Pola Orde do 30 de marzo de 1987 (DOG nº 82, do 11 de maio de 1987) creouse a Comisión Asesora sobre Diabete en Galicia establecéndose a súa composición e funcións.
A Consellería de Sanidade e Servicios Sociais plasmou, no seu Plan de Saúde, a necesidade de pór en marcha un programa sobre diabete, que permita acada-los obxectivos dispostos nel: retarda-la aparición de complicacións, aumenta-la supervivencia e mellora-la calidade de vida dos diabéticos.
Neste contexto, é preciso reactiva-las actividades da Comisión Asesora sobre Diabete en Galicia, así como modifica-la súa composición e funcións, en prol de mellora-la súa capacidade de planificación e xestión e favorece-la coordinación entre a Dirección Xeral de Saúde Pública e os expertos e asociacións científicas e de usuarios que, nestes momentos están a traballar en diabete na nosa Comunidade.
En consecuencia, en uso das facultades que me confiren os artigos 34.6 e 38 da Lei 1/1983, do 22 de febreiro, reguladora da Xunta e do seu presidente, reformada pola Lei 11/1988, do 22 de outubro,
DISPOÑO
Artigo 1º
Modifícase a composición e as funcións da Comisión Asesora sobre Diabete en Galicia de acordo co establecido nos artigos seguintes.
Artigo 2º
Son funcións da Comisión Asesora sobre Diabete en Galicia:
a) Estudiar e avalia-los resultados obtidos nos proxectos e actividades desenvolvidas na Comunidade Autónoma acadando, para iso, a información dispoñible.
b) Potenciar e asesora-los estudios epidemiolóxicos que permitan coñece-la incidencia e prevalencia da diabete en Galicia.
c) Elabora-lo Programa Galego de Prevención e Control da Diabete a partir das propostas presentadas ou elaboradas no seo da comisión.
d) Desenvolver e coordina-las accións que, no marco do Programa Galego de Prevención e Control da Diabete, se determinen.
Artigo 3º
A Comisión Asesora sobre Diabete en Galicia comporase dos seguintes membros:
Presidente:
O director xeral de Saúde Pública do Servicio Galego de Saúde ou persoa en quen delegue.
Vocais:
-Un representante da Dirección Xeral de Organización Sanitaria da Consellería de Sanidade e Servicios Sociais.
-Un representante da Dirección Xeral de Asistencia Sanitaria do Servicio Galego de Saúde.
-Un representante da Sociedade Galega de Endocrinoloxía e Nutrición.
-Un representante do Instituto Galego de Oftalmoloxía.
-Un representante da Federación Galega de Educadores en Diabete.
-Dous representantes das asociacións de diabéticos existentes na Comunidade Autónoma de Galicia.
-Un experto no tema da Atención Primaria de Saúde nomeado polo director xeral de Asistencia Sanitaria.
-Un ATS ou ATS-DUE experto no tema da diabete nomeado polo director xeral de Asistencia Sanitaria.
-Un experto no tema da diabete nomeado polo director xeral de Saúde Pública.
-Un representante da Dirección Xeral de Saúde Pública, nomeado polo director xeral, que actuará como secretario.
Disposición derrogatoria
Quedan derrogados os artigos 2º e 3º da Orde do 30 de maio de 1987, pola que se crea a Comisión Asesora sobre Diabete en Galicia.
Disposición derradeira
Facúltase o director xeral de Saúde Pública para o desenvolvemento e execución do establecido nesta orde.
Santiago de Compostela, 14 de febreiro de 1995.
José Manuel Romay Beccaría
Conselleiro de Sanidade e Servicios Sociais