representación económica e social da comisión negociadora.

Segundo.-Ordena-lo seu depósito no Servicio de Relacións Laborais, Sección de Unidade de Mediación, Arbitraxe e Conciliación.

Terceiro.-Dispoñe-la súa publicación no Diario Oficial de Galicia e no BOP.

A Coruña, 28 de setembro de 1995.

Fernando Rodríguez Corcoba

Delegado provincial da Coruña

Convenio colectivo de exportación de peixe fresco do porto da Coruña

Artigo 1º.-Ámbito de aplicación.

Nos seus aspectos territorial, funcional e persoal, o presente convenio afecta ás empresas que teñan as súas actividades comprendidas no comercio de exportación de peixe fresco e situación no porto da Coruña. Afectará a todo o persoal que preste os seus servicios nas citadas empresas e nos seus distintos postos de traballo, así como ó de novo ingreso durante a vixencia deste convenio.

Artigo 2º.-Vixencia e duración.

O texto articulado deste convenio entrará en vigor o día 1 de xaneiro de 1995, independentemente de cando se publique no Diario Oficial de Galicia, e estará vixente, para tódolos efectos, ata o 31 de decembro de 1995

Artigo 3º.-Denuncia.

O presente convenio extinguirase o 31 de decembro de 1995, sen necesidade de denuncia previa.

Artigo 4º.-Condicións máis beneficiosas.

Tódalas condicións contidas neste convenio establécense co carácter de mínimas. Os pactos actualmente existentes en calquera empresa ou costumes máis beneficiosos sobre condicións de traballo serán respectados.

Artigo 5º.-Comisión paritaria do convenio.

Constitúese unha comisión paritaria, que cumprirá as seguintes funcións:

-Interpretación das cláusulas deste convenio.

-Aplicación do pactado e vixilancia do seu cumprimento.

-Mediación, arbitraxe e conciliación no caso de conflicto colectivo, cando se solicite a pedimento dun dos seus órganos.

-A comisión paritaria estará integrada por dous órganos, un en representación do sector social e outro en representación do sector empresa, cada un estará integrado por tres representantes pertencentes á comisión negociadora. Ambalas dúas partes poderán ser asistidas por un asesor con voz pero sen voto. Os acordos da comisión paritaria requirirán, validamente constituída, a asistencia á reunión de dous membros de cada unha das representacións.

Artigo 6º.-Horario de traballo e xornada.

A xornada de traballo fíxase en 40 horas semanais efectivas, e aboaranse como extraordinarias o exceso de horas traballadas coas recargas que se establezan neste convenio.

A devandita xornada repartirase de luns a venres, a razón de 7 horas e 12 minutos diarias en xornada continua intensiva; a xornada do sábado será de 8 da mañá a 12 da mañá.

O persoal desfrutará dun descanso de trinta minutos contable dentro da xornada laboral e no momento de menos afluencia de traballo.

O total anual de horas efectivas de traballo é de 1.826 horas, agás que por lei de rango superior se modificase o devandito cómputo.

Por acordo de cada empresa e os seus traballadores ou os seus representantes legais, poderase modifica-la xornada convida, así como no caso de que se establecese algunha modificación no horario de poxas: en tódolos casos, as modificacións acordadas consignaranse nun cadro-horario confeccionado conforme o previsto na legalidade vixente.

Artigo 7º.-Horas extraordinarias.

As horas extraordinarias prestadas polo persoal masculino e feminino serán satisfeitas cunha recarga do 80% sobre o salario tipo hora ordinaria que resulte da aplicación das retribucións fixadas no convenio.

Artigo 8º.-Premio por matrimonio.

Todo traballador que contraiga matrimonio estando de alta na empresa, fose cal fose o tempo traballado dela, percibirá un premio a cargo da mesma, consistente en vinte mil pesetas.

Artigo 9º.-Vacacións.

O descanso anual retribuído de persoal comprendido no presente convenio será de trinta días naturais a partir do primeiro ano de traballo, establecerase a data para o seu desfrute, de común acordo entre as partes (empresarios e traballadores), e confeccionarase para tal fin unha lista de vacacións que deberá estar exposta nas empresas antes do 31 de marzo, fixándose no primeiro trimestre do ano, por orde de antigüidade e orde rotativo nos sucesivos anos. No caso de non haber acordo, quince días sinalaranse polo empresario e outros quince polo traballador.

