De conformidade co previsto no artigo 8 da Lei 19/2013, do 9 de setembro, de transparencia, acceso á información pública e bo goberno, e no artigo 16 da Lei 1/2016, do 18 de xaneiro, de transparencia e bo goberno, dáse publicidade da prórroga que presenta as seguintes características:
I. Mediante a Resolución do 19 de xullo de 2022 (feita pública no DOG nº 155, do 17 de agosto), encargóuselle á empresa pública Empresa de Transformación Agraria, S.A., S.M.E., M.P. (Tragsa), como medio propio personificado e servizo técnico, a execución da obra de reforma da zona de consultas externas do Hospital Comarcal de Valdeorras (Ourense).
II. Por escrito do 5 de xullo de 2023, asinado polo representante de Tragsa e polos directores de obra e de execución, solicitouse unha prórroga ata o 31 de decembro de 2023, debido á necesidade de realizar unha modificación do proxecto inicial para implementar as modificacións necesarias para que a fase 1 e a fase 2 da encarga conten con instalacións de electricidade, iluminación, megafonía, climatización, detección de incendios, voz e datos que se axusten ás necesidades actuais do hospital e á normativa vixente, modificación que ineludiblemente alterou os prazos de execución das obras.
III. Mediante a Resolución do 18 de xullo de 2023 prorrogouse a dita encarga ata o 31 de decembro de 2023.
IV. Con data do 13 de decembro de 2023 dítase resolución pola que se autoriza a redacción da modificación.
V. Con data do 13 de decembro de 2023 foi presentado ante o Servizo Galego de Saúde o proxecto modificado, estando pendente de aprobación.
VI. A través do escrito do 18 de decembro de 2023, asinado polo representante de Tragsa e polos directores de obra e de execución, solicítase unha prórroga de 31 días no prazo de execución, ata o 31 de xaneiro de 2024, e ata a aprobación da modificación e concesión de prórroga definitiva, ata o 30 de xuño de 2024.
VII. En vista destas circunstancias, a Resolución do 28 de decembro de 2023 prorroga ata o vindeiro 30 de xuño de 2024 a vixencia da encarga á empresa pública Empresa de Transformación Agraria, S.A., S.M.E., M.P. (Tragsa), como medio propio personificado e servizo técnico, da execución da obra de reforma da zona de consultas externas do Hospital Comarcal de Valdeorras (Ourense), e mantén inalteradas o resto das condicións previstas para a encarga na Resolución do 19 de xullo de 2022.
Santiago de Compostela, 17 de xaneiro de 2024
Julio García Comesaña
Conselleiro de Sanidade