O Comité Intercentros da Corporación Radio e Televisión de Galicia, S.A. comunicou convocatoria de folga que afecta Todos os traballadores e traballadoras da Corporación nos seus centros de traballo: San Marcos (Santiago de Compostela), delegación da Coruña, delegación de Vigo, delegación de Ourense e delegación de Lugo. Esta convocatoria de folga desenvolverase en diferentes días de paros parciais e totais da seguinte maneira: paros parciais o mércores 20 e o mércores 27 de abril, que ocuparán a metade da xornada laboral, e de xornada completa o domingo 1 e O luns 2 de maio.
Desta forma, desde a CRTVG establécense servizos mínimos respecto dos sectores e actividades cuxa regulación e competencia poden afectar o desenvolvemento ordinario da actividade cidadá, no sentido do artigo 2 do Decreto 155/1988, do 9 de xuño, é dicir, sanidade, seguridade, protección civil, transportes e comunicacións, medios de comunicación social, rexistros públicos, edificios, bens e instalacións públicas, asistencia social e educación, servizos de vixilancia e extinción de incendios e bombeiros.
A fixación dos servizos mínimos adoptados na CRTVG xustifícase en razón das seguintes circunstancias:
1. O carácter esencial que revisten os servizos de comunicación audiovisual, non só pola determinación expresa do lexislador (Lei 9/2011, do 9 de novembro), senón tamén pola súa incidencia no exercicio dos dereitos fundamentais a comunicar e recibir información veraz por calquera medio de difusión (artigo 20.1.d) CE); a Lei 7/2010, do 31 de marzo, xeral da comunicación audiovisual que reserva por norma o carácter de servizo esencial para o servizo público de comunicación audiovisual.
A condición de «servizo esencial», distinto deste último de «servizos de interese xeral», resérvase na actualidade para o servizo público de comunicación audiovisual (artigo 40 da Lei 7/2010), isto é, para aqueles servizos de comunicación audiovisual que son de titularidade pública.
En plena concordancia co indicado, a Lei 9/2011, do 9 de novembro, dos medios públicos de comunicación audiovisual de Galicia, establece que o servizo público de radio e televisión de titularidade da Comunidade Autónoma de Galicia é un «servizo esencial» para a comunidade.
En consecuencia, concorren no presente caso os presupostos normativos establecidos no artigo 10 do Real decreto lei 17/1977 tan só para aquelas folgas que son declaradas en empresas encargadas da prestación de «calquera xénero de servizo público» ou de «recoñecida e inaprazable necesidade».
O feito en que poden impoñerse medidas limitadoras componse de dous elementos: un, a cualificación do servizo («servizos públicos ou de recoñecida e inaprazable necesidade») e outro, de carácter circunstancial («e concorran circunstancias de especial gravidade»), que debe concorrer en ambos os termos da alternativa do primeiro elemento. Non basta, así, coa cualificación do servizo para xustificar as medidas limitativas, senón que estas, se é o caso, deben axustarse ás circunstancias, que deben ser non só graves, senón de especial gravidade, como a urxencia de non asegurar a emisión e a comunicación informativa relevante cando é o único medio audiovisual de titularidade pública de Galicia.
2. A procedencia de precisar, dentro da total extensión da prestación destes servizos públicos esenciais, e aplicando un criterio o máis estrito posible, aqueles aspectos cuxo mantemento debe considerarse indispensable coa finalidade de asegurar a satisfacción do interese público afectado, daqueloutros aspectos que poden quedar suspendidos temporalmente como consecuencia da folga, sen mingua do interese xeral da comunidade.
De modo que a consideración dun servizo como esencial non pode supoñer a supresión do dereito de folga dos traballadores/as que tivesen que prestalo, senón a necesidade de dispoñer das medidas precisas para o seu mantemento ou, dito doutra forma, para asegurar a prestación dos traballos que sexan necesarios para a cobertura mínima dos dereitos, liberdades ou bens que satisfai o dito servizo, sen que exixa alcanzar o nivel de rendemento habitual nin asegurar o seu funcionamento normal.
