De conformidade co previsto no artigo 9 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia, e no artigo 8 da Lei 19/2013, do 9 de decembro, de transparencia, acceso á información pública e bo goberno, dáse publicidade da Resolución da Consellería de Sanidade, do 9 de maio de 2023, pola que se lle encomenda á Axencia Galega de Infraestruturas a xestión das actuacións para a redacción do proxecto e a execución das obras de construción dun novo centro de saúde no concello de Noia (A Coruña).
As actividades que vai realizar a Axencia Galega de Infraestruturas son:
1. A dirección da redacción do proxecto con base no Plan funcional redactado polo Servizo Galego de Saúde, así como a supervisión e aprobación técnica do proxecto.
2. Realizar os actos e negocios xurídicos propios da preparación, selección de contratista, adxudicación e execución dos contratos que sexan precisos para o cumprimento do obxecto da encomenda, e nomeadamente os de redacción de proxecto, obra, dirección da obra, dirección de execución material e coordinación de seguridade e saúde.
3. Con base no establecido no artigo 62 da LCSP, asumir a función de responsable do contrato, para o que o órgano de contratación designará unha persoa física ou xurídica vinculada a esta axencia, á que corresponderá supervisar a súa execución e adoptar as decisións e ditar as instrucións necesarias co fin de asegurar a correcta realización da prestación pactada, dentro do ámbito de facultades que o órgano de contratación lle atribúa.
4. Convocar o Servizo Galego de Saúde para que designe unha persoa representante que asistirá ao acto de recepción das obras no que se levará a cabo a súa entrega.
5. Calquera competencia que lle corresponda en virtude da normativa de aplicación.
En canto á natureza e alcance da xestión encomendada, a encomenda ten natureza de encarga a medio propio, de acordo co disposto nos artigos 47 e seguintes da Lei 16/2010, do 17 de decembro, e no artigo 13.1 da Lei 14/2013, do 26 de decembro, de racionalización do sector público autonómico, e nos artigos 9 e 47 e seguintes da Lei 16/2010, do 17 de decembro, de organización e funcionamento da Administración xeral e do sector público autonómico de Galicia, ao ter a Axencia Galega de Infraestruturas a consideración de medio propio e servizo técnico da Administración da Comunidade Autónoma.
A realización das actividades e/ou actos e negocios xurídicos necesarios para a execución da encomenda de xestión por parte da Axencia Galega de Infraestruturas efectuarase a título gratuíto, sen que exista retribución ou tarifa.
O prazo de vixencia será desde o día seguinte ao da súa sinatura ata a data de finalización do prazo de garantía.
Santiago de Compostela, 10 de maio de 2023
Julio García Comesaña
Conselleiro de Sanidade e Presidente do Servizo Galego de Saúde