Dentro dos programas de actividades que a Academia Galega de Seguridade ten previsto realizar no ano 1995, conforme as funcións atribuídas pola Lei 4/1992, do 9 de abril, de creación da Academia Galega de Seguridade, anúnciase a celebración dun curso sobre dirección e xestión de recursos, que deberá desenvolverse conforme as seguintes bases:

Obxectivos.

O curso ten por obxectivo principal dota-los mandos de policía local duns coñecementos e técnicas de organización e comunicación que lles permitan unha maior e mellor comunicación cos demais membros do seu cadro de persoal.

Destinatarios.

O curso vai dirixido ós mandos que exerzan funcións de xefatura de cadro de persoal dos corpos da policía local de Galicia.

Inscrición.

A inscrición dos participantes será totalmente gratuíta.

Prazas.

O número de prazas que se ofertarán por curso será de 50.

Solicitudes.

1. O persoal que desexe participar neste curso deberá presentar, cuberta a máquina ou con letra moi clara, a instancia que figura no anexo, acompañada dunha fotocopia do DNI e do carné profesional.

2. O prazo para a presentación de instancias rematará o día 19 de maio de 1995.

3. As instancias deberán enviarse á sede da Academia Galega de Seguridade: rúa de Madrid, s/n, polígono das Fontiñas, 15703 Santiago de Compostela.

Contido e duración.

O curso celebrarase en sesións de tarde, de luns a venres, e nel tratarase, entre outros, os seguintes temas:

a)Xestión de recursos humanos. Selección e formación de persoal.

b) O proceso selectivo.

c) A formación profesional.

d) Aspectos psicolóxicos da decisión.

e) Aspectos psicolóxicos da dirección. Selección de tarefas. A relación mando-subordinado.

f) Planificación de cadros de persoal.

g) Sistemas para a recollida de datos.

Datas.

O curso celebrarase do 29 de maio ó 2 de xuño de 1995.

O horario será de 16 a 20 horas.

Relación de admitidos.

A relación de admitidos publicarase o día 23 de maio de 1995 no taboleiro de anuncios da Academia Galega de Seguridade, ou ben poden confirma-la súa asistencia chamando ó teléfono (981) 56 34 00.

Lugar.

O curso desenvolverase na sede da Academia Galega de Seguridade.

Certificado de participación e aproveitamento.

Ó remate do curso entregaráselle un certificado de asistencia e aproveitamento a aqueles persoas que acrediten a súa participación continuada ó mesmo, non podendo supera-las faltas de asistencia un 15% do total da duración de horas lectivas do curso; unha inasistencia superior ó 15%, aínda que sexa xustificada, e a non superación das correspondentes probas de coñecementos, impedirá a expedición do certificado.

Modificacións.

A Academia Galega de Seguridade poderá modifica-lo desenvolvemento do curso para adaptalo ás necesidades da Administración e ás continxencias que poidan xurdir.

Santiago de Compostela, 28 de marzo de 1995.

Juan José Fariñas-Ferro Rodríguez

Director xeral da Academia Galega de Seguridade

CONSELLERÍA DE POLÍTICA TERRITORIAL, OBRAS PÚBLICAS

E VIVENDA