No fío deste interese público indispensable de carácter informativo, que dota a Corporación RTVG da cualificación de servizo esencial, entra á hora da determinación destes servizos mínimos a proporcionalidade, elixindo tan só o mínimo esencial para asegurar a emisión das canles de comunicación e a retransmisión da información de carácter esencial.
Esta proporcionalidade ponse de manifesto coa propia cuantificación destes efectivos mínimos, e o persoal con horario habitual de traballo un día entre semana comparable de programación ordinaria é na actualidade duns 673 efectivos e o persoal que atende as tarefas cualificadas como servizos mínimos é de 144 efectivos.
O día 1 de maio, domingo, ao ser fin de semana, ten unha casuística e programación diferente. Trátase de xornadas con poucos efectivos asignados, xa que todo o traballo posible se adianta durante a semana, e polo tanto, a redución posible de efectivos é menor proporcionalmente, sendo uns 186 efectivos habitualmente e 60 os convocados en servizos mínimos. Ademais, a peculiaridade da quenda de fin de semana da Corporación (habitualmente de 30 horas/semanais) fai que existan diferentes secuencias de horarios de carácter intensivo mesturados entre mañá, tarde e noite.
En consecuencia, considérase necesario:
A. Garantir a produción e emisión dos programas informativos, que son considerados imprescindibles para o mantemento dos servizos públicos esenciais de información á comunidade.
A «programación informativa» que sexa establecida co dito carácter de servizo esencial exixirá que queden debidamente expresadas ou identificadas as seguintes circunstancias ou datos, de feito que demostren na dita «programación informativa» o cumprimento destas dúas exixencias que seguen:
– Por un lado, a súa «necesidade» para garantir, no mínimo que resulta exixible, os dereitos fundamentais de liberdade de expresión e de información do artigo 20 da Constitución; neste sentido, os efectivos que se presentan nesta resolución fan referencia aos mínimos indispensables para asegurar a emisión, produción e continuidade dos espazos considerados de contido informativo esencial. En servizos mínimos encóntranse os efectivos precisos para a emisión das noticias esenciais, de relevancia, ou que precisen inmediatez e con valor informativo. O número de efectivos determínase para unha duración inferior á habitual destes espazos informativos, polo que, no caso de asistencia á folga da totalidade do cadro de persoal, se garanta esta duración reducida como información esencial.
En concreto, na programación actual dos medios de comunicación que conforman a Corporación:
• Na Televisión de Galicia:
– Bos días, espazo informativo matinal diario de luns a venres. Trátase dun espazo que é o primeiro avance do día de noticias para os galegos/as.
– Galicia Noticias, informativo de proximidade comarcal e local que ten unha importancia estrutural con atención informativa diferenciada e a referencia no ámbito comarcal.
– Telexornal Mediodía, espazo informativo de actualidade en Galicia, España e o mundo, é o informativo de referencia en Galicia.
– Telexornal Serán, espazo informativo de actualidade en Galicia, España e o mundo; actualiza e repasa a información da xornada.
• Na Radio Galega:
– Galicia por diante, espazo matinal radiofónico en que se tratan contidos informativos e de actualidade.
– A Crónica das 14.00, espazo informativo do mediodía.
– A Crónica das 20.00, espazo informativo de noite.
– Os boletíns horarios, pequenos espazos duns 4 minutos ao longo do día que se manteñen como información mínima.
O número de efectivos convocados en mínimos pretende garantir o carácter esencial informativo ao longo do día para os oíntes da Radio Galega.
A convocatoria de servizos mínimos permite a elaboración destes espazos informativos na TVG e na Radio Galega, e a súa duración será determinada polo seguimento da folga por parte do persoal.
• Na canle G2, a redifusión dos espazos informativos mínimos da primeira canle con posterioridade á súa emisión, como é habitual. Ao ser unha redifusión, non precisa efectivos en servizos mínimos para a creación do dito contido, pero si para a parte de emisión técnica.
• Nas canles dixitais, que nos últimos anos se converteron no modo de acceso á información de parte importante da poboación máis nova, disporase dun mínimo para actualizar nos portais informativos a información de carácter esencial na xornada.
