Examinada a solicitude de revisión de esbozo formulada polos representantes do monte veciñal en man común (MVMC) Medo de Vilardecás, pertencente á Comunidade de Montes Veciñais en Man Común (CMVMC) de Vilardecás e Lamelas, no concello de Maceda, resultan os seguintes

Feitos:

Primeiro. O 19.9.2022, a CMVMC de Vilardecás e Lamelas presentou unha solicitude (Rexel núm. 2022/2298021) de revisión de esbozo do MVMC Medo de Vilardecás, no concello de Maceda.

Coa solicitude achegaron a seguinte documentación:

– Certificación do Acordo da Asemblea Xeral do 16.9.2022.

– Memoria e planos.

– Arquivos xeográficos en formato vectorial.

Segundo. O Servizo de Montes da Xefatura Territorial de Ourense emitiu un informe favorable o día 7 de decembro de 2022 en relación coa citada solicitude. No mesmo indícase que o perímetro obxecto de revisión inclúe as partes do perímetro lindeiras con particulares. Non se modifican os límites cos montes veciñais estremeiros.

A superficie do MVMC Medo de Vilardecás, unha vez revisado o esbozo, resulta de 231,96 ha fronte ás 270 ha do acordo de clasificación, o que supón unha redución do 14 %. Porén, a redución de superficie provocada pola presente revisión de esbozo é de aproximadamente 14 ha, o que significaría unha redución real do 5 %.

Tendo en conta o anterior, infórmase favorablemente a revisión do esbozo do MVMC Medo de Vilardecás.

Consideracións legais e técnicas:

Único. A Lei 7/2012, do 28 de xuño, de montes de Galicia, na súa disposición transitoria décimo terceira, establece o procedemento de revisión de esbozos de montes veciñais en man común.

De acordo con esta, os esbozos de montes veciñais integrados nun expediente que, pola súa antigüidade, non reúnan as características de fiabilidade e precisión que exixen as novas técnicas topográficas poderán ser obxecto de revisión axustándose e completándose con aqueles datos e documentos que se consideren necesarios, en particular os requiridos para a súa inmatriculación no Rexistro da Propiedade.

De acordo cos feitos e fundamentos de dereito expostos, e tendo en conta o informe favorable do Servizo de Montes do día 7 de decembro de 2022, o Xurado Provincial de Montes Veciñais en Man Común acordou por unanimidade o día 27 de febreiro de 2023:

Aprobar a proposta de revisión de esbozo do MVMC Medo de Vilardecás, pertencente á CMVMC de Vilardecás e Lamelas, no concello de Maceda.

Ourense, 7 de xuño de 2023

Luis Jorge Álvarez Ferro
Presidente do Xurado Provincial de Clasificación
de Montes Veciñais en Man Común de Ourense