Expediente: IN407A 2023/081-4.
Promotora: UFD Distribución Electricidad, S.A.
Denominación: LMTS, CT e ampliación de potencia do CT Figueiras-Xestoso (36CSR9).
Concello: Vigo.
Feitos.
Primeiro. O 14 de febreiro de 2023, a empresa UFD Distribución Electricidad, S.A. solicitou a autorización administrativa previa, a autorización administrativa de construción e a declaración de utilidade pública da instalación eléctrica denominada LMTS, CT e ampliación de potencia do CT Figueiras-Xestoso (36CSR9).
Examinado o proxecto de execución, conclúese que ten como finalidade as seguintes actuacións para resolver os problemas de subtensións no camiño Figueiras, camiño dos Frades, rúa de Xestoso e camiño do Pouso, na parroquia de Bembrive, no concello de Vigo (Pontevedra):
– Instalación dun centro de transformación rural, manobra exterior de 100 kVA telexestionado, con envolvente prefabricada de formigón, situado no camiño do Pouso, na parcela con referencia catastral 54057A106003050000BO.
– Instalación dunha nova liña de media tensión subterránea (LMTS) de 1.146 metros desde o centro de transformación (CT) Figueiras-Xestoso ata o CT proxectado.
– Ampliación de potencia do centro de transformación compacto Figueiras-Xestoso (36CSR9) de 160 kVA a 250 kVA, situado no camiño Figueiras, na parcela con referencia catastral 54057A105005450002XE.
Segundo. Esta xefatura territorial solicitou o preceptivo informe ás distintas administracións, organismos ou, de ser o caso, empresas de servizos de interese xeral afectadas, isto é, o Concello de Vigo, Augas de Galicia, a Axencia Estatal de Seguridade Aérea (AESA) e o Servizo do Patrimonio Cultural. A empresa promotora manifestou a súa conformidade co condicionado emitido polo Concello de Vigo, o Servizo do Patrimonio Cultural e AESA.
Augas de Galicia non emitiu o condicionado técnico entendéndose en consecuencia a súa conformidade coa autorización de construción da dita infraestrutura eléctrica, conforme o disposto no artigo 131 do Real decreto 1955/2000, do 1 de decembro, sen prexuízo da autorización que lle corresponda outorgar.
Terceiro. Mediante escrito do 20 de marzo de 2023 esta xefatura territorial notificou a solicitude da autorización administrativa previa, a autorización administrativa de construción e a declaración de utilidade pública da referida instalación eléctrica á Entidade Local Menor de Bembrive que figura afectada pola declaración de utilidade pública na relación de bens e dereitos achegada pola empresa promotora.
Cuarto. O proxecto someteuse ao trámite de información pública mediante a Resolución do 20 de marzo de 2023 publicada nos seguintes medios:
– DOG (Diario Oficial de Galicia): 17 de abril de 2023.
– Xornal Faro de Vigo: 9 de maio de 2023.
– Taboleiro de anuncios do Concello de Vigo, desde o 27 de marzo ata o 12 de maio de 2023, segundo certificado emitido polo propio Concello.
– Portal de transparencia e goberno aberto da Consellería de Economía, Industria e Innovación.
Durante este trámite non se recibiron alegacións.
Consideracións legais e técnicas.
Primeiro. A Xefatura Territorial de Pontevedra é competente para resolver este expediente con fundamento no Decreto 116/2022, do 23 de xuño, polo que se establece a estrutura orgánica da Vicepresidencia Primeira e Consellería de Economía, Industria e Innovación (DOG núm. 126, do 4 de xullo) e no Decreto 9/2017, do 12 de xaneiro, polo que se establecen os órganos competentes para a resolución dos procedementos de autorización de instalacións eléctricas que sexan competencia da Comunidade Autónoma de Galicia (DOG núm. 22, do 1 de febreiro).
Segundo. A lexislación de aplicación ao presente expediente é:
Lei 24/2013, do 26 de decembro, do sector eléctrico.
Lei 39/2015, do 1 de outubro, do procedemento administrativo común das administracións públicas.
Lei 40/2015, do 1 de outubro,de réxime xurídico do sector público.
Lei 3/2007, do 9 de abril, de prevención e defensa contra os incendios forestais de Galicia.
Lei do 16 de decembro de 1954, sobre expropiación forzosa.
