O 12 de xaneiro de 2023 publicouse no Diario Oficial de Galicia número 8 a Resolución do 21 de decembro de 2022 pola que se aproban as bases para a concesión de subvencións, en réxime de concorrencia non competitiva, para a comercialización e difusión de proxectos e obras audiovisuais e videoxogos en foros de negocio especializados e eventos de cinema, e convócanse para o ano 2023 (código de procedemento CT404D).

Na súa base sexta, punto 4, establece que o importe previsto nesta convocatoria poderá ser incrementado ao longo do exercicio, nos supostos establecidos no artigo 31.2 da Lei de subvencións de Galicia, e tras declaración previa de dispoñibilidade de crédito, logo da modificación orzamentaria que proceda. Se é o caso, a ampliación de crédito deberase publicar nos mesmos medios que esta convocatoria, sen que tal publicidade implique a apertura de prazo para presentar novas solicitudes nin o inicio de novo cómputo de prazo para resolver.

Nos orzamentos do ano 2023 existen remanentes de crédito suficientes dentro do código do proxecto 2015-00003, e a dita ampliación obedece á posibilidade de subvencionar todas as solicitudes presentadas que cumpran cos requisitos establecidos nas bases reguladoras.

Por todo o exposto e no uso das facultades que me foron conferidas,

ACORDO:

Artigo único. Incremento dos créditos

Increméntase o crédito destinado ao financiamento das axudas previstas na Resolución do 21 de decembro de 2022 pola que se aproban as bases para a concesión de subvencións, en réxime de concorrencia non competitiva, para a comercialización e difusión de proxectos e obras audiovisuais e videoxogos en foros de negocio especializados e eventos de cinema, e se convocan para o ano 2023, en 27.400,00 euros, da aplicación orzamentaria 10.A1.432B.470.0., código de proxecto 2015-00003, distribuídos en 4.700 para a modalidade A e 22.700 para a modalidade B.

A publicación desta resolución non supón a apertura dun novo prazo de presentación de solicitudes nin o inicio de novo cómputo de prazo para resolver.

Disposición derradeira única. Entrada en vigor

Esta resolución entrará en vigor o día seguinte ao da súa publicación no Diario Oficial de Galicia.

Santiago de Compostela, 14 de novembro de 2023

Román Rodríguez González
Conselleriro de Cultura, Educación,
Formación Profesional e Universidades