En empresas de menos de dez traballadores, a falta de acordo, non poderá haber ó mesmo tempo máis de dous traballadores de vacacións.

En empresas de 10 a 20 traballadores pode haber dous traballadores simultaneamente e así sucesivamente.

O persoal que ingrese ou cese na empresa no transcurso do ano terá dereito á parte proporcional do tempo traballado; en todo caso, respectarase o establecido no Estatuto dos traballadores.

Artigo 10º.-Día da padroa.

Establécese como día festivo non recuperable o día 16 de xullo, día da padroa, a Virxe do Carme.

Artigo 11º.-Retribucións.

Serán de aplicación as establecidas na táboa anexa. Faise constar que o plus de transporte sinalado na

táboa anexa se percibirá aínda nos supostos de enfermidade ou accidente de traballo.

Artigo 12º.-Xornada nocturna.

Tódalas horas de traballo que se realicen en períodos nocturnos pola afluencia de pesca , aboaranse coa recarga do 100% sobre o salario tipo fixado no presente convenio, tanto ó persoal masculino como ó feminino, coas limitacións que para este convenio prevé a propia lei. Enténdese por xornada nocturna a partir das 21 horas.

Artigo 13º.-Antigüidade.

O dereito por antigüidade consistirá en trienios, serán fixados na contía do 4% do salario deste convenio, sen limitacións no número deles, satisfaranse durante o tempo de vinculación á empresa.

O cómputo da antigüidade ó persoal dará comezo desde a data de ingreso na empresa, sexa cal sexa a categoría profesional que ostente.

Artigo 14º.-Gratificacións extraordinarias.

Cada unha das gratificacións do 25 de xullo e Nadal, consistirá nunha mensualidade dos salarios que se establecen neste convenio, a razón de salario base, plus de transporte e antigüidade. Estas gratificacións terán que ser aboadas o día 25 de xullo e a de decembro non máis tarde do día 22 do devandito mes.

Artigo 15º.-Gratificación extraordinaria de beneficios.

No mes de marzo aboarase unha paga denominada de beneficios, e a súa contía será de trinta días de salarios percibidos no ano natural anterior, a razón de salario base, plus de transporte e antigüidade, computándose como tal o correspondente a enfermidade xustificada, permisos retribuídos e baixas por accidente de traballo. No caso de non pemaneceren na empresa durante todo o ano natural anterior, o seu importe reducirase, e será proporcional ó tempo traballado nela.

Artigo 16º.-Licencias con soldo.

Todo traballador ten dereito ás seguintes licencias retribuídas:

A. Por matrimonio: 16 días hábiles.

B. Por falecemento ou enfermidade grave do cónxuxe, ascendentes ou descendentes: 7 días hábiles.

Enténdese como tales os consanguíneos ou por afinidade políticos. En caso de irmáns: 5 días hábiles.

C. Establécese unha licencia retribuída de 2 días en caso de enfermidade ou morte dos avós, fillos políticos, irmáns políticos ou tíos.

D. Por parto da esposa: 7 días naturais.

Artigo 17º.-Incorporación ó servicio militar.

Durante o tempo que o traballador permaneza incorporado ó servicio militar reservaráselle a praza que viña desenvolvendo ata dous meses despois do seu licenciamento, e computarase o tempo da devandita situación para efectos de antigüidade, co aboamento

durante a súa permanencia en filas, das pagas extraordinarias que se estipulen neste convenio.

Artigo 18º.-Persoal afectado.

Todo o persoal afectado por este convenio non poderá prestar máis servicios dentro do porto pesqueiro cós debidos á empresa para a que traballa, e a negativa do traballador a prestar servicios en empresa distinta á súa non será considerada como desobediencia para os efectos das causas de despedimento sinaladas na lei. Así mesmo; ningún traballador poderá prestar servicios a outras empresas do sector distintas ás súas. O incumprimento destas normas dará lugar a causa de despedimento disciplinario, de acordo co establecido na lexislación vixente.

Artigo 19º.-Seguridade no traballo.

