Dentro das actividades da Escola Galega de Administración Pública para 1995, figura a realización dun seminario internacional sobre avaliación do rendemento.
Obxecto.
Os días 28 e 29 de setembro de 1995 terá lugar, no salón de actos da Escola Galega de Administración Pública, un seminario internacional sobre avaliación do rendemento.
O obxectivo deste seminario é proporcionarlle ós empregados públicos galegos unha panorámica da avaliación do rendemento no contexto dos procesos de modernización das administracións públicas que se están levando a cabo nos países do noso contorno cultural, que permita abordar con maiores elementos de xuízo os resultados das experiencias piloto levadas a cabo pola Xunta de Galicia.
Contido.
Trataranse, entre outras, as seguintes cuestións:
-A avaliación do rendemento e a xestión dos servicios públicos.
-A avaliación: un compoñente necesario na modernización do Estado.
-Mellora da eficacia organizativa.
-A avaliación do rendemento na Administración pública, a experiencia portuguesa.
-Medición e avaliación dos servicios de unidades da Administración pública.
-A avaliación do rendemento na Xunta de Galicia.
3. Destinatarios.
Persoal funcionario dos grupos A e B de calquera das Administracións públicas galegas, e interesados en xeral.
Desenvolvemento e duración.
O seminario abrirase o xoves, día 28 de setembro, ás 10 horas, e rematará na mañá do venres, día 29 de setembro.
Inscrición.
-Prazo: remata o luns, día 25 de setembro de 1995.
-Lugar de presentación: no rexistro xeral da EGAP (Polígono das Fontiñas, rúa de Madrid, 2-4, 15703, Santiago de Compostela). Tfno. 57 08 00. Telefax nº 57 15 40.
-Forma: as solicitudes de inscrición faranse por escrito, no modelo oficial que figura ó final destas bases. Serán rexeitadas todas aquelas peticións que non reúnan o dito requisito.
As peticións de admisión poderanse enviar por correo ordinario ou por telefax ó número consignado.
-Inscrición fóra de prazo: só se admitirán de quedaren prazas baleiras, coa condición de que se cumpran os requisitos xerais antes indicados.
A partir do 26 de setembro, os peticionarios poderán obter confirmación da súa posible admisión, chamando por teléfono en días laborables, das 11.30 ás 14.45 horas, ó seguinte número: (981) 57 08 00 (ext. 229), ou ben consultando a lista de admitidos que se expoñerá no taboleiro de anuncios da EGAP 24 horas despois do remate do prazo de presentación de solicitudes.
Certificación de asistencia.
Entregaráselles ó remate deste seminario a aqueles asistentes que concorresen asiduamente ó mesmo, e expresarase neste documento a natureza da actividade e as datas da súa realización.
Santiago de Compostela, 28 de xullo de 1995.
Jaime Rodríguez-Arana Muñoz
Director da Escola Galega de Administración Pública
5898