A Constitución española sinala no seu artigo 30.2 que a lei regulará, coas debidas garantías, a obxección de conciencia, así como as demais causas de exención do servicio militar obrigatorio, podendo impoñer, se é o caso, unha prestación social substitutoria. Este dereito dos cidadáns, que vén especialmente protexido pola vía do artigo 53.2 da propia Constitución, desenvólvese na Lei 48/1991, do 26 de decembro, reguladora da obxección de conciencia e da prestación social substitutoria. O artigo 7 desta lei establece que a dita prestación social substitutoria se realizará preferentemente en entidades dependentes das administracións públicas, aínda que tamén se poderá levar a cabo en entidades privadas que reúnan certas condicións.
A Xunta de Galicia, que é competente segundo o Estatuto de autonomía nas materias en que se desenvolvan os programas de prestación social substitutoria coa única excepción dos programas de cooperación internacional, quere dar resposta á demanda social, especialmente no que atinxe ós mozos galegos que obxectaron ou queiran facelo e estean interesados en realiza-la prestación social en Galicia.
Conseguintemente, a presente disposición ten por obxecto establecer unha mínima estructura da Administración autonómica na materia, de tal xeito que, respectando as competencias que a Constitución lle outorga á Administración do Estado en relación coa obxeción de conciencia, se poida consegui-la debida colaboración entre ámbalas administracións e destas coa Administración local, tal e como vén sostendo a xurisprudencia do Tribunal Constitucional.
Xa que logo e por proposta do conselleiro de Xustiza, Interior e Relacións Laborais, e logo de deliberación do Consello da Xunta de Galicia na súa reunión do día tres de febreiro de mil novecentos noventa e cinco,
DISPOÑO:
Artigo 1
1.-Créase a Comisión Galega de Obxección de Conciencia, adscita á Consellería de Xustiza, Interior e Relacións Laborais.
2.-A Comisión Galega de Obxección de Conciencia realizará a avaliación e seguimento da prestación social substitutoria no ámbito territorial da Comunidade Autónoma de Galicia.
Artigo 2
Son funcións da comisión:
a) Propoñerlle á Administración xeral do Estado as actividades e programas que sexan de interese preferente dentro de Galicia, para os efectos de que aquela determine os sectores en que prioritariamente deba desenvolverse a prestación social substitutoria.
b) Elabora-lo proxecto de concerto da Xunta de Galicia como entidade colaboradora, así como realiza-lo seu seguimento unha vez subscrito este.
c) Exame e aprobación, para a súa posterior remisión á Administración xeral do Estado, dos proxectos e programas que realicen as entidades públicas ou privadas que, tendo o seu ámbito de actuación no territorio de Galicia, pretendan recibir obxectores como colaboradores sociais para realiza-la prestación social substitutoria.
d) Cooperar coa Administración local e coas entidades colaboradoras en materia de prestación social substitutoria.
e) Impulsa-la información e asesoramento ós mozos sobre a forma de exerce-lo dereito á obxección de conciencia e sobre a realización da prestación social substitutoria.
f) Aquelas outras que lle poidan asignar en relación co obxecto do presente decreto.
Artigo 3
A comisión estará composta polos seguintes membros:
a) Presidente: o conselleiro de Xustiza, Interior e Relacións Laborais.
b) Vicepresidente: o director xeral de Xustiza e Interior.
c) Vocais:
-O secretario xeral para a Protección Civil e o Medio Ambiente.
-Un representante das seguintes consellerías da Xunta de Galicia, con rango de director xeral:
* Política Territorial, Obras Públicas e Vivenda.
* Educación e Ordenación Universitaria.
* Agricultura, Gandería e Montes.
* Cultura.
* Sanidade e Servicios sociais.
* Familia, Muller e Xviventude.
-Un representante da Federación Galega de Concellos e Provincias.
-Un representante da Federación de Concellos Galegos.
-Un representante das universidades galegas, elixido por elas conforme as súas propias normas.
-Un representante do Consello Galego da Xuventude.
-Un representante da organización de obxectores de conciencia con maior implantación en Galicia.
d) Secretario: actuará como tal, con voz pero sen voto, o xefe do Servicio de Obxección de Conciencia da Consellería de Xustiza, Interior e Relacións Laborais.
2.-Os membros da comisión serán nomeados polo conselleiro de Xustiza, Interior e Relacións Laborais, por proposta das consellerías e entidades respectivas.
Artigo 4
En razón dos asuntos a tratar, poderán convocarse para que asistan ás reunións da comisión, con voz pero sen voto, especialistas nas materias a que estes se refiran.
Artigo 5
1.-A comisión reunirase con carácter ordinario polo menos unha vez ó semestre.
2.-Con carácter extraordinario poderá reunirse cando a convoque o presidente, ben a iniciativa propia ou por petición de polo menos un tercio dos vocais que a compoñen.
Artigo 6
A comisión poderá, por acordo dos seus membros, constituír grupos de traballo para o estudio e elaboración de propostas de materias ou aspectos determinados. A estes grupos asistirán os técnicos que sexan convocados pola comisión a través da secretaría.
Artigo 7
A Consellería de Xustiza, Interior e Relacións Laborais facilitaralle á comisión os medios persoais e materiais necesarios para o seu funcionamento a través do Servicio de Obxección de Conciencia, adscrito á Dirección Xeral de Xustiza e Interior.
Disposición adicional
Créase o Servicio de Obxección de Conciencia, adscrito á Dirección Xeral de Xustiza e Interior, ó que lle corresponde o exercicio das seguintes funcións:
1.-Elaborar e presentar propostas sobre as actividades e programas que sexan de interese preferente para Galicia, para os efectos da prestación social substitutoria.
2.-Elabora-lo borrador de concerto da Xunta de Galicia como entidade colaboradora e realiza-lo seu seguimento puntual unha vez subscrito este, cos labores de xestión e inspección que o mesmo supoña.
3.-Emitir informe sobre os proxectos e programas presentados polas entidades públicas ou privadas que, tendo o seu ámbito de actuación no territorio de Galicia, pretendan recibir obxectores como colaboradores sociais.
4.-Realizar labores de información, colaboración e apoio ás administracións locais así como ó resto das entidades colaboradoras.
5.-Informa-los mozos sobre a forma de exerce-lo dereito á obxección de conciencia e á realización da prestación social substitutoria.
Disposicións derradeiras
Primeira.-No non previsto neste decreto, o réxime de funcionamento da comisión será o establecido para os órganos colexiados pola Lei 30/1992, do 26 de novembro, de réxime xurídico das administracións públicas e do procedemento administrativo común.
Segunda.-Facúltase o conselleiro de Xustiza, Inte
rior e Relacións Laborais para dicta-las normas necesarias para o desenvolvemento deste decreto.
Santiago de Compostela, tres de febreiro de mil novecentos noventa e cinco.
Manuel Fraga Iribarne
Presidente
Juan Miguel Diz Guedes
Conselleiro de Xustiza, Interior
e Relacións Laborais