De conformidade co disposto no artigo 15.3 do Regulamento de ordenación da pesca fluvial e dos ecosistemas acuáticos continentais (Decreto 130/1997, do 14 de maio), o Servizo Provincial de Patrimonio Natural da Coruña iniciou o expediente para a modificación dos límites do couto de pesca de Traba, no río Sóñora.
O expediente foi sometido a información pública mediante a Resolución do 15 de novembro de 2023 (DOG núm. 227, do 29 de novembro).
No expediente de modificación dos límites do couto de pesca de Traba, consta que o Consello Provincial de Pesca Continental da Coruña emitiu informe, en sesión do 23 de outubro de 2023, e elevouse ao Consello Galego de Pesca, en sesión do 10 de novembro de 2023.
O expediente de modificación dos límites do couto de Traba cumpre os requisitos establecidos na Lei 2/2021, do 8 de xaneiro, de pesca continental de Galicia, no Decreto 130/1997, do 14 de maio, polo que se aproba o Regulamento de ordenación da pesca fluvial e dos ecosistemas acuáticos continentais, e demais normativa de aplicación.
A Dirección Xeral de Patrimonio Natural é competente para resolver o expediente segundo o disposto na Lei 2/2021, do 8 de xaneiro, de pesca continental de Galicia, no Decreto 130/1997, do 14 de maio, polo que se aproba o Regulamento de ordenación da pesca fluvial e dos ecosistemas acuáticos continentais, e mais no Decreto 42/2019, do 28 de marzo, polo que se establece a estrutura orgánica da Consellería de Medio Ambiente, Territorio e Vivenda.
De conformidade co incluído na documentación do expediente, resolvo a modificación dos límites do couto de pesca de Traba, coas seguintes características:
Río: Sóñora.
Concellos: Lousame, Rois e Noia.
Límites:
– Límite superior: a ponte de Servia (Lousame; 517.432, 4.736.921).
– Límite inferior: muíños de Pedrachán (Noia; 509.594, 4.736.775).
Lonxitude: 12,7 km.
Contra esta resolución, que non finaliza a vía administrativa, poderá interpoñer un recurso de alzada ante a vicepresidenta segunda e conselleira de Medio Ambiente, Territorio e Vivenda, no prazo dun mes contado a partir do día seguinte ao da publicación desta resolución, de conformidade cos artigos 121 e 122 da Lei 39/2015, do 1 de outubro, do procedemento administrativo común das administracións públicas.
Santiago de Compostela, 27 de decembro de 2023
Belén Mª do Campo Piñeiro
Directora xeral de Patrimonio Natural