Antecedentes:

A escola de navegación de lecer Escuela Marevento, S.L. está actualmente inscrita como escola de navegación de lecer (Enal básica) e solicita a modificación da súa categoría no Rexistro de Escolas de Navegación de Lecer, para recoñecerse como escola de navegación de lecer (Enal).

Consideracións legais e técnicas:

– Decreto 50/2021, do 11 de marzo, polo que se aproba a estrutura orgánica da Consellería do Mar (DOG núm. 58, do 26 de marzo).

– Real decreto 875/2014, do 10 de outubro, polo que se regulan as titulacións náuticas para o goberno das embarcacións de lecer (BOE núm. 247, do 11 de outubro).

– Orde do 31 de xullo de 1998 pola que se regulamenta a normativa para o recoñecemento das escolas de navegación de lecer na Comunidade Autónoma de Galicia (DOG núm. 164, do 25 de agosto).

– O Servizo de Ensino e Titulacións Náutico-Pesqueiras analizou a documentación e realizou as correspondentes inspeccións.

A Dirección Xeral de Desenvolvemento Pesqueiro é a competente para resolver o expediente.

De acordo con todo o indicado,

RESOLVE:

Autorizar o cambio de categoría á escola Escuela Marevento, S.L. (Enal básica) e recoñecela como escola de navegación de lecer (Enal). A escola sigue mantendo o mesmo número de rexistro (XGEN053) co que foi recoñecida. As instalacións están situadas na avenida de Galicia, núm. 52, 36620 Vilanova de Arousa (Pontevedra).

Segundo o artigo 7 da Orde do 31 de xullo de 1998, pola que se regulamenta a normativa para o recoñecemento das escolas de navegación de lecer na Comunidade Autónoma de Galicia, terá a consideración de centro colaborador da Administración nos temas que lle son propios.

A inscrición no Rexistro de Escolas de Navegación de Lecer ten como finalidade a anotación, o seguimento, o control e a inspección da escola recoñecida. Terá unha vixencia de cinco (5) anos, que se contarán a partir do día seguinte ao da publicación no DOG desta resolución, e deberá solicitar a súa renovación transcorrido ese prazo.

A escola está obrigada a comunicar ao rexistro calquera cambio que modifique as condicións en que foi recoñecida, como pode ser o cambio do/da instrutor/a ou da embarcación de prácticas.

Así mesmo, a escola poderá perder o seu recoñecemento e darse de baixa no rexistro por non renovar o recoñecemento, por incumprimento das súas obrigas ou por cesamento da actividade por máis de tres (3) anos. A resolución publicarase no DOG.

Contra esta resolución, que non pon fin á vía administrativa, poderá interpoñer recurso de alzada ante a conselleira do Mar no prazo dun mes, contado desde o día seguinte ao da súa publicación no Diario Oficial de Galicia.

Santiago de Compostela, 24 de marzo de 2022

Susana Rodríguez Carballo
Directora xeral de Desenvolvemento Pesqueiro