Para os efectos previstos no artigo 54 da Lei 7/2012, do 28 de xuño, de montes de Galicia, dáse publicidade da proposta de deslindamento parcial do monte veciñal en man común (MVMC) Rosedo con propiedades particulares, presentada o 27 de setembro de 2022 pola Mancomunidade de Montes Veciñais en Man Común (CMVMC) de Carbuíz, A Celareira, Espadanedo, O Mato, Ovellariza e San Pedro.
Nesa mesma data, a comunidade presentou documentación na cal consta o acordo da súa aprobación adoptado na asemblea xeral do 16 de setembro de 2022.
O día 30 de marzo de 2023, o Servizo de Montes de Ourense emitiu un informe favorable ao considerar que non existe unha afección significativa sobre a integridade territorial do monte.
Contra a proposta de deslindamento as persoas interesadas poderán presentar ante a comunidade propietaria as alegacións e os títulos que acrediten a propiedade ou a posesión dos predios estremeiros, no prazo dun mes, que comezará a contar a partir do día seguinte ao da publicación deste anuncio.
Durante este prazo, a documentación estará dispoñible no Servizo de Montes de Ourense, na rúa Villaamil e Castro, s/n, das 9.00 ás 14.00 horas, de luns a venres, para os efectos de coñecer integramente o contido da dita proposta.
Ourense, 19 de setembro de 2023
Luis Jorge Álvarez Ferro
Xefe territorial de Ourense