Para os efectos previstos no artigo 53 da Lei 7/2012, do 28 de xuño, de montes de Galicia, dáse publicidade ao acordo adoptado polo Xurado Provincial de Clasificación de Montes Veciñais en Man Común de Pontevedra, o 14 de xuño 2022, en relación co deslindamento parcial entre as comunidades de montes veciñais en man común de Quintela e de Saxamonde (concello de Redondela), ao respecto da estrema común dos seus montes (expediente PO-DESC-01/2019).

Feitos:

Primeiro. O 1 de xullo de 2019, María José Fabre Fervenza, en representación da Comunidade de Montes Veciñais en Man Común (en diante, CMVMC) de Quintela, presenta no Rexistro Electrónico da Xunta de Galicia co núm. 2019/1426210 solicitude de deslindamento entre a CMVMC de Quintela e a CMVMC de Saxamonde, ambas no concello de Redondela.

Segundo. No expediente consta a seguinte documentación consonte o artigo 53 da Lei 7/2012: acta de conciliación, certificados de aprobación do deslindamento nas asembleas xerais das comunidades e plano.

A liña de deslindamento proposta está composta polos seguintes puntos seguindo o curso do regato O Regueiral:

Marco 1 x: 533.578,8 y: 4.678.714,45

Marco 2 x: 533.465,31 y: 4.678.706,16

Marco 3 x: 533.324,82 y: 4.678.712,97

Revisado o expediente de deslindamento detéctase que existe colindancia entre as CMVMC de Quintela e de Saxamonde.

O Servizo de Montes considera que a solicitude se axusta ao establecido no artigo 53 polo que propón a aprobación do deslindamento tendo en conta que non se pode obter o informe de validación gráfica catastral porque existe un erro no catastro e a liña non pecha referencias catastrais. No caso de que o Xurado de Montes aprobe o deslindamento remitirase ao catastro os puntos de deslinde en formato shp.

Consideracións legais e técnicas:

Primeira. Esta resolución dítase ao abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.

Segunda. O artigo 53 da Lei 7/2012, do 28 de xuño, de montes de Galicia, recolle o procedemento que hai que seguir no deslindamento entre montes veciñais en man común e establece que o Xurado Provincial de Clasificación de Montes Veciñais en Man Común, logo do exame da documentación presentada, ditará resolución que será publicada no Diario Oficial de Galicia e notificada ás comunidades interesadas.

De acordo cos feitos e consideracións legais e técnicas expostos, o Xurado, por unanimidade dos seus membros,

ACORDA:

Aprobar o deslindamento parcial realizado entre a CMVMC de Quintela (Redondela) e a CMVMC de Saxamonde (Redondela) respecto da súa estrema común nos termos indicados no feito segundo.

Contra esta resolución, que pon fin á vía administrativa, poderase interpoñer recurso de reposición con carácter potestativo ante o Xurado Provincial de Clasificación de Montes Veciñais en Man Común de Pontevedra no prazo dun mes, ou ben interpoñer directamente recurso contencioso-administrativo ante o Xulgado do Contencioso-Administrativo de Pontevedra no prazo de dous meses contados desde o día seguinte ao da súa publicación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e cos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.

Pontevedra, 5 de setembro de 2022

Antonio Crespo Iglesias
Presidente do Xurado Provincial de Clasificación de Montes Veciñais
en Man Común de Pontevedra