Plan de acción integral para as persoas con discapacidade de Galicia 2010-2013
A través do PAIPDG a Xunta de Galicia pretende avanzar na consecución da plena participación das persoas con discapacidade na sociedade e na integración das cuestións que máis afectan a este colectivo en todos os ámbitos de actuación.
![](/documents/35297/42622/Plan_Discapacidade.png?version=1.0&imageThumbnail=2
)
Os máis de 230.000 galegos e galegas con discapacidade recórdannos a necesidade de adoptar medidas que garantan a igualdade de trato, a equiparación de oportunidades e a aceptación das diferenzas. Compartindo a importancia que para estas persoas reviste a súa autonomía e independencia individual, incluída a liberdade de tomar as súas propias decisións, a Consellería de Traballo e Benestar ten intensificado a planificación de actuacións en favor das mulleres e dos homes con algunha discapacidade a través da posta en marcha do Plan de acción integral para as persoas con discapacidade de Galicia 2010-2013, que unifica os criterios e articula as medidas de política social para este grupo de poboación.
Este plan constitúe un instrumento que o goberno galego pon ao servizo da comunidade para acadar o obxectivo de promover a participación social de toda a cidadanía e camiñar cara a unha sociedade plenamente integradora e inclusiva, partindo da confianza plena nas capacidades e oportunidades de todas as persoas, sen exclusión.
Ademais dun instrumento de impulso, o plan establece o marco de referencia sobre o que traballar no deseño dunha política de apoio e desenvolvemento dirixida ás persoas con discapacidade e ás persoas que integran a súa unidade de convivencia. Cómpre subliñar que adopta unha perspectiva de abordaxe integral, no que a “discapacidade”, en todas as súas dimensións e tipoloxías, é tida en conta de forma transversal nas políticas implementadas polo goberno da Xunta de Galicia. Así mesmo, ten en consideración a diversidade deste colectivo, así como a diversidade das necesidades e demandas das persoas que o integran.
Áreas de actuación e obxectivos do plan
Ligazóns relacionadas
Documentos relacionados
- Plan de acción integral para as persoas con discapacidade de Galicia 2010-2013
- Plan de acción integral para as persoas con discapacidade de Galicia 2010-2013 (lectura fácil)
- Plan de acción integral para as persoas con discapacidade de Galicia 2010-2013. Informe de seguimento 2010
- Informe de seguimento 2012
- Plan de acción integral para as persoas con discapacidade. Galicia, 2010-2013: informe de seguimento 2013