Examinada a solicitude de revisión de esbozo formulada polos representantes do monte veciñal en man común (MVMC) de Aguioncha, Cebreiro e Gorbeliña, pertencente á Comunidade de Montes Veciñais en Man Común (CMVMC) da parroquia de Feás, no concello de Calvos de Randín, resultan os seguintes:
Feitos:
Primeiro. O 17.2.2023 a CMVMC da parroquia de Feás presentou unha solicitude (Rexel núm. 2023/570553) de revisión de esbozo do MVMC Aguioncha, Cebreiro e Gorbeliña, no concello de Calvos de Randín.
Coa solicitude achegaron a seguinte documentación:
– Certificación do acordo da Asemblea Xeral do 5.5.2022.
– Memoria e planos.
– Arquivos xeográficos en formato vectorial.
Segundo. O Servizo de Montes da Xefatura Territorial de Ourense emitiu un informe favorable o día 9 de maio de 2023 en relación coa citada solicitude. Nel indícase que o perímetro obxecto de revisión inclúe as partes do perímetro lindeiras con particulares, así como tamén o tramo estremeiro co MVMC Cebreiro e Veiga, pertencente á CMVMC de Meaus (termo municipal de Baltar), e aféctalle tamén, de xeito puntual, ao MVMC de Covas, pertencente á comunidade homónima.
A superficie do MVMC Aguioncha, Cebreiro e Gorbeliña, unha vez revisado o esbozo, sería de 416,91 ha fronte ás 429 ha do acordo de clasificación, o que supón unha redución do 2,8 %.
Tendo en conta o anterior, infórmase favorablemente a revisión do esbozo do MVMC Aguioncha, Cebreiro e Gorbeliña.
Consideracións legais e técnicas:
Único. A Lei 7/2012, do 28 de xuño, de montes de Galicia, na súa disposición transitoria décimo terceira, establece o procedemento de revisión de esbozos de montes veciñais en man común.
De acordo con ela, os esbozos de montes veciñais integrados nun expediente que, pola súa antigüidade non reúnan as características de fiabilidade e precisión que exixen as novas técnicas topográficas poderán ser obxecto de revisión axustándose e completándose con aqueles datos e documentos que se consideren necesarios, en particular os requiridos para a súa inmatriculación no Rexistro da Propiedade.
De acordo cos feitos e fundamentos de dereito expostos, e tendo en conta o informe favorable do Servizo de Montes do día 9 de maio de 2023, o Xurado Provincial de Montes Veciñais en Man Común acordou por unanimidade o día 20 de febreiro de 2024:
Aprobar a proposta de revisión de esbozo do MVMC Aguioncha, Cebreiro e Gorbeliña, pertencente á CMVMC da parroquia de Feás, no concello de Calvos de Randín.
Ourense, 11 de marzo de 2024
Luis Jorge Álvarez Ferro
Presidente do Xurado Provincial de Clasificación de Montes
Veciñais en Man Común de Ourense