Expediente-e: IN407A 2021/220-1.
Promotora: UFD Distribución Electricidad S.A.
Instalación: recuamento do CT Neda-Centro-15CT28, no lugar Vila.
Concello: Neda.
Feitos:
O 11 de novembro de 2021, a empresa promotora solicitou a autorización administrativa previa, a autorización administrativa de construción e a declaración de utilidade pública da dita instalación de distribución eléctrica, coa fin de resolver diferentes defectos regulamentarios existentes no centro de transformación do CT Neda-Centro (15CT28, expediente IN407A 2016/742-1), situado na rúa Camiño sobre hortas, no casco histórico do concello de Neda. Proxéctase a súa substitución por outro de 400 kVA de potencia situado fóra do dito centro histórico e a instalación dunha liña de media tensión soterrada que o conectará coa liña de distribución de media tensión LMT CRN703B, procedente da subestación Cornido.
Achegan o proxecto que inclúe memoria, planos e orzamento, ao abeiro do artigo 123 do Real decreto 1955/2000 que abrangue os seguintes documentos:
– Proxecto de execución nomeado: recuamento CT Neda-centro-15CT28, asinado o 17 de novembro do 2020 por Rubén Fervenza Nicolás, enxeñeiro técnico industrial, graduado en Enxeñaría Eléctrica con número colexial 4.684 de Vigo (COITIVigo).
– Informe: asinado o 17 de febreiro de 2022 por Rubén Fervenza Nicolás, enxeñeiro técnico industrial, graduado en Enxeñaría Eléctrica con número colexial 4.684 de Vigo (COITIVigo).
1) O proxecto someteuse ao trámite de información pública mediante resolución publicada nos seguintes medios:
– Acordo de información pública: 16 de xuño de 2022.
– DOG: 13 de xullo de 2022.
– BOP: 27 de xuño de 2022.
– Xornal La Voz de Galicia: 21 de xullo de 2022.
– Taboleiro de anuncios do concello: segundo certificado municipal do secretario do Concello de Neda de data 5 de agosto de 2022.
– Portal da Transparencia e Goberno aberto da Vicepresidencia Primeira e Consellería de Economía, Industria e Innovación.
2) Durante o período en que se someteu o proxecto ao trámite de información pública non se presentou ningunha alegación, reclamación ou suxestión relacionada coa documentación obxecto de publicación.
3) Solicitouse o preceptivo informe ás distintas administracións, organismos ou, de ser o caso, empresas de servizo público ou de servizos de interese xeral afectadas, isto é, o Servizo de Patrimonio Cultural-Xefatura Territorial da Consellería de Cultura, Educación, Formación Profesional e Universidades da Coruña e o Concello de Neda. A día desta resolución non consta no expediente resposta dos organismos afectados, é dicir, Patrimonio e o concello, á solicitude dos condicionados solicitados.
4) O 31 de marzo de 2023 emitiuse o informe técnico.
Consideracións legais e técnicas:
1) O xefe territorial é competente para resolver este expediente segundo o Decreto 9/2017, do 12 de xaneiro, polo que se establecen os órganos competentes para a resolución dos procedementos de autorización de instalacións eléctricas que sexan competencia da Comunidade Autónoma de Galicia, no Decreto 73/2022, do 25 de maio, polo que se fixa a estrutura orgánica das vicepresidencias e das consellerías da Xunta de Galicia e no Decreto 116/2022, do 23 de xuño, polo que se establece a estrutura orgánica da Vicepresidencia Primeira e Consellería de Economía, Industria e Innovación.
2) Lexislación de aplicación:
1. Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro).
2. Lei 40/2015, do 1 de outubro, de réxime xurídico do sector público (BOE núm. 236, do 2 de outubro).
3. Lei 24/2013, do 26 de decembro, do sector eléctrico (BOE núm. 310, do 27 de decembro).
4. Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica (BOE núm. 310, do 27 de decembro).
5. Real decreto 223/2008, do 15 de febreiro, polo que se aproban o Regulamento sobre condicións técnicas e garantías de seguridade en instalacións eléctricas de alta tensión e as súas instrucións técnicas complementarias ITC-LAT 01 a 09 (BOE núm. 68, do 19 de marzo).
