A Orde do 30 de decembro de 2021 (publicada no DOG do 7 de febreiro de 2022) establece as bases reguladoras das axudas para os investimentos en transformación e comercialización de produtos agrarios do período 2014-2020 cofinanciadas polo Fondo Europeo Agrícola de Desenvolvemento Rural (Feader), e se convocan para o exercicio orzamentario de 2022.
No seu artigo 14 (resolución), indícase que a data máxima para xustificar o investimento, incluídos a súa facturación e pagamento efectivo, así como a presentación da documentación necesaria para tramitar o cobramento da subvención correspondente, non poderá superar en cada anualidade a data do 10 de outubro.
A crise de subministracións industriais existente a nivel mundial causada pola inestabilidade do comercio internacional, condicionado pola saída da pandemia da COVID-19 e o recente conflito no leste de Europa, está afectando os prazos de entrega de maquinaria e bens de equipo contratados polas industrias agroalimentarias. Esta circunstancia dificulta o cumprimento dos prazos de execución de investimentos declarados polas empresas que solicitaron axudas, en particular para a execución dos investimentos previstos para a anualidade de 2022.
Debido ao indicado, considerase conveniente na convocatoria de axudas para 2022 ampliar o prazo de xustificación dos investimentos da anualidade 2022.
Por outra parte, no artigo 34 «Financiamento» da referida orde, relativo ao financiamento destas axudas, detállase no seu punto 1 a aplicación orzamentaria destinada a financiar as subvencións da convocatoria, así como o importe económico previsto para cada un dos exercicios orzamentarios establecidas. Neste artigo sinálase ademais que os importes indicados poderanse incrementar nos supostos previstos no artigo 31.2 da Lei 9/2007, do 13 de xuño, de subvencións de Galicia.
A xeración do crédito correspondente permite a ampliación dos fondos inicialmente previstos, ademais esta ampliación é necesaria á vista das solicitudes de subvención presentadas.
En consecuencia, de conformidade co previsto no artigo 30.1.3 do Estatuto de autonomía de Galicia, e en uso das facultades que me confire a Lei 9/2007, do 13 de xuño, de subvencións de Galicia, e en uso das competencias que me confire a Lei 1/1983, do 22 de febreiro, de normas reguladoras da Xunta e da súa Presidencia,
DISPOÑO:
Artigo 1. Ampliación do prazo de xustificación de investimentos da anualidade 2022
A data máxima para xustificar os investimentos subvencionados mediante a Orde do 30 de decembro de 2021 pola que se establecen as bases reguladoras das axudas para os investimentos en transformación e comercialización de produtos agrarios do período 2014-2020 cofinanciadas polo Fondo Europeo Agrícola de Desenvolvemento Rural (Feader), e se convocan para o exercicio orzamentario de 2022 (código de procedemento MR340A), correspondentes á anualidade 2022, incluídos a súa facturación e pagamento efectivo, así como a presentación da documentación necesaria para tramitar o cobramento da subvención correspondente, será o día 10 de novembro de 2022.
Artigo 2. Ampliación da dotación orzamentaria
Amplíase a dotación orzamentaria destinada a financiar as subvencións que se establece na Orde do 30 de decembro de 2021 pola que se establecen as bases reguladoras das axudas para os investimentos en transformación e comercialización de produtos agrarios do período 2014-2020 cofinanciadas polo Fondo Europeo Agrícola de Desenvolvemento Rural (Feader), e se convocan para o exercicio orzamentario de 2022 (código de procedemento MR340A), nos seguintes importes:
Concepto orzamentario |
Código de proxecto |
Anualidade 2022 (€) |
Anualidade 2023 (€) |
Anualidade 2024 (€) |
14.04.741A.770.0 |
201600195 |
3.332.784 |
5.393.882 |
2.841.490 |
Conforme iso, a dotación orzamentaria para as anualidades 2022, 2023 e 2024 do proxecto 201600195 destinado a financiar as subvencións desta orde é a seguinte:
Concepto orzamentario |
Código de proxecto |
Anualidade 2022 (€) |
Anualidade 2023 (€) |
Anualidade 2024 (€) |
14.04.741A.770.0 |
201600195 |
14.332.784 |
17.893.882 |
6.341.490 |
Artigo 3. Prazo de solicitude
As modificacións introducidas nesta orde non afectan o prazo de presentación de solicitudes establecido na Orde do 30 de decembro de 2021 citada.
Disposición derradeira única. Entrada en vigor
Esta orde entrará en vigor o día seguinte ao da súa publicación no Diario Oficial de Galicia.
Santiago de Compostela, 27 de setembro de 2022
José González Vázquez
Conselleiro do Medio Rural