Mediante Resolución reitoral do 5 de xullo de 2010 (DOG nº 140, do 23 de xullo) foi establecida a composición permanente da mesa de contratación da Universidade de Vigo e fixáronse as normas de funcionamento da mesma.

Posteriormente, por Resolución reitoral do 20 de xuño de 2018 (DOG nº 123, do 28 de xuño) modificábase o punto primeiro da devandita resolución establecéndose unha nova composición da mesa de contratación. Respecto diso, e dado o novo deseño de competencias, estímase oportuno cambiar as persoas designadas para presidir a mesa de contratación e a un vogal.

Por todo o anteriormente exposto, acórdase ditar a seguinte resolución:

Modificar o punto primeiro da Resolución do 5 de xullo de 2010 (na redacción dada pola Resolución reitoral do 20 de xuño de 2018) pola que se fai pública a composición e o funcionamento da mesa de contratación permanente da Universidade de Vigo nos parágrafos relativos á persoa que exercerá os labores de presidencia desta e dun dos vogais, que quedan redactados nos seguintes termos:

«Presidente/a: a persoa que ocupe o Vicerreitorado Relaciones coa Empresa, que poderá ser suplida en caso de vacante, ausencia ou enfermidade pola persoa que designe o reitor.

Vogal: Xefe da Sección de Contabilidade».

Esta resolución entrará en vigor desde a súa publicación no perfil do contratante da Universidade de Vigo, segundo o disposto no artigo 21 do Real decreto 817/2009.

Vigo, 30 de xuño de 2022

Manuel J. Reigosa Roger
Reitor da Universidade de Vigo