O concelleiro da Área de Urbanismo, Vivenda, Infraestruturas e Mobilidade, ao abeiro das facultades que lle confire o capítulo II do título X da Lei 7/1985, do 2 de abril, reguladora das bases do réxime local, engadido pola Lei 57/2003, do 16 de decembro, de medidas para a modernización do goberno local, e de acordo coa delegación de competencias realizada no Decreto da Alcaldía núm. 3846/2019, do 26 de xuño de 2019 (publicado no Boletín Oficial da provincia (BOP) da Coruña núm. 124, do 3 de xullo de 2019), o 8 de marzo de 2023 ditou o seguinte decreto, anotado no libro de resolucións da Alcaldía, co núm. DEC/AYT/1529/2023.
«Decreto:
Primeiro. Incoar o procedemento de declaración do incumprimento das obrigas relativas á edificación, á conservación e á rehabilitación do inmoble sito na rúa Herrador, 6, previsto no artigo 26 da Lei 1/2019, do 22 de abril, de rehabilitación e de rexeneración e renovación urbanas de Galicia, xa que concorren as circunstancias de incumprimento das obrigas de edificación, conservación e rehabilitación, dado que se trata dun solar baleiro no centro da cidade, situado no ámbito do Plan especial de protección da cidade vella e pescadería (PEPRI), incluído no Rexistro de Edificacións Forzosas polo Decreto da Alcaldía do 1 de abril de 2005, con reiteradas queixas veciñais por residuos no inmoble, todo iso sumado a unha continuada inactividade da propiedade.
Segundo. Determinar a venda forzosa como sistema de actuación elixido pola Administración, no caso de que o procedemento se resolva coa estimación de concorrencia de incumprimento. Consta unha taxación do inmoble sito na rúa Herrador, 6, da Coruña, do 9 de xaneiro de 2023, que valora o inmoble libre de cargas no importe de trinta e tres mil setecentos setenta e un euros (33.771,00 €).
Terceiro. Solicitar ao Rexistro da Propiedade da Coruña número 1 a certificación de dominio e das cargas do inmoble sito na rúa Herrador, 6, da Coruña, inscrito como predio rexistral número 10.156, tomo 2.364, libro 2.364, folio 159, e que faga constar nunha nota marxinal o inicio do procedemento para a declaración do incumprimento.
Cuarto. Conferir un trámite de audiencia de quince días ás persoas propietarias e aos demais titulares de dereitos reais afectados que consten no Rexistro da Propiedade e/ou no Catastro.
Quinto. Abrir, de maneira simultánea ao trámite de audiencia, un trámite de información pública por un prazo de vinte días con anuncio no Diario Oficial de Galicia e na sede electrónica do concello.
A Coruña, na data da sinatura electrónica deste documento.
A alcaldesa, P.D.
O concelleiro da Área de Urbanismo, Vivenda, Infraestruturas e Mobilidade».
De conformidade co establecido no artigo 26.4 da Lei 1/2019, do 22 de abril, de rehabilitación e de rexeneración e a renovación urbanas de Galicia, ábrese un trámite de información pública por un prazo de vinte días con anuncio no Diario Oficial de Galicia e na sede electrónica do concello.
A Coruña, 10 de marzo de 2023
A alcaldesa
P.D. (Decreto do 26 de xuño de 2019; BOP núm. 124, do 3 de xullo)
María Hernández García
Directora da Área de Urbanismo