O artigo 326.1 da Lei 9/2017, do 8 de novembro, de contratos do sector público (LCSP/2017), establece que nos procedementos abertos, abertos simplificados, restrinxidos, de diálogo competitivo, de licitación con negociación e de asociación para a innovación os órganos de contratación das administracións públicas estarán asistidos por unha mesa de contratación. Nos procedementos negociados en que non sexa necesario publicar anuncios de licitación e nos procedementos a que se refire o artigo 159.6, a constitución da mesa será potestativa para o órgano de contratación.
A nova composición do equipo de goberno, resultante das eleccións do día 4 de decembro de 2023, exixe adaptar a composición da Mesa de Contratación Permanente.
De conformidade co previsto no artigo 326 da LCSP/2017 e na súa normativa de de-senvolvemento, e en exercicio das facultades que lle confire o artigo 36 dos estatutos da Universidade da Coruña, esta reitoría
RESOLVE:
Primeiro. Composición da Mesa de Contratación Permanente
Desígnanse os membros da Mesa, así como os membros suplentes, que se citan a seguir:
1. Presidencia: a persoa titular da Vicerreitoría de Economía e Planificación Estratéxica.
Suplente: a persoa titular da Adxuntía de Economía.
2. Vogais permanentes:
a) Secretaria xeral.
Suplente: a persoa titular da Vicerreitoría de Infraestruturas e Sustentabilidade.
b) Xefatura do Servizo de Control Interno.
Suplente: Xefatura de Sección do Servizo de Control Interno.
c) Xefatura do Servizo de Asesoría Xurídica.
Suplente: Xefatura de Sección ou, na súa ausencia, a do negociado do citado servizo.
d) Xefatura do Servizo de Contratación Administrativa.
Suplente: xefatura dun dos negociados do Servizo de Contratación Administrativa.
3. Secretaría: Xefatura da Sección de Contratación.
Suplente: xefatura dun dos negociados do Servizo de Contratación Administrativa.
Segundo. Normas de funcionamento da Mesa
1. Para a válida constitución da Mesa deberá estar presente a maioría absoluta dos seus membros e, en todo caso, o/a presidente/a, o/a secretario/a e os dous vogais que teñan atribuídas as funcións correspondentes ao asesoramento xurídico e ao control económico orzamentario do órgano de contratación.
2. Terán voz e voto todos os membros da Mesa, agás o/a secretario/a.
3. A Mesa de Contratación poderá solicitar o asesoramento do persoal técnico ou experto independente con coñecementos acreditados nas materias relacionadas co obxecto do contrato. A súa asistencia será autorizada polo órgano de contratación e deberá ser reflectida expresamente no expediente, con referencia ás identidades deste persoal técnico ou experto, e á súa formación e á súa experiencia profesional (artigo 326.5 da LCSP/2017).
4. A Mesa de Contratación poderá solicitar cantos informes técnicos considere pertinentes (artigo 150.1 da LCSP/2017).
5. Nos casos en que a valoración dos criterios mediante un xuízo de valor corresponda a un comité formado por expertos ou a un organismo técnico especializado (artigo 146.2.a) da LCSP/2017), a designación realizarase e publicarase no perfil do contratante (artigo 63.5 LCSP/2017).
6. De maneira supletoria, o funcionamento da Mesa rexerase polo establecido no título preliminar, capítulo II, sección 3ª, subsección 1ª, da Lei 40/2015, do 1 de outubro, de réxime xurídico do sector público.
Terceiro. Publicación e efectos
Esta resolución publicarase no Diario Oficial de Galicia e no perfil do contratante da Universidade da Coruña, e terá efectos desde o día seguinte ao da súa publicación no Diario Oficial de Galicia.
Quedan sen efecto as disposicións anteriores que se opoñan á presente resolución reitoral.
A Coruña, 17 de xaneiro de 2024
Ricardo José Cao Abad
Reitor da Universidade da Coruña