• Os programas non informativos, directos ou gravados, non se dotan de servizos mínimos, así como tampouco están en servizos mínimos as informacións de deportes ou do tempo; en cambio, si podería estar a información meteorolóxica en caso de que na xornada de folga se torne unha información relevante. Cando non sexa posible a emisión dun espazo polo seguimento da folga, emitirase en redifusión un programa xa emitido con anterioridade.
– E, por outro, a súa «proporcionalidade», isto é, que a actividade informativa mantida como servizo mínimo comporta unha diminución, non só da total actividade televisiva ou radiofónica de calquera clase de contido que é desenvolvida en circunstancias de normalidade, senón tamén nunha apreciable redución da actividade audiovisual que é realizada nesas mesmas circunstancias de normalidade. A afectación da folga será máis ou menos visible en función do seguimento por parte do persoal.
Con estas dúas consideracións, coa decisión de cara ás folgas convocadas de, no caso de seguimento maioritario da folga, redución dos programas informativos mencionados e supresión doutros de carácter eminentemente informativo e de actualidade, producirase unha diminución da actividade informativa habitual, co que se proporciorá unha visibilidade notable do seguimento da folga e se producirá unha variación total da programación habitual diaria no caso de alto seguimento.
Os diferentes formatos de convocatoria de folga (parcial ou total) non teñen afectación de cara á convocatoria do número de efectivos de servizos mínimos, xa que é preciso o traballo da xornada completa dos efectivos que aseguran a consecución desta produción mínima informativa, a parte técnica e de emisión asociada. A única diferenza neste sentido é entre as convocatorias nos días de semana (entre luns e venres, como son as dos días 20 e 27 de abril e 2 de maio), e a do 1 de maio, que é domingo. Os efectivos en cada un destes casos varía debido a que é diferente a actividade produtiva entre semana e nun día de fin de semana.
Como norma xeral, en canto ao número concreto de efectivos en cada unha das unidades orgánicas que conforman a Corporación, convocouse en servizos mínimos un efectivo por categoría profesional preciso para a execución das tarefas que fan posible a emisión, soporte e a creación informativa considerada de carácter esencial por cada quenda de traballo (mañá, tarde e noite), a excepción de determinadas categorías profesionais que, pola súa relevancia nos servizos informativos ou polas tarefas específicas que desenvolven, precisan de máis dun profesional para garantir a cobertura esencial informativa e técnica.
Estes casos excepcionais concretos son:
1. Informadores de TVG en San Marcos: inclúe persoal das categorías profesionais de redactores, locutores de TVG e RG e auxiliares de redacción, precisos para sacar adiante a información de carácter esencial da xornada nas quendas de mañá, tarde e noite:
a. Bos días: o programa informativo da mañá, na súa franxa informativa precisa o traballo dun redactor/a e do presentador habitual en servizos mínimos para actualizar as noticias do primeiro espazo informativo de referencia no día na TVG.
b. Galicia Noticias: a comunicación de proximidade e, en concreto, a que emprega a comarca como unidade de referencia ten unha importancia estrutural en Galicia. Trátase dun telexornal líder na súa franxa na comunidade autónoma e, por ser o único en Galicia que transmite esta información fronte ao ámbito máis xeneralista dos outros formatos, Galicia Noticias ten un interese real e expreso en apartarse do partidismo e propiciar a participación cidadá centrándose no ámbito social e informativo da comunidade.
Neste senso, son precisos 2 redactores de quenda de mañá para poder realizar esta aproximación á información local da comunidade galega; o presentador deste espazo non está en mínimos.
c. TeleXornal 1: o espazo de referencia informativa en Galicia para desenvolver a información esencial de carácter prioritario para a comunidade precisa do presentador habitual, 3 informadores na redacción e 2 en exteriores para as coberturas que se fagan precisas ao longo da mañá.
d. TeleXornal 2: a actualización informativa de última hora precisa un equipo mínimo de 5 informadores en redacción e 1 en exteriores da quenda de tarde.
e. En cada un dos centros de traballo convócase en servizos mínimos un informador por quenda, é dicir, un de mañá e outro de tarde, para garantir a cobertura básica informativa de cada unha das áreas xeográficas: Lugo, Ourense, A Coruña-Ferrol, Pontevedra-Vigo e Madrid.
