Expediente: IN407A 2022/162-4.

Promotora: UFD Distribución Electricidad, S.A.

Denominación: substitución LMTS CAT705, CAT704 e TRO702.

Concello: Vigo.

Feitos:

Primeiro. O 22 de abril de 2022, UFD Distribución Electricidad, S.A. solicitou a autorización administrativa previa e a autorización administrativa de construción do proxecto de execución da instalación eléctrica substitución LMTS CAT705, CAT704 e TRO702.

Examinado o proxecto de execución, conclúese que consiste nas seguintes actuacións nas rúas baixada á estación, Urzáiz e Magallanes, no concello de Vigo:

• Novo trazado de 411 metros de lonxitude no circuíto subterráneo da liña de media tensión CAT705, que deixa sen servizo os tramos CAT7050093, CAT7050094, CAT7050095, CAT7050097 e CAT7050116.

• Novo trazado de 185 metros de lonxitude no circuíto subterráneo da liña de media tensión TRO702, que deixa sen servizo os tramos TRO7020439, TRO7020443 e TRO7020446.

• Novo trazado de 156 metros de lonxitude no circuíto subterráneo da liña de media tensión CAT704, que deixa sen servizo o tramo CAT7040206.

Segundo. Esta xefatura territorial solicitou o preceptivo informe ás distintas administracións, organismos ou, de ser o caso, empresas de servizos de interese xeral afectadas, isto é, o Concello de Vigo, o Servizo do Patrimonio Cultural e a Demarcación de Estradas do Estado. A empresa promotora manifestou a súa conformidade cos condicionados emitidos.

Consideracións legais e técnicas:

Primeira. A Xefatura Territorial de Pontevedra é competente para resolver este expediente con fundamento no Decreto 116/2022, do 23 de xuño, polo que se establece a estrutura orgánica da Vicepresidencia Primeira e Consellería de Economía, Industria e Innovación (DOG núm. 126, do 4 de xullo), e no Decreto 9/2017, do 12 de xaneiro, polo que se establecen os órganos competentes para a resolución dos procedementos de autorización de instalacións eléctricas que sexan competencia da Comunidade Autónoma de Galicia (DOG núm. 22, do 1 de febreiro).

Segunda. A lexislación de aplicación ao presente expediente é:

Lei 24/2013, do 26 de decembro, do sector eléctrico.

Lei 39/2015, do 1 de outubro, do procedemento administrativo común das administracións públicas.

Lei 40/2015, do 1 de outubro, de réxime xurídico do sector público.

Lei 9/2021, do 25 de febreiro, de simplificación administrativa e de apoio á reactivación económica de Galicia.

Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica.

Real decreto 223/2008, do 15 de febreiro, polo que se aproba o Regulamento sobre condicións técnicas e garantías de seguridade en liñas eléctricas de alta tensión e as súas instrucións técnicas complementarias ITC-LAT 01 a 09.

Real decreto 337/2014, do 9 de maio, polo que se aproba o Regulamento sobre condicións técnicas e garantías de seguridade en instalacións eléctricas de alta tensión e as súas instrucións técnicas complementarias ITC-RAT 01 a 23.

Lei 5/2017, do 19 de outubro, de fomento da implantación de iniciativas empresarias en Galicia (DOG núm. 203, do 25 de outubro).

Terceira. As características técnicas da instalación son as que a seguir se describen:

Liña de media tensión subterránea (LMTS), a 15 kV, con condutor RHZ1, en sete actuacións:

154 metros, con orixe na LMTS CAT7050129 e final na LMTS CAT7050098.

69 metros, con orixe na LMTS CAT7050098 e final na LMTS CAT7050100.

188 metros, con orixe na LMTS CAT7050099 e final no centro de transformación Banco Hispano (36S873).

44 metros, con orixe na LMTS TRO7020443 e final na LMTS TRO7020444.

68 metros, con orixe na LMTS TRO7020445 e final na LMTS TRO7020447.

73 metros, con orixe na LMTS TRO7020447 e final no centro de transformación Cervantes (36S866).

156 metros, con orixe na LMTS CAT7040211 e final na LMTS CAT7040215.

A instalación está situada nas rúas baixada á estación, Urzáiz e Magallanes, no concello de Vigo (Pontevedra).

Conforme con todo o indicado,

RESOLVO:

Primeiro. Outorgar a UFD Distribución Electricidad, S.A. as autorizacións administrativas previa e de construción da instalación de distribución de enerxía eléctrica denominada substitución LMTS CAT705, CAT704 e TRO702 (expediente IN407A 2022/162-4), cuxas características se axustarán en todas as súas partes ás que figuran no proxecto de execución, ás condicións técnicas e de seguridade establecidas nos regulamentos de aplicación e ás condicións establecidas nos condicionados dos organismos que constan no expediente.

Segundo. UFD Distribución Electricidad, S.A. asegurará o mantemento e a vixilancia correcta das instalacións durante a construción e despois da súa posta en servizo, co fin de garantir que en todo momento se manterán as condicións regulamentarias de seguridade. En todo momento deberanse cumprir as normas e directrices vixentes que resulten de aplicación, en particular, canto establece o Real decreto 223/2008, do 15 de febreiro, polo que se aproba o Regulamento sobre condicións técnicas e garantías de seguridade en liñas eléctricas de alta tensión e as súas instrucións técnicas complementarias ITC-LAT 01 a 09, e o Real decreto 337/2014, do 9 de maio, polo que se aproba o Regulamento sobre condicións técnicas e garantías de seguridade en instalacións eléctricas de alta tensión e as súas instrucións técnicas complementarias ITC-RAT 01 a 23.

Terceiro. Esta autorización outórgase sen prexuízo de terceiros e independentemente das autorizacións, licenzas ou permisos de competencia municipal, provincial ou outros necesarios para a realización das obras da instalación autorizada.

Contra esta resolución, que non é definitiva en vía administrativa, poderase interpoñer recurso de alzada ante o vicepresidente primeiro e conselleiro de Economía, Industria e Innovación da Xunta de Galicia, no prazo dun mes contado a partir do día seguinte ao da súa notificación ou publicación, de acordo co disposto nos artigos 121 e 122 da Lei 39/2015, do 1 de outubro, do procedemento administrativo común das administracións públicas, sen prexuízo de que os interesados poidan interpoñer calquera outro recurso que consideren pertinente.

Pontevedra, 6 de outubro de 2022

Tomás Nogueiras Nieto
Xefe territorial de Pontevedra