Mediante o Decreto 81/2022, do 25 de maio, aprobouse a oferta de emprego público extraordinaria para a estabilización do emprego temporal do persoal do Sistema público de saúde de Galicia, en desenvolvemento do artigo 2 e das disposicións adicionais quinta, sexta e oitava da Lei 20/2021, do 28 de decembro, de medidas urxentes para a redución da temporalidade no emprego público.
Neste marco legal de medidas urxentes para a redución da temporalidade no emprego aprobouse, mediante o Decreto 82/2022, do 25 de maio (Diario Oficial de Galicia núm. 102, do 30 de maio), a oferta de emprego público extraordinaria para a estabilización do emprego temporal do persoal sanitario funcionario da escala de saúde pública e administración sanitaria da Comunidade Autónoma de Galicia.
Na Mesa Sectorial de Sanidade do 5 de decembro de 2022, a Administración sanitaria e as organizacións sindicais CC.OO., CSIF, SATSE e UGT acadaron un acordo sobre criterios básicos dos baremos das convocatorias dos procesos de estabilización da Lei 20/2021, do 28 de decembro.
Durante o presente mes de decembro, esta dirección xeral, en cumprimento do establecido na Lei 20/2021, do 28 de decembro, ten ditado resolucións de convocatoria das prazas incluídas nos ditos decretos, que afectan cento cinco categorías estatutarias e catro clases de funcionarios, que serán obxecto de publicación na páxina web do Servizo Galego de Saúde www.sergas.es antes do 31 de decembro de 2022, e no Diario Oficial de Galicia durante o mes de xaneiro de 2023.
Santiago de Compostela, 21 de decembro de 2022
Ana María Comesaña Álvarez
Directora xeral de Recursos Humanos