Dentro dos programas de actividades que a Academia Galega de Seguridade ten previsto realizar no ano 1995, e conforme as funcións atribuídas pola Lei 4/1992, do 9 de abril, de creación da Academia Galega de Seguridade, anúnciase a celebración dunhas xornadas sobre comunicación e imaxe policial, que deberán desenvolverse conforme as seguintes bases:
Obxectivos.
As xornadas teñen por obxectivo coñecer:
a) Os aspectos fundamentais da interrelación humana.
b) A importancia da comunicación persoal na actividade policial.
c) Os elementos fundamentais da comunicación.
d) A importancia da imaxe policial para os cidadáns.
e) As técnicas básicas da comunicación.
f) As estratexias que favorecen o proceso da comunicación.
Destinatarios.
As xornadas van dirixidas ós membros dos corpos da policía local e unidade do C.N.P. adscrita á Comunidade Autónoma de Galicia da provincia de Lugo.
Inscrición.
A inscrición dos participantes será totalmente gratuíta.
Prazas.
O número de prazas que se ofertan nestas xornadas é de 75.
Solicitudes.
1. O persoal que desexe participar nestas xornadas deberá presentar, cuberta a máquina ou con letra moi clara, a instancia que figura no anexo, acompañada dunha fotocopia do DNI e do carné profesional.
2. O prazo para a presentación de instancias rematará o día 15 de maio de 1995.
3. As instancias deberán enviarse á sede de Academia Galega de Seguridade, rúa de Madrid, s/n, polígono das Fontiñas, 15703 Santiago de Compostela, ou ben poden entregarse en calquera dos lugares previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.
Contido e duración.
As xornadas celebraranse en sesións de mañá e tarde, durante os días 23 e 24 de maio de 1995, e nelas trataranse, entre outros, os seguintes temas:
a) A comunicación interpersoal.
b) Elementos da comunicación.
c) Técnicas básicas da comunicación.
d) O cidadán: as súas expectativas.
e) Calidade do servicio que presta a policía local.
f) Bases para unha comunicación eficaz.
g) Comportamento policial. Ética profesional e función policial.
h) A imaxe policial.
i) O policía diante da sociedade.
Datas.
As xornadas celebraranse durante os días 23 e 24 de maio de 1995.
O horario será de 9.30 a 20 horas.
Relación de admitidos.
A relación de admitidos publicarase o día 18 de maio de 1995 no taboleiro de anuncios da Academia Galega de Seguridade, ou ben poden confirma-la súa asistencia chamando ó teléfono (981) 56 34 00.
Lugar.
As xornadas celebrarase nos locais da policía local de Lugo.
Certificado de participación e aproveitamento.
Ó remate das xornadas entregaráselles un certificado de participación e aproveitamento a aquelas persoas que acrediten a súa participación continuada ás mesmas; non podendo supera-las faltas de asistencia un 15% do total da duración de horas lectivos do curso; unha inasistencia superior ó 15%, aínda que sexa xustificada, e a non superación das correspondentes probas de coñecementos, impedirá a expedición do certificado.
Modificacións.
A Academia Galega de Seguridade poderá modifica-lo desenvolvemento das xornadas para adaptalas ás necesidades da Administración e ás continxencias que poidan xurdir.
Santiago de Compostela, 24 de abril de 1995.
Juan José Fariñas-Ferro Rodríguez
Director xeral da Academia Galega de Seguridade