Como consecuencia da entrada en vigor da Lei 7/2012, do 28 de xuño, de montes de Galicia, e coa finalidade de levar a cabo o establecido na disposición transitoria décimo terceira con respecto á revisión de esbozos de montes veciñais en man común, o xurado, na reunión do 17.9.2012, acordou solicitar ao Servizo de Montes a realización de propostas de revisión e elaboración de cartografías actualizadas dos montes veciñais da provincia susceptibles de tal adecuación.
En relación con isto, na sesión do xurado provincial o día 14.6.2023 figuran os seguintes acordos:
– MVMC Cotá (exp. 91/80), pertencente aos veciños da parroquia de Cotá (agás os lugares de Coido e Pena), no concello de Friol.
O 10.12.2021 tivo entrada unha solicitude da comunidade de Cotá para que se proceda á revisión do esbozo do seu monte veciñal conforme a proposta que achegan.
O 10.5.2023, o Servizo de Montes elaborou unha proposta de novo esbozo (2021_45) na cal a superficie do monte de Cotá pasa a ser de 189,78 ha.
Examinada a devandita proposta, o xurado, por unanimidade, acorda aceptala e proceder á incorporación do novo esbozo ao expediente.
O novo esbozo correspóndese co plano do anexo I do final deste anuncio.
– MVMC Coro (exp. 44/77), pertencente aos veciños do lugar de Coro, na parroquia de Rao, concello de Navia de Suarna.
O 14.9.2022 tivo entrada unha solicitude da comunidade de Coro para que se proceda á revisión do esbozo do seu monte veciñal conforme a proposta que achegan.
O 8.5.2023, o Servizo de Montes elaborou unha proposta de novo esbozo (2022_72) na que a superficie do monte de Coro pasa a ser de 398,11 ha. Esta revisión ten en conta o deslindamento por avinza co MVMC Ventosa.
Unha vez examinada a devandita proposta, o xurado, por unanimidade, acorda aceptala e proceder á incorporación do novo esbozo ao expediente.
O novo esbozo correspóndese co plano do anexo II, ao final deste anuncio.
– MVMC Pol (exp. 46/73), pertencente aos veciños da parroquia de Pol (San Cibrán), no concello de Monterroso.
O 21.9.2022 tivo entrada unha solicitude da comunidade de Pol para que se proceda á revisión do esbozo do seu monte veciñal conforme a proposta que achegan.
O 9.5.2023, o Servizo de Montes elaborou unha proposta de novo esbozo (2022_96) na que a superficie do monte de Pol pasa a ser de 293,19 ha. Esta revisión ten en conta o deslindamento por avinza co MVMC Vacaloura e Fido.
Unha vez examinada a devandita proposta, o xurado, por unanimidade, acorda aceptala e proceder á incorporación do novo esbozo ao expediente.
O novo esbozo correspóndese co plano do anexo III, ao final deste anuncio.
– MVMC San Vicente (exp. 11/77), pertencente aos veciños da parroquia de San Vicente de Pena, no concello de Begonte.
O 22.10.2021 tivo entrada unha solicitude da comunidade de San Vicente de Pena para que se proceda á revisión do esbozo do seu monte veciñal conforme a proposta que achegan.
O 30.5.2023, o Servizo de Montes elaborou unha proposta de novo esbozo (2021_38) en que a superficie do monte de San Vicente pasa a ser de 90,05 ha.
Unha vez examinada a devandita proposta, o xurado, por unanimidade, acorda aceptala e proceder á incorporación do novo esbozo ao expediente.
O novo esbozo correspóndese co plano do anexo IV, ao final deste anuncio.
– MVMC Pedrafita (exp. 36/75), pertencente aos veciños da parroquia de Pedrafita, no concello de Guitiriz.
O 30.7.2020 tivo entrada unha solicitude da comunidade de Pedrafita para que se proceda á revisión do esbozo do monte veciñal, conforme a proposta que achegan e que foi aprobada na asemblea da comunidade o 8.11.2019.
Contra a dita proposta foron presentadas alegacións nas cales varios interesados reclaman terreos afectados pola revisión do esbozo.
Tras examinar as alegacións, o 20.5.2023, o Servizo de Montes elaborou unha memoria (2020_37) en que conclúe que, agás o predio denominado Campo, inscrito no Rexistro da Propiedade, o resto dos terreos reclamados, debido á inconsistencia ou insuficiencia da documental achegada polos alegantes, mantéñense dentro da proposta presentada pola comunidade. No novo esbozo, incluído na citada memoria, o monte de Pedrafita pasa a ser de 523,94 ha.
Unha vez examinada a devandita proposta e de acordo coa memoria do Servizo de Montes, o xurado, por unanimidade, acorda aceptala e proceder á incorporación do novo esbozo ao expediente.
O novo esbozo correspóndese co plano do anexo V, ao final deste anuncio.
Contra estes acordos, desde o día seguinte ao da súa publicación no Diario Oficial de Galicia, poderá interpoñerse recurso potestativo de reposición ante o Xurado Provincial de Montes Veciñais en Man Común de Lugo no prazo dun mes, ou ben directamente recurso contencioso-administrativo ante o Xulgado do Contencioso-Administrativo de Lugo no prazo de dous meses, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e co artigo 46 da Lei 29/1998, do 13 de xullo, da xurisdición contencioso-administrativa.
Lugo, 26 de xuño de 2023
María Olga Iglesias Fontal
Presidenta do Xurado Provincial de Clasificación de
Montes Veciñais en Man Común de Lugo