6. Real decreto 337/2014, do 9 de maio, polo que se aproban o Regulamento sobre condicións técnicas e garantías de seguridade en instalacións eléctricas de alta tensión e as súas instrucións técnicas complementarias ITC-RAT 01 a 23 (BOE núm. 139, do 9 de xuño).
7. Real decreto 842/2002, do 2 de agosto, polo que se aproba o Regulamento electrotécnico para baixa tensión (BOE núm. 224, do 18 de setembro).
8. Real decreto 2563/1982, do 24 de xullo, sobre traspaso de funcións e servizos da Administración do Estado á Comunidade Autónoma de Galicia en materia de industria, enerxía e minas (BOE núm. 246, do 14 de outubro).
9. Decreto 9/2017, do 12 de xaneiro, polo que se establecen os órganos competentes para a resolución dos procedementos de autorización de instalacións eléctricas que sexan competencia da Comunidade Autónoma de Galicia (DOG núm. 22, do 1 de febreiro).
10. Lei do 16 de decembro de 1954, sobre expropiación forzosa (BOE núm. 351, do 17 de decembro).
11. Decreto do 26 de abril de 1957, polo que se aproba o regulamento da Lei de expropiación forzosa (BOE núm. 160, do 20 de xuño).
3) Características técnicas:
• LMTS a 15 kV de 2×5 metros (E/S), condutor tipo RHZ1-2OL 12/20 kV 3×(1×240) mm2 Al, coa orixe e remate nos empalmes que se van ralizar no PAR proxectado nas proximidades do CTC proxectado. A LMTS empalmarase coa LMTS. CRN703B, procedente da subestación Cornido.
• CT compacto prefabricado telecontrolado de manobra exterior, cunha potencia de 400 kVA, unha relación de transformación de 15.000/400-230 V e configuración 2L+1P. Demantelamento do CT Neda-Centro (15CT28, expediente IN407A 2016/742-1) existente.
4) Na visita de campo realizada para examinar o lugar da instalación non se apreciou, nos predios sometidos a expropiación, ningunha das limitacións á constitución da servidume sinaladas no artigo 58.a) da Lei 24/2013, do 26 de decembro, do sector eléctrico.
5) No expediente consta un informe favorable dos servizos técnicos desta xefatura territorial.
Consonte con todo o sinalado,
RESOLVO:
a) Conceder a autorización administrativa previa, a autorización administrativa de construción e a declaración de utilidade pública, en concreto, da dita instalación de distribución eléctrica.
b) A instalación executarase no prazo dun ano, contado a partir da data de ocupación dos terreos.
A declaración de utilidade pública leva implícita a necesidade de ocupación dos bens e de adquisición dos dereitos afectados e implicará a urxente ocupación, para os efectos do artigo 52 da Lei de expropiación forzosa.
c) Para a posta en funcionamento da instalación autorizada, deberá achegar ante esta xefatura territorial unha solicitude coa cal xuntará a seguinte documentación:
• As declaracións de conformidade relativas ao material ou equipamento e as certificacións ou homologacións, se procede.
• Un certificado do/da director/a da montaxe en que se garantirá o cumprimento das especificacións do proxecto e prescricións complementarias, se as houber, así coma das regulamentacións e normas axeitadas para a montaxe da instalación e posta a punto.
• Planimetría as built da instalación eléctrica en formato shape.
d) Esta autorización outórgase sen prexuízo doutras que sexan de aplicación segundo a lexislación vixente, en especial as relativas á ordenación do territorio e ao medio ambiente.
Contra esta resolución, que non é definitiva en vía administrativa, poderá interporse recurso de alzada ante o vicepresidente primeiro e conselleiro de Economía, Industria e Innovación, no prazo dun mes contado a partir do día seguinte ao da notificación ou publicación, segundo o disposto nos artigos 121 e 122 da Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro), sen prexuízo de que as persoas interesadas poidan interpor calquera outro recurso que considere axeitado.
Mediante este documento notifícaselle aos interesados esta resolución, segundo o exixido no artigo 40.1 da Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro).
A Coruña, 18 de abril de 2023
Isidoro Martínez Arca
Xefe territorial da Coruña