Polo Decreto do 16 de outubro de 1950, Boletín Oficial del Estado do 15 de novembro, foi declarado ben de interese cultural con categoría de monumento histórico artístico a igrexa de Santa María de Pesqueiras, concello de Chantada (Lugo).
Sendo a devandita declaración anterior á entrada en vigor da Lei 16/1985, do 25 de xuño, do patrimonio histórico español, cómpre na actualidade concreta-la delimitación do seu contorno.
En consecuencia, e vistos os informes dos servicios técnicos e órganos consultivos, favorables á incoación do expediente para a delimitación do contorno da igrexa de Santa María de Pesqueiras, concello de Chantada (Lugo), esta dirección xeral
RESOLVE:
Primeiro.-Ter por incoado expediente para a delimitación do contorno da igrexa de Santa María de Pesqueiras, concello de Chantada (Lugo).
Protexer este monumento e a zona afectada pola incoación, sendo a súa delimitación a seguinte:
«O punto 1 da liña de delimitación do contorno da igrexa de Santa María de Pesqueiras queda definido na desembocadura do regato de Barcelos.
Continúa, seguindo ladeira arriba, a canle de regato ata o punto 2, situado sobre o eixe dun camiño.
Tomando sobre ese eixe dirección norte, chégase ó punto 3, encontro do camiño mencionado con outro que conduce á igrexa.
Desde o punto 3 a liña percorre un sinuoso camiño que salva a pronunciada pendente desta parte de terreo, ata chegar ó punto 4, situado no encontro deste co camiño que conduce á aldea de Vidal.
A partir deste punto toma dirección sur e percorre o eixe do camiño ata a aldea de Outeiro no encontro do eixe desta estrada cun camiño que se dirixe ó Leste.
Segue nesta dirección polo eixe do camino ata o punto 6, no que o abandona para discorrer polas estremas sur das parcelas catastrais 776 e 1.619 ata atopa-lo punto 7 situado no eixe dun camiño, eixe polo que continúa a liña de delimitación, tomando dirección leste ata o punto 8.
A partir deste punto volve a percorrer estremas de parcelas catastrais: estremas sur das 848, 847, 846, 845 e 844; estremas leste das 844, 843, 818, 317, 812 e 810; ata chegar ó punto 9, situado no punto de máximo nivel de represa.
A liña de delimitación cérrase unindo este punto co 1 seguindo a liña de máximo nivel das augas da represa de Belesar.
Segundo.-Segui-la tramitación do expediente segundo as disposicións vixentes.
Terceiro.-Dar traslado da resolución ó alcalde de Chantada (Lugo) e notificarlle que o outorgarnento das novas licencias de obras e a execución das xa concedidas antes de incoarse o expediente precisarán resolución favorable da Dirección Xeral do Patrimonio Histórico e Documental.
Cuarto.-Notifica-la presente resolución ó arcebispo de Lugo, ó Rexistro de Bens de Interese Cultural do Ministerio de Cultura, e ó Rexistro de Bens de Interese Cultural de Galicia.
Quinto.-Que a presente resolución sexa publicada no Diario Oficial de Galicia e no Boletín Oficial del Estado, abríndose un período de información pública de 10 días hábiles, contados a partir do día seguinte á súa publicación, no Diario Oficial de Galicia.
Santiago de Compostela, 25 de xaneiro de 1995.
Ángel Sicart Giménez
Director xeral do Patrimonio Histórico e
Documental