Toda empresa está obrigada a dota-lo seu persoal de roupa de traballo adecuada ó medio ambiente e dadas as especiais circunstancias dos cometidos e funcións que realizan. Para estes efectos, facilitarase por parte da empresa a roupa necesaria de acordo coas peculiaridades de cada posto de traballo.

Artigo 20º.-Anticipos reintegrables.

As empresas virán obrigadas a anticipar a todos aqueles traballadores que conten cunha antigüidade mínima de seis meses dentro dela, e así o soliciten, o importe de unha mensualidade de retribución, adianto este que será reintegrado polo traballador de forma fraccionada ou de entregas parciais, por períodos mensuais, quincenais ou semanais, segundo lle conveña ó traballadore, non devengará xuro de tipo ningún este aprazamento no pagamento.

A empresa non estará obrigada a aboa-lo devandito adianto cando as peticións superen o 50% do cadro de persoal da empresa.

De tódolos xeitos, no caso de cesar na empresa o traballador, a suma que puidese ter pendente de saldar seralle descontada da liquidación do saldo que puidese corresponderlle, e de non asistirlle tal dereito virá obrigado a reintegrala de xeito inmediato.

Artigo 21º.-Realización de tódalas manipulacións.

Os aprendices, empacadores, oficiais empacadores, encargados ou compradores realizarán tódalas operacións de manipulación, enténdese por tales as de arrastre de caixas, carga e descarga, preparación e demais relacionadas co tratamento do peixe, coas limitacións que establece o Decreto do 26 de xullo de 1957.

Artigo 22º.-Traballo o axuste.

O traballador o axuste será aboado na contía que mutuamente acorden as empresas e os traballadores, pero en todo caso as tarifas terán que representa-lo mínimo das retribucións fixadas na táboa salarial, incrementada no 45% dela.

Artigo 23º.-Traballo de categoría superior.

O traballador que realice labores de categoría superior á que teña asignada percibirá o salario correspondente a aquela durante o tempo que dure a devan

dita situación, pero se se prolongase máis de catro meses, automaticamente adquirirá a categoría que realmente lle corresponde.

A categoría profesional de oficial empacador adquirirase de modo automático ós sete anos de servicio na empresa.

Artigo 24º.-Asemblea sindical da empresa.

Recoñéceselle-lo dereito de reunión dentro da empresa ós traballadores afectadós polo presente convenio, fóra da xornada laboral ou inmediatamente ó rematar esta.

Os traballadores non poderán ser despedidos ou sancionados por estaren afiliados a un sindicato.

Nos casos nos que o traballador sexa representante sindical ou do comité de empresa, recibirá as licencias necesarias para o normal desenvolvemento da súa actividade sindical de acordo coa lexislación vixente. En todo caso, a empresa terá dereito a pedir xustificante das licencias concedidas.

Artigo 25º.-Enfermidade ou accidente.

Tódolos traballadores suxeitos ó presente convenio que se atopen en situación de baixa por enfermidade ou accidente percibirán, con cargo á empresa, a compensación económica necesaria co fin de percibi-lo 100% do seu salario real durante un máximo de doce meses.

Así mesmo, os períodos de enfermidade ou accidente non se terán en conta para deducir dos períodos de vacacións.

Artigo 26º.-Táboa de salarios.

A partir do 1 de xaneiro de 1995 respectaranse como mínimo, os salarios que figuran no anexo deste convenio, que supoñen un incremento do 4% sobre as táboas salariais do convenio do ano anterior, e o plus de transporte quedará fixado en 7.400 ptas. por mes, para tódalas categorías, que se farán efectivas desde o 1 de xaneiro de 1995.

Artigo 27º.-Premio de xubilación anticipada e voluntaria.

As empresas aboaranlles un complemento de xubilación a aqueles traballadores con 10 anos de antigüidade, como mínimo, na empresa que se xubilen de mutuo acordo con esta. A súa contía será a seguinte:

Xubilación voluntaria ós 60 anos: 450.000 ptas.

Xubilación voluntaria ós 61 anos: 350.000 ptas.

Xubilación voluntaria ós 62 anos: 300.000 ptas.

Xubilación voluntaria ós 63 anos: 250.000 ptas.

