En virtude do establecido no artigo 32.6.b) da Lei 9/2017, do 8 de novembro, de contratos do sector público, pola que se traspoñen ao ordenamento xurídico español as directivas do Parlamento Europeo e do Consello 2014/23/UE e 2014/24/UE, do 26 de febreiro, dáse publicidade á seguinte encarga:

– Resolución do 6 de febreiro de 2023, da Vicepresidencia Segunda e Consellería de Presidencia, Xustiza e Deportes, pola que se encarga á Empresa Pública de Servizos Agrarios Galegos, S.A. (Seaga) a execución dos traballos de retirada e destrución de niños incluídos no Programa galego de vixilancia e control fronte á avespa asiática (avespa velutina).

– Actividade: traballos de retirada e destrución de niños incluídos no Programa galego de vixilancia e control fronte á avespa asiática (avespa velutina).

– Natureza e alcance da encarga:

Trátase dunha encarga a un medio propio de acordo cos artigos 32 da Lei 9/2017, do 8 de novembro; 47 e seguintes da Lei 16/2010, do 17 de decembro, de organización e funcionamento da Administración xeral e do sector público autonómico de Galicia, e 13 da Lei 14/2013, do 26 de decembro, de racionalización do sector público autonómico.

A Empresa Pública de Servicios Agrarios Galegos, S.A. (Seaga) é unha sociedade mercantil pública autonómica das previstas no artigo 102 da Lei 16/2010, do 17 de decembro, que de acordo co artigo 1.4 dos seus estatutos ten a consideración de medio propio e instrumental e de servizo técnico da Administración xeral da Comunidade Autónoma de Galicia e das entidades instrumentais do sector público autonómico.

Seaga encargarase da xestión de avisos de presenza de niños de avespa velutina segundo o Programa galego de vixilancia e control fronte á avespa asiática.

– Financiamento: o orzamento de execución ascende a un millón setecentos setenta e catro mil novecentos dezanove euros con noventa e oito céntimos (1.774.919,98 €), que se financiará con cargo á aplicación orzamentaria 06.04.141A.227.42 dos orzamentos xerais da Comunidade Autónoma para o ano 2023, na cal existe crédito adecuado e suficiente.

– Prazo de vixencia: comezará o día da sinatura da encarga (6 de febreiro de 2023) e estenderase ata o 30 de decembro de 2023, e poderá prorrogarse nos termos que se determinen antes da finalización da encarga.

Santiago de Compostela, 15 de febreiro de 2023

Elena Muñoz Fonteriz
Secretaria xeral técnica da Vicepresidencia Segunda
e Consellería de Presidencia, Xustiza e Deportes