O 28 de xaneiro de 2022 publicouse no Diario Oficial de Galicia (en diante, DOG) a Resolución do 12 de xaneiro de 2022 pola que se establecen as bases reguladoras das axudas para a adquisición de vivenda nos centros históricos e se realiza a súa convocatoria para o ano 2022.

O ordinal terceiro, parágrafo 1, da citada resolución establece que as axudas previstas nesta convocatoria se farán efectivas con cargo á aplicación orzamentaria 08.81.451B.780.2 dos orzamentos xerais da Comunidade Autónoma de Galicia para 2022, por un importe total de 500.000 euros, e financiaranse con fondos propios da Comunidade Autónoma. Ademais, no parágrafo 3 do mesmo ordinal prevé que a contía establecida poderá ser obxecto de ampliación mediante resolución da persoa titular da Dirección Xeral do Instituto Galego da Vivenda e Solo (en diante, IGVS), que terá efecto logo da súa publicación no DOG, de conformidade co establecido no artigo 30 do Regulamento da Lei 9/2007, do 13 de xuño, aprobado polo Decreto 11/2009, do 8 de xaneiro.

Tendo en conta que o número de solicitudes presentadas e susceptibles de obteren a axuda supera o importe do crédito orzamentario previsto inicialmente na convocatoria, resulta necesario ampliar o crédito da dotación orzamentaria prevista na dita Resolución do 12 de xaneiro de 2022.

De conformidade co artigo 30.2 do Regulamento da Lei 9/2007, do 13 de xuño, de subvencións de Galicia, e co ordinal terceiro da Resolución do 12 de xaneiro de 2022, é competente para ditar esta resolución a persoa titular da Dirección Xeral do IGVS.

Polo exposto,

RESOLVO:

Único. Ampliar a dotación orzamentaria para a convocatoria de subvencións para a adquisición de vivenda nos centros históricos para o exercicio 2022.

O incremento da dotación será de 150.000,00 euros, na aplicación orzamentaria 08.81.451B.780.2, polo que a contía máxima das subvencións que se poderá conceder con cargo á antedita convocatoria será de 650.000 euros.

Esta ampliación non implica a apertura do prazo para presentar novas solicitudes nin o inicio dun novo cómputo do prazo máximo para resolver.

Esta resolución producirá efectos desde o día seguinte ao da súa publicación no Diario Oficial de Galicia.

Santiago de Compostela, 14 de novembro de 2022

Heriberto García Porto
Director xeral do Instituto Galego da Vivenda e Solo