A contorna da Torre de Hércules foi declarada de xeito provisional espazo natural de interese local (ENIL) mediante a Orde do 27 de decembro de 2019 (DOG núm. 7, do 13.1.2020). Esta orde condicionou a súa declaración definitiva á presentación, por parte do Concello, dun plan de conservación. O Concello formalizou a súa remisión o día 9 de setembro de 2021.
O día 17 de abril de 2024 publicouse no Diario Oficial de Galicia un Anuncio da Dirección Xeral de Patrimonio Natural en que se acordaba someter a participación pública o documento base do Plan de conservación do espazo natural de interese local Torre de Hércules, pertencente ao concello da Coruña.
O documento base do plan quedou á disposición do público para a súa consulta na páxina web da Consellería de Medio Ambiente e Cambio Climático, para poder realizar suxestións desde o día 18 de abril ata o 20 de maio.
Durante este período de participación pública houbo un fallo na páxina web da Consellería de Medio Ambiente e Cambio Climático, e non estivo dispoñible a consulta do documento base durante varios días.
Visto o anterior e conforme o establecido no artigo 16 da Lei 27/2006, do 18 de xullo, pola que se regulan os dereitos de acceso á información, de participación pública e de acceso á xustiza en materia de ambiente, e no artigo 133 da Lei 39/2015, do 1 de outubro, do procedemento administrativo común das administracións públicas,
ACORDO:
Primeiro. Abrir un novo período de participación ao público do documento base do Plan de conservación do espazo natural de interese local Torre de Hércules durante o prazo de 10 días, contado o dito período desde o día seguinte ao da publicación deste anuncio no Diario Oficial de Galicia.
Segundo. Durante o citado prazo poderase consultar o documento base do Plan na seguinte ligazón do portal de transparencia da Xunta de Galicia:
https://transparencia.xunta.gal/tema/informacion-de-relevancia-xuridica/consulta-publica-previa/consultas-abertas
Así como na páxina web da Consellería de Medio Ambiente e Cambio Climático:
https://cmatv.xunta.gal/seccion-tema/c/CMAOT_Conservacion?content=Direccion_Xeral_Conservacion_Natureza/Participacion_publica/seccion.html&std=Participacion_publica.html
Terceiro. As persoas interesadas poden enviar as súas alegacións:
1. A través do formulario disposto para este fin na ligazón do portal de transparencia da Xunta de Galicia indicada no punto segundo deste anuncio.
2. Mediante correo electrónico ao seguinte enderezo: planificacion.conservacion@xunta.gal, poñendo no asunto Documento base do Plan de conservación ENIL Torre de Hércules.
3. Mediante a presentación de escrito dirixido á Dirección Xeral de Patrimonio Natural da Consellería de Medio Ambiente e Cambio Climático, en calquera dos lugares previstos no artigo 16.4 da Lei 39/2015, do 1 de outubro.
Santiago de Compostela, 3 de xuño de 2024
María Sol Díaz Mouteira
Directora xeral de Patrimonio Natural