De conformidade co establecido no Decreto 206/2005, do 22 de xullo (DOG núm. 145, do 29 de xullo), de provisión de prazas de persoal estatutario do Servizo Galego de Saúde, así como no artigo 3 da Orde da Consellería de Sanidade do 24 de maio de 2006 (DOG núm. 106, do 5 de xuño), pola que se establecen as bases do procedemento para a provisión dos postos de xefatura e coordinación das institucións sanitarias do Servizo Galego de Saúde, en virtude das competencias atribuídas polo Decreto 137/2019, do 10 de outubro (DOG núm. 208, do 31 de outubro), polo que se establece a estrutura orgánica do Servizo Galego de Saúde, a Orde do 22 de abril de 2020 (DOG núm. 82, do 29 de abril), sobre delegación de competencias en órganos centrais e periféricos da Consellería de Sanidade e do Servizo Galego de Saúde, e o Decreto 134/2019, do 10 de outubro (DOG núm. 204, do 25 de outubro), polo que se regulan as áreas sanitarias e os distritos sanitarios do Sistema público de saúde de Galicia, a xerente da Área Sanitaria de Santiago de Compostela e Barbanza

RESOLVE:

Primeiro. Anunciar a convocatoria para cubrir, mediante o procedemento de avaliación colexiada, a provisión dos postos de xefe/a de sección de persoal licenciado sanitario da Área Sanitaria de Santiago de Compostela e Barbanza que se indican no anexo.

Segundo. As solicitudes para participar na presente convocatoria dirixiranse á Xerencia da Área Sanitaria de Santiago de Compostela e Barbanza, e poderán presentarse no Rexistro Xeral da Área Sanitaria de Santiago de Compostela e Barbanza, sito no Hospital Clínico, na travesía Choupana, s/n, 15706 Santiago de Compostela, ou a través de calquera dos procedementos do artigo 16 da Lei 39/2015, do 1 de outubro, do procedemento administrativo común das administracións públicas, no prazo de vinte (20) días naturais contados a partir do seguinte ao da publicación deste anuncio no Diario Oficial de Galicia.

Terceiro. As bases íntegras da convocatoria estarán expostas nos taboleiros de anuncios dos centros dependentes da Área Sanitaria de Santiago de Compostela e Barbanza, nos puntos de atención ao traballador (PAT) da Dirección de Recursos Humanos, na intranet da Área Sanitaria de Santiago de Compostela e Barbanza, así como na páxina web do Servizo Galego de Saúde (www.sergas.es).

Santiago de Compostela, 26 de xuño de 2023

Eloína Núñez Masid
Xerente da Área Sanitaria de Santiago de Compostela e Barbanza

ANEXO

Posto: xefe/a de sección de Endocrinoloxía e Nutrición-Área de Nutrición.

Nº de prazas: unha.

Titulación: título oficial da especialidade de Endocrinoloxía e Nutrición.

Posto: xefe/a de sección de Inmunoloxía.

Nº de prazas: unha.

Titulación: título oficial da especialidade de Inmunoloxía.

Posto: xefe/a de sección de Medicina Interna do Hospital Clínico Universitario de Santiago de Compostela.

Nº de prazas: unha.

Titulación: título oficial da especialidade de Medicina Interna.