Segundo o artigo 9.4 da Lei 8/2013, do 28 de xuño, de estradas de Galicia, os cambios de titularidade das estradas ou treitos delas, cando non se trate de travesías urbanas ou treitos delas que estean incluídos no inventario de travesías da súa Administración titular, deberán ser aprobados por decreto da Xunta de Galicia, por proposta da consellería competente en materia de estradas e logo do acordo entre as administracións afectadas.
Por outra parte, a citada Lei de estradas dispón, no artigo 9.7, que os cambios de titularidade poderán abranguer estradas, treitos delas, elementos funcionais e/ou espazos da zona de dominio público adxacente.
O 25.11.2022, o Pleno da Deputación Provincial de Pontevedra aprobou o cambio de titularidade da estrada EP-9212 Noalla-praia da Lanzada, de 1.649 metros de lonxitude, a prol do Concello de Sanxenxo.
Esta solicitude deriva do convenio de colaboración asinado por ambas as dúas administracións con data do 14.4.2021, para levar a cabo a execución do proxecto de mellora da seguridade viaria e senda peonil na EP-9212, entre Noalla e a praia da Lanzada, desde o p.q. 0+000 ata o p.q. 1+224.
A Axencia Galega de Infraestruturas, de acordo co informe emitido polo servizo competente, indica que a estrada EP-9212 cumpre co estipulado no punto 11 do artigo 18 do Regulamento xeral de estradas de Galicia, relativo aos cambios de titularidade de treitos de estradas a favor de administracións de menor ámbito territorial, segundo o cal estes só se levarán a cabo cando se trate de treitos terminais ou cando non impliquen a interrupción de ningún dos itinerarios dos que forme parte sen que exista unha alternativa viaria, existente ou planificada, para todos eles que proporcione un nivel de servizo cando menos equivalente, a través da rede de estradas da Administración cedente ou das redes de estradas de titularidade de administracións de maior ámbito territorial. Polo que se formula a proposta favorable á transferencia de titularidade que se define no artigo 1.
De conformidade co anteriormente exposto, por proposta da conselleira de Infraestruturas e Mobilidade e logo de deliberación do Consello da Xunta de Galicia na súa reunión do día vinte e tres de febreiro de dous mil vinte e tres,
DISPOÑO:
Artigo 1
Aprobar o cambio de titularidade da estrada EP-9212 Noalla-praia da Lanzada a prol do Concello de Sanxenxo:
|
Clave |
Denominación da estrada |
p.q.i |
p.q.f |
Lonx. (km) |
|
EP-9212 |
Noalla-praia da Lanzada |
0+000 |
1+649 |
1,649 |
Artigo 2
De acordo co establecido no artigo 9.6 da Lei 8/2013, do 28 de xuño, de estradas de Galicia, o cambio de titularidade será efectivo ao día seguinte da publicación deste decreto no Diario Oficial de Galicia. A entrega dos bens formalizarase no prazo dos dous meses seguintes a esta publicación, mediante a sinatura da correspondente acta de entrega entre o concello e a deputación.
Artigo 3
Corresponden ao Concello de Sanxenxo, a partir da formalización da entrega, todas as actividades de xestión, mantemento, conservación e explotación, así como o exercicio das funcións de disciplina viaria e calquera outra que puider corresponderlle como nova Administración titular.
Disposición derradeira
O presente decreto producirá efectos desde o día seguinte ao da súa publicación no Diario Oficial de Galicia.
Santiago de Compostela, vinte e tres de febreiro de dous mil vinte e tres
Alfonso Rueda Valenzuela
Presidente
Ethel Mª Vázquez Mourelle
Conselleira de Infraestruturas e Mobilidade