Nas xornadas de fin de semana, a programación que se mantén en servizos mínimos son os telexornais. O número de efectivos é o correspondente tendo en conta que as quendas de fin de semana son intensivas de 15 horas/xornada, polo que habitualmente o/a mesmo/a traballador/a cobre as necesidades produtivas de cada xornada.
Ademais, os informadores van acompañados, para as coberturas, por reporteiros gráficos que toman a imaxe e o son co fin de elaborar as pezas informativas para alimentar estes programas. Para cubrir estas informacións de luns a venres, traballando en conxunto cos informadores, son precisos 7 reporteiros gráficos (6 de mañá e 1 de tarde) no centro de traballo de San Marcos e un por quenda (mañá e tarde) en cada delegación (A Coruña, Vigo, Ourense e Lugo), o correspondente en xornada de fin de semana.
A parte de documentación e arquivo é precisa para poder ilustrar a información esencial que poida cubrirse na xornada de folga. Para isto os/as traballadores/as convocados/as teñen que cubrir o horario de atención e produción dos informativos para garantir as validacións e peticións dos redactores sobre o sistema de xestión do arquivo (Tedial). É precisa a convocatoria de dous documentalistas na quenda de mañá e un na quenda de tarde para cubrir a totalidade da franxa horaria de produción e emisión dos espazos informativos esenciais mencionados.
2. Informadores da Radio Galega en San Marcos: os redactores, locutores de radio ou auxiliares de redacción precisos para sacar adiante os programas informativos de carácter esencial da mañá, o mediodía e a noite dun día de semana son:
a. Galicia por Diante: é preciso convocar o coordinador da quenda de madrugada que pon en marcha o servizo mínimo informativo deste formato.
b. Boletíns horarios informativos: é preciso convocar 3 informadores (un por cada quenda: mañá, tarde e noite) para poder preparar e locutar os boletíns informativos para garantir a peza emitida cada hora que inclúe a información básica de servizo público.
c. A Crónica das 14.00: é o programa informativo do mediodía na Radio Galega, que precisa para a súa emisión convocar a coordinadora e presentadora, e un informador para a elaboración das noticias.
d. A Crónica das 20.00: é o programa informativo da tarde na Radio Galega, que precisa para a súa emisión convocar o coordinador deste e o presentador, e un informador para a elaboración das noticias.
e. En cada unha das delegacións convócase en servizos mínimos un informador para garantir a cobertura básica de cada unha das áreas xeográficas: Lugo, Ourense, A Coruña-Ferrol e Pontevedra-Vigo.
3. A realización do contido informativo descrito precisa un soporte tecnolóxico de medios de produción, tanto na TVG como na Radio Galega, para poder emitir. Con carácter xeral, convócase un efectivo de cada unha das categorías profesionais de ámbito tecnolóxico ou técnico por cada unha das quendas, coa excepción do que se explica máis adiante.
Nesta convocatoria de servizos mínimos, e co propósito de asegurar a emisión dos informativos e tan só a cobertura da información esencial do día, os medios técnicos precisos para isto vense reducidos de cara a prescindir de certos efectivos que achegan calidade e profesionalidade ao formato, prevendo que cos efectivos convocados se faga un formato máis sinxelo e básico.
Polo cal se precisan:
a. TVG: para a execución dos servizos informativos mínimos establecidos é preciso dispoñer dun plató con medios técnicos e efectivos para asegurar a gravación, produción, iluminación, fondos e rótulos das noticias, o son, a realización e demais parte técnica de produción informativa. Polo tanto, precísase polo menos un efectivo por categoría profesional e quenda destes profesionais que aseguran a produción.
Os casos concretos de colectivos que precisan convocar máis dun colectivo por quenda obedece a que:
Na área de grafismo é preciso dispoñer de dous grafistas por quenda debido a que durante a emisión dos servizos informativos un deles ten que estar na denominada «libraría», onde se executa a inxesta de gráficos, e outro no control que lanza os gráficos nos directos. Sen estas dúas figuras traballando simultaneamente en localizacións separadas e con diferentes tarefas non sería posible lanzar titulares ou rótulos durante os programas informativos. Ademais, para o cumprimento das directrices legais en día de folga e non modificar as funcións habituais de cada traballador/a, é preciso contar co responsable de grafismo do programa Galicia Noticias.
