Mediante a Resolución do 14 de xuño de 2021, fíxose pública a composición dos consellos sociais das universidades do Sistema universitario de Galicia.

A Lei 6/2013, do 13 de xuño, do Sistema universitario de Galicia, establece que o Consello Social estará integrado por un máximo de trinta e unha persoas membros.

No seu artigo 77.3 establece que a representación dos intereses sociais no Consello Social corresponde a personalidades da vida cultural, profesional, económica, laboral ou social, de acordo coa seguinte distribución: o presidente ou presidenta do Consello Social; seis membros designados polo Parlamento de Galicia; seis membros designados pola Xunta de Galicia; un membro designado por cada un dos sindicatos máis representativos no territorio da Comunidade Autónoma de Galicia; catro membros designados polas organizacións empresariais máis representativas dos sectores estratéxicos da economía galega na área de influencia da universidade; un membro designado polas corporacións dos municipios en que se sitúan os campus; un membro designado pola asociación de antigos alumnos de cada unha das universidades e un membro designado polos colexios profesionais, a través da súa entidade asociativa máis representativa, vinculados coa oferta formativa de cada unha das universidades.

A condición de persoa membro do Consello Social adquírese unha vez cumpridos os requisitos de designación, nomeamento e publicación no Diario Oficial de Galicia, e produce efectos a partir desa data.

Con data do 11 de xaneiro de 2024, a presidenta do Consello Social da Universidade de Santiago de Compostela comunica á Consellería de Cultura, Educación, Formación Profesional e Universidades a designación de Luisa Rivas García como representante da Asociación de Antigos Alumnos e Amigos da Universidade de Santiago de Compostela, no Consello Social da Universidade de Santiago de Compostela, en substitución de Ramón Lois Lorenzo.

De acordo co establecido no artigo 78 da Lei 6/2013, do 13 de xuño, xúntase declaración xurada de compatibilidade da nova membro do Consello Social.

Así mesmo, o artigo 77.4 da citada Lei 6/2013, do 13 de xuño, establece que os acordos de designación de membros do Consello Social lle serán comunicados á persoa titular da consellería competente en materia de universidades, quen procederá ao seu nomeamento mediante orde da súa consellería.

Por todo iso,

DISPOÑO:

Artigo único

Nomear a Luisa Rivas García representante da Asociación de Antigos Alumnos e Amigos da Universidade de Santiago de Compostela, no Consello Social da Universidade de Santiago de Compostela, en substitución de Ramón Lois Lorenzo, polo tempo restante de mandato.

Disposición derradeira

Esta orde entrará en vigor o mesmo día da súa publicación no Diario Oficial de Galicia.

Santiago de Compostela, 15 de xaneiro de 2024

Román Rodríguez González
Conselleiro de Cultura, Educación, Formación Profesional e Universidades