O Concello de Beariz ditou resolución do expediente sancionador SCOVID/BEARIZ/0023 e dous máis por vulneración da normativa sanitaria.

Intentada a notificación das resolucións por correo certificado con xustificante de recepción no domicilio que consta nos correspondentes expedientes sancionadores, estas foron devoltas polo servizo de Correos. Por este motivo, e de conformidade co disposto no artigo 44 da Lei 39/2015, do 1 de outubro, do procedemento administrativo común das administracións públicas, a notificación das resolucións ditadas nos procedementos sancionadores en materia sanitaria ás persoas interesadas que figuran no anexo efectúase por medio dun anuncio publicado no Boletín Oficial del Estado (BOE), que previamente se publica no Diario Oficial de Galicia.

Dado que neste acto non se publican na súa integridade as notificacións referidas, de conformidade co artigo 46 da Lei 39/2015, do 1 de outubro, do procedemento administrativo común das administracións públicas, o texto íntegro dos actos que se notifican está á disposición das persoas interesadas, xunto co resto do expediente, no prazo máximo de dez (10) días hábiles, contados desde o día seguinte ao desta publicación no Boletín Oficial del Estado, nas oficinas municipais do Concello de Beariz, situadas na rúa San Pedro nº 2, Beariz (Ourense), das 9.00 ás 14.00 horas, de luns a venres. Advírteselles ás persoas interesadas que, de non compareceren no referido prazo, a notificación se entenderá producida, para todos os efectos, o día seguinte ao do vencemento do prazo.

O prazo de ingreso das multas impostas en período voluntario será o establecido no artigo 62.2 da Lei 58/2003, do 17 de decembro, xeral tributaria.

O pagamento das sancións impostas en período voluntario deberase facer nos seguintes prazos:

a) Se a notificación da liquidación se realiza entre os días 1 e 15 de cada mes, desde a data de recepción da notificación ata o día 20 do mes posterior ou, se este non for hábil, ata o inmediato hábil seguinte.

b) Se a notificación da liquidación se realiza entre os días 16 e último de cada mes, desde a data de recepción da notificación ata o día 5 do segundo mes posterior ou, se este non for hábil, ata o inmediato hábil seguinte.

As débedas non satisfeitas nos períodos citados nas letras anteriores exixiranse na vía de constrinximento.

As resolucións poñen fin á vía administrativa e contra elas cabe recurso contencioso-administrativo ante o xulgado do contencioso-administrativo da circunscrición en que o demandante teña o seu domicilio ou aquela en que estea a sede do órgano autor do acto orixinario impugnado (enténdese limitada esta posibilidade de elección só aos xulgados que se encontren dentro da circunscrición do Tribunal Superior de Xustiza de Galicia), de acordo co establecido nos artigos 8 e 14 da Lei 29/1998, do 13 de xullo, reguladora da xurisdición contencioso-administrativa, no prazo de dous meses contados desde o día seguinte ao da súa notificación, conforme o disposto no artigo 46.1 da citada norma legal. Potestativamente, cabe recurso de reposición ante a persoa titular da Alcaldía do Concello de Beariz, no prazo dun mes contado desde o día seguinte ao da súa notificación.

Este anuncio realízase ao abeiro do establecido no Convenio asinado o 27 de novembro de 2020 entre a Vicepresidencia Primeira e Consellería de Presidencia, Xustiza e Turismo e a Federación Galega de Municipios e Provincias (Fegamp) para articular a encomenda de xestión á Xunta de Galicia para a realización de actuacións auxiliares e de colaboración material na tramitación dos procedementos sancionadores competencia dos concellos de Galicia, en relación co incumprimento das medidas de prevención aprobadas para a loita contra a COVID-19.

Santiago de Compostela, 5 de setembro de 2022

Mª Jesús Tejada López
Funcionaria da unidade tramitadora

ANEXO

Número de expediente	DNI/CIF da persoa interesada	Infracción imputada	Precepto cualificador	Precepto sancionador	Sanción imposta
SCOVID/BEARIZ/0023	77483702Z	Na rúa O Canedo (Beariz) escóitase música alta e obsérvanse unhas 40-50 persoas que están consumindo alcohol nunha casa en obras. Moitas persoas saen correndo, pero identifícanse 15 delas que son non conviventes. Unha delas é a persoa denunciada.	Artigo 41.bis.f) da Lei 8/2008, do 10 de xullo, de saúde de Galicia	Artigo 44.bis da Lei 8/2008	100 euros
SCOVID/BEARIZ/0035	77483702Z	Celebración dunha festa ilegal na cal se contabilizan sobre 50 persoas que están consumindo bebidas alcohólicas nunha casa en obras aberta e no exterior dela. Moitas persoas foxen, pero identifícanse 15. Unha delas é a persoa denunciada.	Artigo 41.bis.g) da Lei 8/2008, do 10 de xullo, de saúde de Galicia	Artigo 44 bis.2.a) da Lei 8/2008	300 euros
SCOVID/BEARIZ/0055	77483702Z	Obsérvanse varias persoas consumindo bebidas alcohólicas na vía pública. Unha delas é o denunciado.	Artigo 41.bis.a) da Lei 8/2008, do 10 de xullo, de saúde de Galicia	Artigo 44 da Lei 8/2008, do 10 de xullo, de saúde de Galicia	100 euros