Lei 9/2021, do 25 de febreiro, de simplificación administrativa e de apoio á reactivación económica de Galicia.
Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica.
Real decreto lei 23/2020, do 23 de xuño, polo que se aproban medidas en materia de enerxía e noutros ámbitos para a reactivación económica.
Real decreto 223/2008, do 15 de febreiro, polo que se aproban o Regulamento sobre condicións técnicas e garantías de seguridade en liñas eléctricas de alta tensión e as súas instrucións técnicas complementarias ITC-LAT 01 a 09.
Real decreto 337/2014, do 9 de maio, polo que se aproban o Regulamento sobre condicións técnicas e garantías de seguridade en instalacións eléctricas de alta tensión e as súas instrucións técnicas complementarias ITC-RAT 01 a 23.
Decreto do 26 de abril de 1957 polo que se aproba o Regulamento da Lei de expropiación forzosa.
Terceiro. As características técnicas da instalación son as que a seguir se describen:
– Liña de media tensión subterránea (LMTS) a 15 kV, con condutor RHZ1, de 1.146 metros de lonxitude, con orixe no centro de transformación existente Figueiras-Xestoso e final no centro de transformación proxectado no camiño do Pouso.
– Ampliación de potencia a 250 kVA do centro de transformación Figueiras-Xestoso 36CSR9, situado na parcela con referencia catastral 54057A105005450002XE, no camiño Figueiras 1, Bembrive.
– Centro de transformación a 100 kVA, con RT 15 kV/400 V, situado na parcela con referencia catastral 54057A106003050000BO, no camiño do Pouso, Bembrive.
– As instalacións están situadas no camiño Figueiras, camiño dos Frades, rúa de Xestoso e camiño do Pouso, na parroquia de Bembrive, no municipio de Vigo (Pontevedra).
Conforme o indicado,
RESOLVO:
Primeiro. Outorgar á empresa UFD Distribución Electricidad, S.A. as autorizacións administrativas previa e de construción da instalación de distribución de enerxía eléctrica denominada LMTS, CT e ampliación de potencia do CT Figueiras-Xestoso (36CSR9), expediente IN407A 2023/081-4, cuxas características se axustarán en todas as súas partes ás que figuran no proxecto de execución, ás condicións técnicas e de seguridade establecidas nos regulamentos de aplicación e ás condicións establecidas nos condicionados dos organismos que constan no expediente.
Segundo. Declarar a utilidade pública, en concreto, da citada instalación eléctrica, o que leva implícito a necesidade de ocupación dos bens ou de adquisición dos dereitos afectados e implica a urxente ocupación para os efectos do artigo 52 da Lei de expropiación forzosa.
A empresa UFD Distribución Electricidad, S.A. asegurará o mantemento e a vixilancia correcta das instalacións durante a construción e despois da súa posta en servizo, co fin de garantir que en todo momento se manterán as condicións regulamentarias de seguridade. En todo momento deberanse cumprir as normas e directrices vixentes que resulten de aplicación, en particular, canto establece o Real decreto 223/2008, do 15 de febreiro, polo que se aproban o Regulamento sobre condicións técnicas e garantías de seguridade en liñas eléctricas de alta tensión e as súas instrucións técnicas complementarias ITC-LAT 01 a 09, e o Real decreto 337/2014, do 9 de maio, polo que se aproban o Regulamento sobre condicións técnicas e garantías de seguridade en instalacións eléctricas de alta tensión e as súas instrucións técnicas complementarias ITC-RAT 01 a 23.
Esta autorización outórgase sen prexuízo de terceiros e independentemente das autorizacións, licenzas ou permisos de competencia municipal, provincial ou outros necesarios para a realización das obras da instalación autorizada.
Contra a presente resolución, que non é definitiva en vía administrativa, poderase interpoñer recurso de alzada ante a conselleira de Economía, Industria e Innovación da Xunta de Galicia, no prazo dun mes contado a partir do día seguinte ao da súa notificación ou publicación, de acordo co disposto nos artigos 121 e 122 da Lei 39/2015, do 1 de outubro, do procedemento administrativo común das administracións públicas, sen prexuízo de que os interesados poidan interpoñer calquera outro recurso que consideren pertinente.
Pontevedra, 26 de outubro de 2023
Beatriz López del Olmo
Xefa territorial de Pontevedra