Xubilación voluntaria ós 64 anos: 200.000 ptas.

Unha vez fixada a contía do premio, a empresa poderá fracciona-lo pagamento ó longo dun máximo de 12 meses.

Para a súa percepción haberá de solicitarse no prazo de tres meses desde o cumprimento da idade correspondente. Se cumprindo os 64 anos de idade e seis meses máis, o traballador non solicitase a xubi

lación, perderá o dereito a este complemento. Este artigo quedará en suspenso no caso de que, por disposición de rango superior, se reducise a idade de xubilación.

Artigo 28º.-Revisión salarial.

Acórdase unha revisión salarial sobre as táboas deste convenio se o índice de prezos ó consumo (IPC) para o ano 1994, establecido polo INE, excedese do 4% e na contía do exceso.

Artigo 29º.-Seguro de invalidez e morte.

As empresas contratarán un seguro de invalidez colectivo permanente total ou morte por accidente durante as 24 horas do día, domingos e festivos, para todo o persoal afectado por este convenio, coas seguintes indemnizacións:

-Por morte: 2.750.000 ptas.

-Por invalidez permanente total ou absoluta: 3.250.000 ptas.

Esta póliza entrará en vigor o mesmo día da sinatura do convenio.

Artigo 30º.-Cláusula de desvinculación salarial.

Os compromisos en materia salarial contidos no presente convenio non serán de aplicación para aquelas empresas que acrediten descensos, en termos reais, da facturación ou dos resultados nos dous últimos exercicios.

Para as empresas que pretendan acollerse á cláusula regulamentada no presente artigo establécense os seguintes mecanismos:

1. Comisión paritaria.

2. Representación dos traballadores.

3. AGA.

A tódolos mecanismos nomeados anteriormente achegaráselle-la seguinte documentación:

-Acreditación por medio da contabilidade oficial dos resultados dos dous últimos exercicios nos que se demostre que durante deles se produciron perdas reais.

-Proxecto de viabilidade para o período que se pretende a aplicación da devandita cláusula de exención e a xustificación económica e a súa repercusión real no melloramento global dos resultados da empresa.

Na súa aplicación poderanse pactar reduccións sobre ás porcentaxes de incrementos negociados ou a súa total inaplicación polo período que se determine. Neste último caso aplicaranse os aspectos económicos nos mesmos termos que figuran no convenio anteriormente vixente.

Os representantes legais dos traballadores, membros da comisión paritaria, así como os seus asesores, están obrigados a tratar e manter na maior reserva a información recibida e os datos ós que tivesen acceso como consecuencia do establecido nos parágrafos anteriores, observando, por conseguinte, respecto de todo iso, sixilo profesional.

Disposición final

As diferencias salariais que se produzan desde o 1 de xaneiro de 1995 terán que facerse efectivas nun prazo non superior a trinta días desde a publicación e conseguinte posta en vigor do convenio.

Convenio colectivo comercio de exportación de peixe fresco do porto da Coruña

Táboas salariais

Categoría profesional	Revisión IPC 1994 0,8%	Salario base	Plus transporte	Total mensual	Total anual

Grupo primeiro
-Persoal técnico titulado
Titulado grao superior	95.763	99.594	7.400	106.994	1.604.910
Titulado grao medio	84.098	87.462	7.400	94.862	1.422.930
Grupo segundo
-Persoal mercantil non titulado
Encargado establecemento	84.098	87.462	7.400	94.862	1.422.930
Oficial empacador	77.019	80.100	7.400	87.500	1.312.500
Empacador/a	74.113	77.078	7.400	84.478	1.267.170
Aprendiz de empacador	63.685	66.232	7.400	73.632	1.104.480
Comprador	84.098	87.462	7.400	94.862	1.422.930
Conductor	74.113	77.078	7.400	84.478	1.267.170
Grupo terceiro
-Persoal administrativo
Oficial administrativo	74.113	77.078	7.400	84.478	1.267.170
Contable	74.113	77.078	7.400	84.478	1.267.170
Auxiliar administrativo	70.251	73.061	7.400	80.461	1.206.915
Aspirante	63.685	66.232	7.400	73.632	1.104.480

7203