Visto o expediente de recoñecemento de interese galego e a inscrición no Rexistro de Fundacións de Interese Galego da Fundación Raquel Chaves.

Supostos de feito:

Primeiro.-O 24 de xuño de 1994 solicitouse o recoñecemento de interese galego e a inscrición no Rexistro de Fundacións de Interese Galego da Fundación Raquel Chaves en escrito presentado por Antonio Manuel Chaves Cuíñas en calidade de presidente da fundación.

Segundo.-A fundación constituíuse en escritura pública, outorgada en Vigo o día 5 de marzo de 1995 perante o notario Alejo Calatayud Sempere co número tres mil cincocentos sesenta e seis do seu protocolo, por Antonio Manuel Chaves Cuíñas, María Paz Fernández Fernández intervindo debidamente acreditados en nome propio e en representación de Adrián Chaves Fernández e Andrés Chaves Fernández.

Terceiro.-A comisión integrada polos secretarios xerais de tódalas consellerías elevou ó conselleiro da Presidencia e Administración Pública a proposta de clasificación como benéfico-cultural privada da Fundación Raquel Chaves, dado o seu obxecto e finalidade, polo que, cumpríndose os requisitos esixidos na Lei 7/1983, do 22 de xuño, e na Lei 11/1991, do 8 de novembro, de reforma da lei anterior, de réxime das fundacións de interese galego, e segundo establece o artigo 32.1º e 2º do Decreto 248/1992, do 18 de xuño, polo que se aproba o Regulamento de organización e funcionamento do protectorado das fundacións de interese galego, correspóndelle a execución das facultades inherentes a aquel á Consellería de Cultura.

Cuarto.-Á vista da proposta da comisión de secretarios xerais técnicos pola orde da Consellería da Presidencia e Administración Pública, do 2 de marzo de 1995 (DOG do 13 de marzo) clasificouse como benéfico-cultural privada a Fundación Raquel Chaves, tendo en conta o disposto no artigo 32.3º a) do Regulamento de organización e funcionamento do protectorado das fundacións de interese galego.

Quinto.-Segundo consta no artigo 5 dos seus estatutos, o obxecto da fundación é entre outros a preservación dos xoguetes e xogos antigos e de colección como bens de interese cultural e pedagóxico. Favorece-la investigación e a súa recuperación, promover e colaborar na constitución de ludotecas participando na xestión, dirección, deseño e coordinación: Fomenta-lo estudio e divulgación desde unha perspectiva cultural e pedagóxica ademais da propiamente lúdica, etc.

Sexto.-Na escritura pública pola que se constitue a fundacións nos estatutos e na restante documentación que figura no expediente constan, entre outros, os seguintes puntos:

Acreditación da personalidade dos fundadores, dotación inicial da fundación, estatutos nos que consta a denominación da fundación corno Fundación Raquel Chaves, capacidade xurídica, domicilio e obxecto.

O padroado da fundación está integrado polos seguintes membros:

Presidente: Antonio Manuel Chaves Cuiñas.

Secretaria: María Paz Fernández Fernández.

Vocais:

Adrián Chaves Fernández.

Andrés Chaves Fernández.

Fundamentos de dereito:

Primeiro.-O artigo 34 da Constitución española recoñece o dereito de fundación para fins de interese xeral, de acordo coa lei. O artigo 27.26º do Estatuto de autonomía para Galicia atribúelle a esta comunidade competencia exclusiva sobre o réxime das fundacións de interese galego.

Segundo.-Conforme o artigo 32.3º a) do Regulamento de organización e funcionamento do protectorado das fundacións de interese galego, así como o artigo 1 do Decreto 12/1990, é competencia desta consellería a declaración de interese galego e inscrición no Rexistro de Fundacións de Interese Galego da Fundación Raquel Chaves, dado o seu obxecto, coincidente coas competencias desenvolvidas pola Consellería de Cultura, asumindo as funcións que en canto a protectorado lle corresponden á Xunta de Galicia.

Terceiro.-Ó amparo do disposto no artigo 7.5º da Lei 7/1983, do 22 de xuño, á realización da finalidade fundacional débese destinar, cando menos, o oitenta por cento das rendas que obteña a fundación e dos outros ingresos que non formen parte da dotación da fundación.

Cuarto.-A Lei 11/1991, do 8 de novembro, dá nova redacción ó artigo 21.2º da Lei 7/1983, establecendo a obriga de, por unha banda, formular e presenta-lo orzamento de ingresos e gastos ó protectorado con anterioridade ó inicio do exercicio económico e, por outra, a de efectuar un inventario-balance, pechado na data da finalización do exercicio, unha memoria das actividades realizadas ó longo do ano e de xestión económica do patrimonio, así como a liquidación do orzamento de ingresos e gastos do ano anterior, que deberán presentarse ó protectorado no prazo de seis meses desde a data do peche do exercicio.

Este conxunto de obrigas débense entender asumidas pola fundación, aínda que non se recollan expresamente nos seus estatutos.

Quinto.-Á vista do exposto pódense entender substancialmente cumpridos os requisitos legais e regulamentarios para a declaración de interese galego e a sua inserción no Rexistro de Fundacións da Sección de Fundacións da Consellería de Cultura segundo se desprende dos artigos 5, 6, 7, 8, 11.1º e 18 da Lei 7/1983, en relación cos artigos 2, 3, 4, 5 e 33 do Decreto 248/1992. Por todo isto,

DISPOÑO:

Primeiro.-Recoñecer e declarar de interese galego a Fundación Raquel Chaves.

Segundo.-Ordena-la súa inscrición no Rexistro de Fundacións de Interese Galego, sección da Consellería de Cultura.

Terceiro.-Aproba-los seus estatutos e a formación do seu órgano de goberno.

Cuarto.-A dita fundación queda sometida ó disposto no resto da normativa de xeral aplicación, en especial á obriga de da-la publicidade suficiente ás súas actividades e á ausencia de ánimo de lucro na prestación dos seus servicios, quedando obrigada a rende-las contas anualmente ó protectorado e a xustificar, a través dunha memoria anual, o cumprimento das cargas fundacionais, así como a presenta-lo proxecto de orzamento antes do último mes do exercicio económico anterior a aquel para o que se formula, debendo solicita-las preceptivas autorizacións do protectorado cando sexan necesarias.

Santiago de Compostela, 20 de marzo de 1995.

Víctor Manuel Vázquez Portomeñe

Conselleiro de Cultura