Na área de produción, os traballadores/as convocados en servizos mínimos fan os labores de produción esenciais para a emisión dos programas informativos, como vías, sinais, permisos, descargas, escaleta de produción, etc. En concreto, os 3 efectivos da quenda de mañá están asignados a coordinar o informativo do programa Bos días, a coordinar as saídas dos reporteiros gráficos e a coordinar o informativo TeleXornal 1. O produtor convocado na quenda de tarde é o coordinador do TeleXornal 2.
O mesmo ocorre co colectivo dos realizadores e axudantes de realización (o necesario é un realizador e dous axudantes por cada programa informativo). Pola mañá son precisos os realizadores habituais de Bos días, Galicia Noticias e o TeleXornal 1, e pola tarde o do TeleXornal 2, cos seus axudantes de realización correspondentes, que asumen as súas funcións habituais cada un no programa a que está asignado.
O colectivo dos operadores montadores de vídeo especializouse tras o proceso de dixitalización da TVG. Os operadores de PAM son os que atenden especificamente os sinais e directos que se gravan para os informativos, e é habitual que entren ata 7-8 sinais en simultáneo, polo que son precisos 2 operadores de PAM por quenda para o control e envío. Os operadores de MAM traballan co Departamento de Documentación preparando o material que lles solicita Informativos e facendo a inxesta de materiais externos. Son precisos dous efectivos na quenda da mañá para poder atender as pezas dos informativos e un na tarde. Os operadores de media son os xestores do sistema de produción de entradas e envío a controis das pezas dos informativos; son precisos 2 efectivos por quenda para poder manter os fluxos de produción. Ademais, precísase, para a correcta edición das pezas informativas elaboradas un operador montador de vídeo en cada un dos centros de traballo.
b. Radio Galega: na radio, a parte técnica dos informativos realízaa a categoría profesional dos técnicos de control. A Radio Galega, para poder emitir, ten que ter as 24 horas ao menos un técnico de control; debido aos horarios asignados aos técnicos, é preciso convocar 4 efectivos para cubrir a emisión da xornada (noite, mañá e tarde), xa que se non quedaría desprovista sen técnico algunha franxa horaria, e outro técnico máis para atender durante a mañá as gravacións e edicións dos cortes das noticias dos servizos informativos.
B. Asegurar a continuidade das emisións radiofónicas e televisivas, co obxecto de que, por razóns de máxima urxencia e necesidade, deba cubrirse algún acontecemento de actualidade que pola súa premura obrigue á súa cobertura coa maior axilidade posible. Tal garantía exixe do persoal necesario de Emisións e Continuidade, e que se establezan servizos mínimos na parte técnica para a eventual cobertura ante incidencias de calquera ámbito.
Neste sentido, o soporte e o mantemento das emisións inclúen efectivos dos departamentos de:
– Continuidade: nesta área crítica para a retransmisión televisiva establécense dous operadores de continuidade de xeito permanente, necesarios para poder axustar as redifusións e programas da TVG, tanto os previstos como as variacións que se teñan que facer durante o día por posibles efectos do seguimento da folga, e tamén atender as redifusións dos espazos considerados de información esencial na canle G2. Debido aos horarios asignados a cada traballador/a, é preciso convocar 7 efectivos para facer esta cobertura con 2 operadores de continuidade e non deixar horarios desprovistos, xa que a asignación das quendas o fai así necesario.
Polas características concretas desta convocatoria, que conta con dous día seguidos de folga 24 horas e que ademais estes días son domingo e luns, dáse unha casuística na cal, ao existir o cambio de quenda de fin de semana a semana, os traballadores/as convocados, para non deixaren desprovista a continuidade nesa noite, deben sumar un efectivo debido a que non son coincidentes as quendas de semana e de fin de semana.
– Emisións: é preciso un mínimo de 3 traballadores/as durante a xornada, xa que cada un deles teñen asignadas funcións e o control da emisión de cada unha das canles en que se retransmite o contido informativo esencial como responsables da elaboración do minutado, a segmentación e a comprobación técnica da grella para emitir sen incidencia. Emisións non ten persoal en servizos mínimos a fin de semana, xa que o traballo necesario se fai durante a semana.
