O Estatuto de autonomía de Galicia, no seu artigo 33, atribúelle á Comunidade Autónoma de Galicia competencias para o desenvolvemento lexislativo e a execución da lexislación básica do Estado en materia de sanidade interior, podendo organizar e administrar para tal fin e dentro do seu territorio, tódolos servicios relacionados coas materias expresadas.
A Lei 1/1989, do 2 de xaneiro, do Servicio Galego de Saúde, establece no seu artigo 1 que a súa finalidade, baixo a dirección e control da Consellería de Sanidade, consiste na xestión dos servicios sanitarios de carácter público dependentes da Comunidade Autónoma de Galicia e a coordinación integral de tódolos recursos sanitarios e asistenciais existentes no seu territorio.
O Decreto 199/1994, do 16 de xuño, polo que se establecía a estructura orgánica do Sergas supuxo unha nova configuración del debido ó establecemento dun novo cadro de relacións coa Consellería de Sanidade e Servicios Sociais que viña potencia-lo seu carácter de prestador de servicios sanitarios.
Dado o exposto e as funcións que neste novo marco estructural se lle atribúen á Secretaría Xeral do organismo, é preciso reforzar esta cos medios para o mellor desenvolvemento da tarefa de avaliación e seguimento dos obxectivos e accións das distintas unidades do organismo así como do control dos resultados.
Consecuentemente é preciso reforma-lo Decreto 199/1994, do 16 de xullo, polo que se establece a estructura orgánica do Servicio Galego de Saúde.
Na súa virtude, por proposta do conselleiro de Sanidade e Servicios Sociais, logo de informe das consellerías da Presidencia e Administración Pública e de Economía e Facenda, e logo de deliberación do Consello da Xunta de Galicia na súa reunión do día vintecatro de febreiro de mil novecentos noventa e cinco,
DISPOÑO:
Artigo único.-No artigo 5 do Decreto 199/1994, do 16 de xullo, polo que se establece a estructura orgánica do Servicio Galego de Saúde, engádese un novo apartado co seguinte texto:
5.2. Servicio de Avaliación.
Correspóndenlle as seguintes funcións:
-O seguimento e avaliación do cumprimento dos obxectivos e accións das distintas unidades do organismo, así como do control dos resultados.
-A elaboración da memoria anual do organismo os demais informes e estudios de carácter xeral.
Disposicións derradeiras
Primeira.-A modificación que na estructura orgánica se produce polo presente decreto non suporá aumento de gasto.
Segunda.-Facúltase o conselleiro de Sanidade e Servicios Sociais para dictar cantas disposicións sexan necesarias para o desenvolvemento deste decreto.
Terceiro.-O presente decreto entrará en vigor o día seguinte ó da súa publicación no Diario Oficial de Galicia.
Santiago de Compostela, vintecatro de febreiro de mil novcentos noventa e cinco.
Manuel Fraga Iribarne
Presidente
José M. Romay Beccaría
Conselleiro de Sanidade e Servicios Sociais
e presidente do Servicio Galego de Saúde