De conformidade co disposto no artigo 22.3 da Lei 3/2007, do 9 de abril, de prevención e defensa contra os incendios forestais de Galicia, tras ser publicada a notificación no BOE o 25 de agosto de 2021 e no DOG o 25 de agosto 2021, aos titulares dos bens que se relacionan a continuación, por seren descoñecidos ou non recolleren a notificación en que se lles comunicaba a súa obriga legal de xestionar a biomasa e de retirar as especies arbóreas prohibidas nas parcelas que se sinalan, imposta polo artigo 22.1 da Lei 3/2007.
Tras comprobar que non se realizaron os labores de xestión da biomasa no prazo concedido tras a publicación nos diarios indicados.
Visto, ademais, que o Concello de Cenlle ten un convenio asinado con Seaga polo cal encarga a este organismo da Xunta de Galicia a limpeza efectiva de moitas parcelas que están en situación de risco de incendio e para as cales non foi posible lograr que realizasen a limpeza os seus titulares, ben porque non se coñecen ou ben por incumprimento, considerando que resulta obrigatorio, chegados a este punto, acordar a execución subsidiaria polo Concello e que resulta necesario formalizar tamén a liquidación provisional dos custos que terán esas limpezas,
De acordo co previsto nos artigos 21 e seguintes da Lei 3/2007, de prevención de incendios de Galicia; 135 e seguintes da Lei 2/2016, do solo de Galicia, e 21.1 da Lei 7/1985, do 2 de abril, reguladora das bases do réxime local,
RESOLVO:
Primeiro. Acordar a execución subsidiaria das seguintes ordes de limpeza dos predios en risco de incendio, ao abeiro do previsto no artigo 22 da Lei 3/2007, por incumprimento dos titulares ou por descoñecemento deles, en zona de franxas de protección de núcleos de poboación:
Referencia catastral |
Titular/es |
Localización |
Polígono |
Parcela |
Metros |
Custo |
Liquidación provisional |
32026A02700169000TL |
Bóveda López Andrés |
Cenlle (Santa María) |
27 |
169 |
7.105 |
1,20 m² |
8.526 euros |
32026A008005660000TB |
Veciños de Cenlle e Sadurnín |
Sadurnín (San Xoán) |
21 |
1000 |
160.749 |
1,20 m² |
192.898 euros |
32026A021010000000TM |
Veciños de Saa e Navas |
Sadurnín (San Xoán) |
20 |
2000 |
12.038 |
1,20 m² |
14.445 euros |
Segundo. En aplicación do previsto no artigo 22.4 da Lei 3/2007, de prevención e defensa contra os incendios forestais de Galicia, considérase que a limpeza xerará os custos que aparecen na mesma táboa, na columna de liquidación provisional.
Terceiro. Ordenar e requirir o pagamento da presente liquidación provisional dos custos que deberán aboar as persoas responsables. Os importes que se presentan constitúen a liquidación voluntaria, cos prazos previstos na Lei xeral tributaria. Todo isto sen prexuízo da liquidación definitiva que se cursará unha vez rematados os traballos de corta e rozadura.
Cuarto. As persoas titulares do terreo ou do dereito de aproveitamento terán a obriga legal de facilitar o acceso necesario para a realización dos traballos de xestión da biomasa. Adóptase como medida cautelar o comiso da madeira procedente da corta de especies arbóreas que se deban retirar, se é o caso, en conformidade co artigo 22.2 da Lei 3/2007.
Quinto. Outorgarlles aos titulares afectados un prazo de audiencia de 15 días hábiles, para que aleguen e presenten os documentos e xustificacións que consideren convenientes consonte os seus dereitos. Para tales efectos, poderán consultar o expediente administrativo instruído e obter as copias que consideren oportunas para unha maior defensa dos seus intereses, de conformidade co previsto na Lei 39/2015, do 1 de outubro, do procedemento administrativo común das administracións públicas.
Sexto. Ordenar a publicación da presente resolución no Boletín Oficial del Estado, no Diario Oficial de Galicia e no taboleiro de anuncios do Concello, para o seu coñecemento, e comunicarlla a Seaga, para os efectos que procedan.
Indícase que o expediente no seu conxunto se atopa á disposición dos/das interesados/as nas dependencias do Concello, sitas en Trasariz, 1, Cenlle, de luns a venres, das 9.00 ás 14.00 horas.
Cenlle, 25 de abril de 2022
José Manuel Rodríguez Lamas
Alcalde