– Operacións, Emisións e Mantemento Técnico: na parte do control central, o núcleo onde se fai o control dos sinais, é preciso ter un técnico electrónico por quenda para cubrir as franxas de emisión dos programas informativos de información esencial. Na área de explotación, que é Operacións Técnicas, é imprescindible a presenza de 2 técnicos por quenda, xa que é un servizo que ten que estar cuberto 24 horas para a emisión e os técnicos teñen que atender 2 salas de traballo diferentes para manter as máquinas en uso e poder dar soporte ás consolas de mestura nos controis e os dispositivos electrónicos: a de operacións técnicas e a sala rac.
Existen, ademais, outras áreas que son precisas de cara a dar soporte en caso de incidencias a cada un dos departamentos, son os servizos xerais:
– Servizo de Sistemas: onde é fundamental dar un soporte informático ao persoal. Tras o proceso de dixitalización acontecido na TVG, todos os fluxos de traballo e ferramentas mudaron para adaptar o traballo ao novo sistema. Este traballo de dar soporte é clave neste momento, xa que a plataforma de dixitalización aínda se está a estabilizar e é preciso un servizo de apoio aos traballadores/as ante calquera incidencia técnica que lles impida realizar as súas tarefas.
– O Grupo Soporte é unha unidade dependente do Servizo de Sistemas. É unha unidade de soporte tecnolóxico da plataforma dixital da TVG, calquera incidencia neste aspecto ten que ser solventada para a correcta emisión na televisión. É unha unidade de soporte crítica que resolve as incidencias da redacción de informativos. Pola mañá, que é a quenda de maior produción informativa, son precisos 2 efectivos de cara a poder garantir a resolución en tempo das casuísticas técnicas habituais da plataforma dixital na CRTVG.
– Instalacións e Almacéns: así mesmo, é preciso ter un almacenista por quenda para poder abrir os almacéns de cámaras e material técnico para subministrarlles os equipos precisos, co fin de desenvolver o seu traballo, ao resto de traballadores/as en servizos mínimos.
– Mantemento: o persoal deste departamento, entre outras tarefas, atende incidencias relacionadas coa electricidade, xa que o mantemento da instalación eléctrica de alta e baixa tensión da CRTVG é imprescindible para garantir a emisión en caso de incidencia en cada unha das quendas (mañá, tarde e noite), ou tarefas propias de mantemento para resolver calquera incidencia.
E, en fin, C) a consideración da extensión xeográfica e temporal da convocatoria de folga que afecta a xestión dos servizos públicos esenciais de radiodifusión sonora e televisión de Galicia.
Na adopción de tales medidas que garantan o mantemento dos servizos, débense ponderar a extensión territorial e persoal, a duración prevista e as demais circunstancias concorrentes na folga, así como as concretas necesidades do servizo e a natureza dos dereitos ou bens constitucionalmente protexidos sobre os cales aquela repercute.
Neste caso, trátase dunha folga durante diferentes xornadas, convocada polo Comité Intercentros. A CRTVG é o único medio de comunicación audiovisual de carácter público con cobertura autonómica e, polo tanto, o único medio coa obriga e posibilidade de asegurar este servizo informativo esencial.
A duración temporal da convocatoria da folga (tanto as parciais como as de 24 horas) afecta todos/as os/as traballadores/as en todas as quendas, o que obriga a convocar en servizos mínimos persoal de diferentes quendas (mañá, tarde, noite) para cubrir unha mesma tarefa ou cobertura técnica. A convocatoria en servizos mínimos efectúase de xeito que non supoña cambio de horario, de funcións, tarefas habituais e outras circunstancias do persoal. Podería darse a circunstancia de que ao respectar unha alternancia, ou por ausencias xustificadas do persoal, o persoal asignado en servizos mínimos non coincida exactamente coa categoría profesional asignada ou substitúa a función esencial descrita dunha ausencia xustificada.
