O Consello Reitor é o órgano superior colexiado de dirección da entidade pública empresarial Portos de Galicia, tal como determina o artigo 13 da Lei 6/2017, do 12 de decembro, de portos de Galicia. A súa disposición transitoria novena, engadida polo artigo 17 da Lei 3/2018, do 26 de decembro, de medidas fiscais e administrativas, dispón que mentres non se estableza regulamentariamente o número de vogais do Consello Reitor, a composición do dito órgano e o réxime de substitucións serán os establecidos nos artigos 10 e 11 do Regulamento de Portos de Galicia, aprobado polo Decreto 227/1995, do 20 de xullo, e que o nomeamento dos vogais o realizará a persoa titular da consellería competente en materia de portos, conforme dispón o artigo 13.2 da Lei 6/2017, do 12 de decembro.

O artigo 10 do Regulamento, no seu número 4, sinala que dos sete vogais representantes dos sectores económicos relacionados coas actividades portuarias no Consello Reitor un vogal será en representación das federacións e clubs náutico-deportivos galegos. Sinala tamén que as federacións e clubs náutico-deportivos galegos lle proporán ao presidente da entidade pública empresarial Portos de Galicia cada un deles o seu vogal.

Polo exposto, no exercicio da facultade atribuída, recibida a proposta da Asociación de Náuticos de Galicia, por proposta do presidente da entidade pública empresarial Portos de Galicia,

DISPOÑO:

Primeiro. A renovación de Javier Ruiz de Cortázar Díaz como vogal titular no Consello Reitor da entidade pública empresarial Portos de Galicia, en representación das federacións e clubs náutico-deportivos galegos.

Segundo. O nomeamento de José Antonio Diz García como vogal suplente no Consello Reitor da entidade pública empresarial Portos de Galicia, en representación das federacións e clubs náutico-deportivos galegos.

Santiago de Compostela, 18 de xullo de 2024

Alfonso Villares Bermúdez
Conselleiro do Mar