O consorcio Axencia para a Calidade do Sistema Universitario de Galicia (en diante, ACSUG) é un consorcio autonómico dotado de personalidade xurídica propia e con plena capacidade e independencia respecto dos seus membros para o cumprimento dos seus obxectivos.

O consorcio adscríbese organicamente á consellería que teña atribuídas as competencias en materia de universidades.

O artigo 17.k) do Decreto 6/2018, do 11 de xaneiro, polo que se aproban os estatutos do consorcio Axencia para a Calidade do Sistema Universitario de Galicia, regula a composición do seu consello reitor, que contará, entre os seus membros, con dúas/dous estudantes do SUG dalgunha das universidades integradas no consorcio.

Na reunión do Consello Reitor, do 22 de decembro de 2022, as universidades integrantes do consorcio acordaron que fosen a Universidade de Santiago de Compostela e a Universidade da Coruña as que designasen o alumnado que formará parte do Consello Reitor.

O citado artigo 17, no seu punto 3, establece que os membros do Consello Reitor que non o sexan por razón do seu cargo serán nomeados pola persoa titular da consellería de adscrición do consorcio por un período de dous anos, prorrogable por un período igual tempo, de acordo coa disposición adicional terceira.

De acordo coa citada normativa, no uso das atribucións que teño conferidas en virtude do Decreto 119/2022, do 23 de xuño, polo que se establece a estrutura orgánica da Consellería de Cultura, Educación, Formación Profesional e Universidades,

RESOLVO:

1. Nomear membros do Consello Reitor da ACSUG o alumnado designado pola Universidade de Santiago de Compostela:

– Emilio Vázquez Lage, como titular.

– Antía Vilas Olveira, como suplente.

2. Nomear membros do Consello Reitor da ACSUG o alumnado designado pola Universidade da Coruña:

– Gema Castro Andrade, como titular.

– Irene Rodríguez Ríos, como suplente.

Santiago de Compostela, 20 de xuño de 2023

Román Rodríguez González
Conselleiro de Cultura, Educación, Formación Profesional e Universidades