En consecuencia, de acordo coa normativa citada e cos argumentos expostos, en virtude das facultades que me confire o artigo 1 do Decreto 233/2012, do 5 de decembro, polo que se determina a organización, funcións e competencias da Vicepresidencia da Xunta de Galicia, e oído o Comité de Folga,
DISPOÑO:
Artigo 1
1. A convocatoria de folga terá lugar en paros parciais o mércores 20 e o mércores 27 de abril, que ocuparán a metade da xornada laboral, e de xornada completa o domingo 1 e o luns 2 de maio.
2. Terán a consideración de servizos mínimos os que se relacionan no anexo a esta orde.
Artigo 2
O persoal necesario para a cobertura dos servizos mínimos deberá ser publicado nos taboleiros de anuncios con antelación suficiente. A designación nominal dos efectivos que deben cubrir os servizos mínimos será realizada polos empregadores e notificada ao persoal designado.
Disposición derradeira
Esta orde producirá efectos o mesmo día da súa publicación no Diario Oficial de Galicia.
Santiago de Compostela, 18 de abril de 2022
Alfonso Rueda Valenzuela
Vicepresidente primeiro e conselleiro de Presidencia, Xustiza e Turismo
ANEXO
A. Para as xornadas de convocatoria de folga dos días 20 e 27 de abril e 2 de maio:
I. Informativos:
I.I. Documentación e Arquivo:
2 Documentalistas de mañá e 1 de tarde.
I.II. Redacción da Radio Galega (redactores/as, locutores/as e auxiliares de redacción).
2 Informadores/as de noite, 3 de mañá e 2 de tarde en San Marcos.
1 Informador/a de mañá na delegación da Coruña.
1 Informador/a de mañá na delegación de Lugo.
1 Informador/a de mañá na delegación de Ourense.
1 Informador/a de mañá na delegación de Vigo.
I.III. Redacción de Televisión de Galicia (redactores/as, locutores/as e auxiliares de redacción).
10 Informadores/as de mañá e 6 de tarde en San Marcos.
1 Informador/a de mañá na delegación de Madrid.
1 Informador/a de mañá e 1 de tarde na delegación da Coruña.
1 Informador/a de mañá e 1 de tarde na delegación de Ourense.
1 Informador/a de mañá e 1 de tarde na delegación de Vigo.
1 Informador/a de mañá e 1 de tarde na delegación de Lugo.
I.IV. Reporteiros/as gráficos/as:
6 Reporteiros/as gráficos/as de mañá e 1 de tarde en San Marcos.
1 Reporteiro/a gráfico/a de mañá e 1 de tarde na delegación da Coruña.
1 Reporteiro/a gráfico/a de mañá e 1 de tarde na delegación de Vigo.
1 Reporteiro/a gráfico/a de mañá e 1 de tarde na delegación de Ourense.
1 Reporteiro/a gráfico/a de mañá e 1 de tarde na delegación de Lugo.
I.V. Tempo real:
1 Informador/a de mañá e 1 de tarde.
I.VI. Medios de produción:
I.VI.I. Cámaras:
1 Cámara de primeira de mañá e 1 de tarde.
1 Control de cámara de mañá e 1 de tarde.
I.VI.II. Grafismo:
1 Deseñador/a gráfico/a de mañá e 1 de tarde.
2 Grafistas-tituladores/as de mañá e 2 de tarde.
I.VI.III. Iluminación:
1 Técnico/a de iluminación de mañá e 1 de tarde.
1 Iluminador/a de mañá e 1 de tarde.
I.VI.IV. Maquillaxe:
1 Maquillador/a de mañá e 1 de tarde.
I.VI.V. Produción:
1 Produtor/a de mañá.
2 Axudantes/as de produción de mañá e 1 de tarde.
I.VI.VI. Realización:
3 Realizadores/as de mañá e 1 de tarde.
5 Axudantes/as de realización de mañá e 3 de tarde.
I.VI.VII. Son:
1 Técnico/a de son de mañá e 1 de tarde.
1 Operador/a produtor/a de son de mañá e 1 de tarde.
I.VI.VIII. Operadores/as de vídeo:
1 Operador/a de mañá e 1 de tarde.
2 Operadores/as de inxesta PAM de mañá e 2 de tarde.
2 Operadores/as de inxesta MAM de mañá e 1 de tarde.
2 Operadores/as de media de mañá e 2 de tarde.
1 Operador/a de mañá na delegación da Coruña.
1 Operador/a de mañá na delegación de Lugo.
1 Operador/a de mañá na delegación de Vigo.
1 Operador/a de mañá na delegación de Ourense.
II. Soporte e Mantemento das Emisións:
II.I. Soporte e Mantemento das Emisións:
II.I.I. Continuidade:
1 Operador/a de continuidade de noite, 3 de mañá e 3 de tarde.
II.I.II. Emisións:
3 efectivos de mañá.
II.II. Grupo Soporte:
1 Operador/a de soporte de noite, 2 de mañá e 1 de tarde.
II.III. Medios RG:
1 Técnico/a de control de noite, 3 de mañá e 1 de tarde.
II.IV. Operacións, Emisións e Mantemento Técnico:
1 Técnico/a electrónico/a de noite, 3 de mañá e 3 de tarde.
II.V. Servizo de Instalación:
1 Oficial técnico/a electricista de noite, 1 de mañá e 1 de tarde.
1 Almacenista de mañá e 1 de tarde.
1 Axudante/a de mantemento de mañá e 1 de tarde.
II.VI. Servizo de Sistemas:
1 Analista-programador/a de mañá e 1 de tarde.
B. Para a xornada de convocatoria de folga do 1 de maio:
I. Informativos:
I.I. Documentación e Arquivo:
1 Documentalista de día.
I.II. Redacción da Radio Galega (redactores/as, locutores/as e auxiliares de redacción).
2 Informadores/as de día e 1 de noite.
I.III. Redacción de Televisión de Galicia (redactores/as, locutores/as e auxiliares de redacción).
5 Informadores/as de día en San Marcos.
1 Informador/a de día na delegación da Coruña.
1 Informador/a de día na delegación de Ourense.
1 Informador/a de día na delegación de Vigo.
1 Informador/a de día na delegación de Lugo.
I.IV. Reporteiros/as gráficos/as:
4 Reporteiros/as gráficos/as de día en San Marcos.
1 Reporteiro/a gráfico/a de día na delegación da Coruña.
1 Reporteiro/a gráfico/a de día na delegación de Vigo.
1 Reporteiro/a gráfico/a de día na delegación de Ourense.
1 Reporteiro/a gráfico/a de día na delegación de Lugo.
I.V. Tempo real:
1 Informador/a de día.
I.VI. Medios de produción:
I.VI.I. Cámaras:
1 Cámara de primeira de día.
1 Control de cámara de día.
I.VI.II. Grafismo:
1 Deseñador/a gráfico/a de día.
2 Grafistas-tituladores/as de día.
I.VI.III. Iluminación:
1 Técnico/a de iluminación de día.
1 Iluminador/a de día.
I.VI.IV. Maquillaxe:
1 Maquillador/a de día.
I.VI.V. Produción:
1 Produtor/a de día.
1 Axudante/a de produción de día.
I.VI.VI. Realización:
1 Realizador/a de día.
3 Axudantes/as de realización de día.
I.VI.VII. Son:
1 Técnico/a de son de día.
1 Operador/a produtor/a de día.
I.VI.VIII. Operadores/as de vídeo:
2 Operadores/as de día.
2 Operadores/as de inxesta PAM de día.
1 Operador/a de inxesta MAM de día.
2 Operador/a de media de día.
II. Soporte e Mantemento das Emisións:
II.I Soporte e Mantemento das Emisións:
II.I.I. Continuidade:
3 Operadores/as de continuidade de día e 1 de noite.
II.II. Grupo Soporte:
1 Operador/a de soporte de día e 1 de noite.
II.III. Medios RG:
1 Técnico/a de control de día e 1 de noite.
II.IV. Operacións, Emisións e Mantemento Técnico:
3 Técnicos/as electrónicos/as de día e 1 de noite.
II.V. Servizo de Instalación:
1 Oficial técnico/a electricista de día.
1 Almacenista de día.
II.VI. Servizo de Sistemas:
1 Analista-programador/a de día.
